InfoHub Logo

استاناداعى Spectrum International School مەكتەبىنىڭ تۇلەگى نيكولاي سوي الەمدەگى ەڭ بەدەلدى ءبىلىم وشاقتارىنىڭ ءبىرى – Tetr College of Business-كە قابىلداندى. بۇل كوللەدجگە ءتۇسۋ كورسەتكىشى 1%-دان از، ياعني 90 مىڭنان استام وتىنىشتەن نەبارى 110 ستۋدەنت قابىلدانادى ەكەن.

بۇل تۋرالى Infohub.kz اقپارات اگەنتتىگى حابارلايدى.

كاسىپكەرلىككە دەگەن قۇلشىنىس

نيكولايدىڭ ءوزى مويىنداعانىنداي، ول مەكتەپتە ۇزدىك وقۋشى بولماعان. ونىڭ ايتۋىنشا، Tetr College-گە تۇسۋدەگى باستى فاكتور – ونىڭ كاسىپكەرلىككە دەگەن قىزىعۋشىلىعى مەن ستارتاپتار قۇرۋعا دەگەن ۇمتىلىسى بولعان.

«مەن ەشقاشان وقۋعا بەيىم بولعان ەمەسپىن. مەنىڭ باستى پروبلەمام – جالقاۋلىق ەدى»، – دەيدى نيكولاي. ول ءوزىنىڭ ويلاۋ قابىلەتى مەن يدەيالاردى جۇزەگە اسىرۋعا دەگەن قۇلشىنىسى ارقاسىندا وقۋعا تۇسكەنىن اتاپ ءوتتى.

ىرىكتەۋ پروسەسى جانە ستيپەنديا

كوللەدجگە قابىلداۋ پروسەسى ەكى ايدان استام ۋاقىتقا سوزىلدى. ول بىرنەشە كەزەڭنەن تۇردى: ءوتىنىش تولتىرۋ، Tetr Trial سىناعىنان ءوتۋ جانە بيزنەس سالاسىنداعى وكىلمەن سۇحباتتاسۋ. ناتيجەسىندە، نيكولاي تەك قابىلدانعان جوق، سونىمەن قاتار 85 مىڭ دوللارلىق ستيپەندياعا دا يە بولدى.

الەمدىك دەڭگەيدەگى ءبىلىم

Tetr College of Business – بۇل ءتورت جىل ىشىندە جەتى ءتۇرلى ەلدە ءبىلىم الۋعا مۇمكىندىك بەرەتىن، بولاشاق كاسىپكەرلەرگە، كوشباسشىلارعا ارنالعان بىرەگەي باعدارلاما ۇسىنادى. كوللەدجدىڭ قابىلداۋ كورسەتكىشى وتە تومەن، كەي جىلدارى 0،12% - 2،6% ارالىعىندا بولعان.

نيكولاي ءوز تاجىريبەسى ارقىلى باسقا وقۋشىلارعا ۇلگى بولعىسى كەلەدى. ول اكادەميالىق كورسەتكىشتەر ماڭىزدى بولعانىمەن، ويلاۋ قابىلەتى، كاسىپكەرلىككە دايىندىق سياقتى باسقا دا فاكتورلاردىڭ ءرولى زور ەكەنىن ايتادى.

بولاشاقتا نيكولاي قوعامعا پايدا كەلتىرەتىن، الەمنىڭ وزەكتى ماسەلەلەرىن شەشۋگە اتسالىساتىن كاسىپكەر بولۋدى ارماندايدى.