InfoHub Logo

قازاقستاندا سيفرلىق قارجى اكتيۆتەرىن (سقا) رەتتەۋ ەنگىزىلسە، قارجى نارىعىندا جاڭا سالا قالىپتاسۋى ىقتيمال. بۇل تۋرالى قازاقستان ۇلتتىق بانكىنىڭ ءتوراعاسى تيمۋر سۇلەيمەنوۆ مالىمدەدى.

بۇل تۋرالى Infohub.kz اقپارات اگەنتتىگى حابارلايدى.

ونىڭ ايتۋىنشا، ءداستۇرلى قارجى جۇيەسى بانكتەر، ساقتاندىرۋ كومپانيالارى، نەسيەلەر مەن وبليگاسيالار اينالاسىندا قۇرىلعان. الايدا، تەحنولوگيالاردىڭ دامۋى جاڭا مۇمكىندىكتەرگە جول اشۋدا – توكەنيزاسيالانعان اكتيۆتەر، سيفرلىق وبليگاسيالار جانە كريپتو-فياتتىق تولەم ارنالارى.

قارجى نارىعىنداعى جاڭا سالا

«شىن مانىندە، قارجى نارىعىنىڭ جاڭا سالاسى اشىلادى»، – دەپ اتاپ ءوتتى سۇلەيمەنوۆ.

سقا-نىڭ نەگىزگى ارتىقشىلىقتارىنىڭ ءبىرى رەتىندە قارجىلاندىرۋعا قولجەتىمدىلىكتى دەموكراتيالاندىرۋدى اتاپ ءوتتى. مىسالى، قۇرىلىس سالۋشى جىلجىمايتىن مۇلىكتى – تۇرعىن ءۇي كەشەنىن نەمەسە جەكە پاتەرلەردى توكەندەپ، ينۆەستورلارعا سيفرلىق توكەندەر تۇرىندە ساتا الادى.

سۇلەيمەنوۆتىڭ ايتۋىنشا، بۇل ءداستۇرلى بانكتەرگە جاڭا باسەكەلەستىك تۋدىرۋى مۇمكىن.

كريپتوۆاليۋتا اينالىمىن زاڭداستىرۋ

كريپتوۆاليۋتا اينالىمىن زاڭداستىرۋ جانە رەتتەۋ جەكە باعىت بولادى. قازىرگى ۋاقىتتا كريپتوۆاليۋتالار بەلسەندى قولدانىلعانىمەن، كوبىنەسە قۇقىقتىق شەڭبەردەن تىس قالىپ وتىر.

«ءبارىمىز بىلەمىز، بيتكويندەر مەن باسقا دا كريپتوۆاليۋتالار بىزدە بەلسەندى قولدانىلادى، ءبىراق زاڭدى اينالىمنان تىس. ونى قىلمىستىق كودەكس ارقىلى تىيۋدىڭ قاجەتى قانشا؟ ودان دا كريپتوايىرباستاۋشىلاردى ليسەنزيالاۋعا ماجبۇرلەپ، ولاردى رەتتەپ، اقدت (قارجى جىلىمىنا جانە تەرروريزمدى قارجىلاندىرۋعا قارسى ءىس-قيمىل) تالاپتارىن، بانك زاڭناماسىن، تولەمدەر تۋرالى زاڭنامانى، سالىق زاڭناماسىنىڭ تالاپتارىن ساقتاۋدى تالاپ ەتكەن دۇرىس. ءسويتىپ، ولار بۇل قىزمەتتى زاڭدى ايادا اتقارسىن»، – دەدى ول.

قاتاڭ تىيىمداردىڭ ورنىنا، رەتتەۋشى ورگان كريپتوايىرباستاۋشىلاردى ليسەنزيالاۋ جۇيەسىن قۇرۋدى ۇسىنادى. ولار قارجى جىلىمىنا جانە تەرروريزمدى قارجىلاندىرۋعا قارسى ءىس-قيمىل، سالىق ەرەجەلەرى جانە تولەم رەتتەۋى نورمالارىنا سايكەس بولۋى ءتيىس.

كريپتو-فياتتىق كارتالار

ونىڭ ايتۋىنشا، ەكى بانك ستەيبلكويندەردەگى شوتتاردان تولەم جاساۋعا مۇمكىندىك بەرەتىن كريپتو-فياتتىق كارتالاردى شىعارا باستادى. تولەم كەزىندە قاراجات اۆتوماتتى تۇردە تەڭگەگە اۋدارىلادى.

تاعى ەكى بانكتىڭ وسىنداي ونىمدەردى ىسكە قوسۋعا دايىندالىپ جاتقانىن ايتتى.

«ياعني، مۇنداي جوبالار كوپ. مەن «پەسوچنيسا» رەجيمىنەن بىرتىندەپ، رەتتەۋ پايدا بولعان سايىن، ولاردى جالپى بەلگىلەنگەن رەجيمگە اۋىستىرا باستايمىز دەپ ۇمىتتەنەمىن. جانە ءبىز مۇنى تۇتىنۋشى رەتىندە كۇندەلىكتى كورەتىن بولامىز»، – دەپ قوستى سۇلەيمەنوۆ.

ۇلتتىق بانكتە سيفرلىق قارجى اكتيۆتەرى نارىعىنىڭ دامۋى فينتەح سەكتورى مەن قازاقستان ەكونوميكاسىنىڭ جالپى دامۋىنا قوسىمشا سەرپىن بەرە الادى دەپ سانايدى.