InfoHub Logo

قازاقستاندىق زاۋىت پاكىستانعا بروندى تەحنيكا جەتكىزەدى

قازاقستاندىق BESQARU زاۋىتى پاكىستان نارىعىنا قازاقستاندىق دوڭگەلەكتى بروندى تەحنيكانى جەتكىزۋ تۋرالى كەلىسىمگە قول قويدى. بۇل تۋرالى Infohub.kz اقپارات اگەنتتىگى حابارلايدى.

جاڭالىق قاسىم-جومارت توقايەۆتىڭ پاكىستانعا مەملەكەتتىك ساپارى اياسىندا جاسالدى. زاۋىت وكىلدەرىنىڭ ايتۋىنشا، تاراپتار قازاقستاندىق دوڭگەلەكتى بروندى تەحنيكانى، سونىڭ ىشىندە AIBAR 4x4 بروندالعان كولىگىن جانە VN-11 جاۋىنگەرلىك مودۋلىمەن جابدىقتالعان TAIMAS 8x8 جاياۋ اسكەرلەرىنىڭ جاۋىنگەرلىك ماشيناسىن بىرلەسىپ جەتكىزۋگە كەلىستى. وندىرىستىك سيكل تولىعىمەن قازاقستان اۋماعىندا جۇزەگە اسىرىلادى.

كەلىسىمنىڭ ەرەكشەلىكتەرى

زاۋىت وكىلدەرىنىڭ مالىمەتىنشە، بۇل وتاندىق قورعانىس-ونەركاسىپتىك كەشەننىڭ دامۋىنىڭ جوعارى دەڭگەيىن جانە ونىڭ ەكسپورتتىق الەۋەتىن كورسەتەدى.

سونىمەن قاتار، كەلىسىم تاراپتار اراسىنداعى كووپەراسيانى دامىتۋدى، سونىڭ ىشىندە ساتۋدان كەيىنگى قولداۋ، سەرۆيستىك قىزمەت كورسەتۋ، تەحنيكالىق قولداۋ جانە پەرسونالدى وقىتۋ جۇيەسىن قالىپتاستىرۋدى كوزدەيدى، بۇل تەحنيكانى جەتكىزۋ جاعدايىندا ونىڭ سەنىمدى جانە ۇزاق مەرزىمدى پايدالانىلۋىنا نەگىز قالايدى.

«BESQARU زاۋىتى 2025 جىلى اشىلدى جانە قىسقا مەرزىمدە قازىرگى زامانعى، باسەكەگە قابىلەتتى جانە ەكسپورتقا باعدارلانعان ونىمدەردى شىعارۋعا باعىتتالعان قازاقستاننىڭ قورعانىس ماشينا جاساۋ يندۋستريالىق ورتالىعىنا اينالدى»، - دەپ اتاپ ءوتتى زاۋىت وكىلدەرى.

كومپانيانىڭ حابارلاۋىنشا، قول قويىلعان كەلىسىم «ەرەكشە سيپاتقا يە جانە قازاقستان مەن پاكىستان اراسىنداعى دوڭگەلەكتى بروندى تەحنيكا سەگمەنتىندەگى ينستيتۋسيونالدىق ىنتىماقتاستىقتىڭ العاشقى مىسالدارىنىڭ ءبىرى» بولىپ تابىلادى. بۇل ەكسپورتتىق ءوزارا ءىس-قيمىلدى دامىتۋعا، ونەركاسىپتىك ارىپتەستىكتى نىعايتۋعا جانە قازاقستاندىق جوعارى تەحنولوگيالىق ونىمدەردىڭ حالىقارالىق نارىقتارداعى قاتىسۋىن كەڭەيتۋگە نەگىز قالايدى، دەپ تۇيىندەدى BESQARU.