InfoHub Logo

سەربيانىڭ ۆرنياچكا-بانيا قالاسىندا وتكەن جاسوسپىرىمدەر اراسىنداعى راپيد جانە بليس بويىنشا شاحماتتان الەم چەمپيوناتىندا قازاقستان قۇراماسى تاريحي رەكورد ورناتتى. قازاقستاندىق شاحماتشىلار جالپى كوماندالىق ەسەپتە ءبىرىنشى ورىندى يەلەنىپ، 21 مەدالدى جەڭىپ الدى.

بۇل تۋرالى Infohub.kz اقپارات اگەنتتىگى حابارلايدى.

چەمپيونات 15-20 ءساۋىر ارالىعىندا ءارتۇرلى جاس ساناتىندا ءوتتى. قازاقستاننان بارلىعى توعىز شاحماتشى التىن مەدالدى قانجىعالادى. بۇل – ەل تاريحىنداعى ەڭ ۇزدىك كورسەتكىش.

جاس چەمپيوندار

ءتۋرنيردىڭ العاشقى كۇندەرىندە، راپيد سايىستارى باستالعاندا، قازاقستاندىق سپورتشىلار التىننان القا تاعا باستادى.

8 جاسقا دەيىنگىلەر اراسىندا شىمكەنتتىك اسلان ەندىبايەۆ رەسەيدىڭ باستى قارسىلاسى ميحايل شيشوۆتى جەڭىپ، تۋرنيردە توپ جاردى.

10 جاسقا دەيىنگى قىزدار اراسىندا ادەلينا نۇرحان قىزى 11 تۋردىڭ 9-ىندا جەڭىسكە جەتىپ، ءبىرىنشى ورىندى يەلەندى. ال 12 جاسقا دەيىنگىلەر اراسىندا رامازان تولەگەن، 18 جاسقا دەيىنگىلەر اراسىندا الديار اڭسات التىن مەدالدى ولجالاسا، الدياردىڭ فينالىنداعى قارسىلاسى دا قازاقستاندىق دانيال ساپەنوۆ بولدى.

16 جاسقا دەيىنگىلەر اراسىندا ەلناز قالياقمەتتىڭ جەڭىسى كوپ كۇتىلگەن ەدى. ول تۋرنيردە 11 پارتيانىڭ 10-ىن ۇتىپ، التىن مەدالدى يەلەندى. ەلناز قالياقمەت قازاقستاننىڭ ەرەسەكتەر قۇراماسىنىڭ مۇشەسى جانە وتكەن جىلى الەم كۋبوگىندا گرۋزيانىڭ الەم چەمپيونى نينو ءباسياشۆيليدى جەڭىپ، ۇلكەن جاڭالىق جاراتقان بولاتىن.

بليستەگى جەڭىستەر

بليس تۋرنيرىندە دە قازاقستاندىقتار باسىمدىق تانىتتى. 8 جاسقا دەيىنگى قىزدار اراسىندا ۆەنەرا جاكىشيەۆا، 10 جاسقا دەيىنگى قىزدار اراسىندا ءاليشا بيسالييەۆا، 14 جاسقا دەيىنگى اشىق كاتەگوريادا الديار جاراس جانە 18 جاسقا دەيىنگى قىزدار اراسىندا زارينا نۇرعالييەۆا چەمپيون اتاندى.

جالپى، راپيد جانە بليس تۋرنيرلەرىندە قازاقستان قۇراماسى 9 التىن، 7 كۇمىس جانە 4 قولا مەدالدى يەلەندى. بۇل – بۇعان دەيىنگى 2024 جىلعى 16 مەدالدى جاڭارتىپ، ەڭ ۇزدىك ناتيجە بولىپ تىركەلدى.

ەستەرىڭىزگە سالا كەتەيىك، 2025 جىلدىڭ سوڭىندا قازاقستاندىق شاحماتشى ءبيبىسارا اساۋبايەۆا ءۇشىنشى رەت بليس بويىنشا الەم چەمپيونى اتانىپ، شاحماتتاعى ەڭ باستى تۋرنيرلەردىڭ ءبىرى – پرەتەندەنتتەر تۋرنيرىنە جولداما العان بولاتىن. وندا ول ءۇندىستاندىق چەمپيوننان ءبىر ۇپاي عانا قالىپ، ەكىنشى ورىندى يەلەنىپ، 52 مىڭ ەۋرو تابىس تاپقان ەدى.