InfoHub Logo

قازاقستاندىق بيزنەسمەن، BI Group كومپانياسىنىڭ تەڭ قۇرىلتايشىسى ايدىن راحىمبايەۆ پەن ونىڭ جۇبايى انار "The Giving Pledge" حالىقارالىق باستاماسىنا رەسمي تۇردە قوسىلدى. بۇل باستاما ميللياردەرلەردى وزدەرىنىڭ جارتى بايلىعىن قايىرىمدىلىققا جۇمساۋعا شاقىرادى.

بۇل تۋرالى Infohub.kz اقپارات اگەنتتىگى حابارلايدى.

"The Giving Pledge" دەگەن نە؟

بۇل باستامانى 2010 جىلى بيلل گەيتس، مەليندا فرەنچ گەيتس جانە ۋوررەن باففەت قۇرعان. ونىڭ باستى ماقساتى – ميللياردەرلەردى وزدەرىنىڭ بايلىقتارىن الەمدىك ماسەلەلەردى شەشۋگە باعىتتاۋعا شاقىرۋ. 16 جىل ىشىندە بۇل باستاماعا 30 ەلدەن 250-گە جۋىق مەسەنات قوسىلعان. ولاردىڭ قاتارىندا يلون ماسك، مارك سۋكەربەرگ، ريچارد برەنسون سياقتى تۇلعالار بار. ەندى بۇل تىزىمدە قازاقستاندىق وتباسى دا بار.

ايدىن راحىمبايەۆ كىم؟

Forbes Kazakhstan جۋرنالىنىڭ 2026 جىلعى رەيتينگىسى بويىنشا، راحىمبايەۆ ەلىمىزدىڭ ەڭ باي بيزنەسمەندەرى اراسىندا 9-ورىندى يەلەنىپ، بايلىعى 1،1 ميلليارد دوللارعا باعالانعان. بيىل ول العاش رەت Forbes جۋرنالىنىڭ جاھاندىق ميللياردەرلەر تىزىمىنە ەنىپ، 3185-ورىننان كورىندى. راحىمبايەۆ – BI Group ينۆەستيسيالىق-قۇرىلىس حولدينگىنىڭ اكسيونەرى. اتالعان كومپانيا 2025 جىلى 2،4 ملن شارشى مەتر تۇرعىن ءۇيدى پايدالانۋعا بەرىپ، الەمدەگى ەڭ ءىرى ديەۆەلوپەرلەردىڭ قاتارىنا قوسىلدى. توپ قازاقستاننان بولەك، وزبەكستان، اقش جانە باا-دە جۇمىس ىستەيدى، ال وتكەن جىلى ءازىربايجان نارىعىنا شىعاتىنىن مالىمدەگەن.

ولار نەگە ۋادە بەردى؟

The Giving Pledge سايتىندا جاريالانعان حاتىندا راحىمبايەۆتار وتباسى وزدەرىنىڭ ءومىر جولى تۋرالى بايانداعان. ولار شاعىن اۋىلداردان شىققان، قاراپايىم وتباسىلاردا تاربيەلەنگەندەرىن ايتادى. اقشانىڭ قۇندىلىعى تۋرالى تۇسىنىكتەرىنىڭ قالاي وزگەرگەنىن بىلايشا سيپاتتايدى:

«جۇبايىم ەكەۋىمىز دە وتە قاراپايىم وتباسىلاردا، شاعىن اۋىلداردا وستىك. ءوزىمىزدى ەسىمىزدى بىلگەننەن بەرى، كاپيتال قۇرۋ ءۇشىن تىنباي ەڭبەك ەتتىك. ۋاقىت وتە كەلە ماڭىزدى ءبىر تۇيىنگە كەلدىك: كاپيتال – بۇل ماقسات ەمەس، قۇرال. ونىڭ شىنايى قۇندىلىعى – ادامداردىڭ ءومىرىن وزگەرتۋگە جانە قوعامدى دامىتۋعا قانشالىقتى اسەر ەتەتىنىمەن انىقتالادى».

شەشىمدەرىن ولار ناقتى ايتتى:

«ءبىز ءوز بايلىعىمىزدىڭ جارتىسىنان استامىن (سوڭعى دەرەكتەر بويىنشا شامامەن 600 ميلليون دوللار نەمەسە 276 ميلليارد تەڭگە) ءومىر بويى قايىرىمدىلىققا جۇمساۋعا مىندەتتەنەمىز. ءبىزدىڭ تابىسىمىز – ەڭبەكتىڭ، ءبىلىمنىڭ جانە سەنىمنىڭ ناتيجەسى. ءبىراق ءبىز وتە باقىتتىمىز: وتباسى بىزگە كۇش بەردى، ەل مۇمكىندىك بەردى، قوعام سەنىم ارتتى – مۇنىڭ ءبارى ءبىزدىڭ باقۋاتتىلىعىمىزدىڭ نەگىزى بولدى. سول سەبەپتى، ءبىز قوعامعا قايتارۋدى ءوز مىندەتىمىز دەپ سانايمىز، ەڭ مۇقتاج جاندارعا قولداۋ كورسەتۋ ارقىلى».

ءۇش مىندەتتەمە

راحىمبايەۆتار حاتىندا جۇمىستىڭ ءۇش ناقتى باعىتىن كورسەتكەن.

ءبىرىنشىسى – جاقسىلىقتى اۋقىمداۋ: جاھاندىق الەۋمەتتىك ماسەلەلەردى شەشۋ ءۇشىن "The Giving Pledge" قاتىسۋشىلارىنىڭ حالىقارالىق تاجىريبەسىن جەرگىلىكتى باستامالارمەن بىرىكتىرۋ.

ەكىنشىسى – مۇمكىندىكتەر جاساۋ:

«بالالارىمىز ءۇشىن جاساي الاتىن ەڭ جاقسى نارسە – ولاردىڭ اينالاسىنداعى الەمدى وزگەرتۋ. مۇرا رەتىندە اقشا ەمەس، ونداعان جانە عاسىرلار بويى ءومىر سۇرەتىن ءبىلىم مەن مۇمكىندىكتەر قالدىرۋ».

ءۇشىنشىسى – سىيلاۋ مادەنيەتىن قالىپتاستىرۋ: بيزنەس قاۋىمداستىعىنىڭ مۇمكىندىگىنشە كوبىرەك وكىلدەرىن سانالى قايىرىمدىلىققا شابىتتاندىرۋ.

ولار نە ىستەپ جاتىر؟

راحىمبايەۆ – «انا ءۇيى» جەلىسىنىڭ باستاماشىسى، بۇل جوبا بالالاردى جەتىمدەر ۇيىنە تۇسۋدەن ساقتايدى. سونداي-اق، اۋىل بالالارىنا ساپالى ءبىلىم بەرۋگە مۇمكىندىك بەرەتىن IQanat ءبىلىم جوباسىنىڭ دا اۆتورى. بۇل ەكى جوبا 230-دان استام كاسىپكەردى قولداپ، گارۆارد بيزنەس مەكتەبىندە تالقىلانعان. BI Group كومانداسىمەن بىرگە راحىمبايەۆ جۇزدەگەن كۇردەلى وپەراسيالارعا قارجىلاندىرۋ ۇيىمداستىرىپ، الەمدىك دەڭگەيدەگى دارىگەرلەردى تارتادى.

«مەنىڭ جاسىم ءقازىر 53-تە. ايەلىم ءارقاشان جانىمدا بولىپ، ءار باستامامدى قولداپ وتىردى. بۇگىنگى تاڭداعى بايلىعىمىز – 30 جىل بويى BI Group كومانداسىمەن بىرگە اتقارعان ەڭبەكتىڭ ناتيجەسى. "The Giving Pledge" قاتارىنا قوسىلۋ ارقىلى ءبىز بيزنەسىمىزدى دامىتۋدىڭ ودان دا ۇلكەن ءمانىن تاپتىق، ويتكەنى بۇل بىزگە ءومىرىمىزدىڭ ەكىنشى جارتىسىندا ودان دا كوپ جاقسىلىق جاساۋعا مۇمكىندىك بەرەدى»، – دەپ جازدى راحىمبايەۆ.