InfoHub Logo

قازاقستان پارلامەنتى سەناتى ءتۋريزمدى قولداۋ جانە بالالار سپورتىن دامىتۋ باعىتىندا زاڭناماعا ماڭىزدى وزگەرىستەر ەنگىزۋدى ۇسىندى. جاڭا ەرەجەلەرگە سايكەس، ەلىمىزدە جاڭا ويىن-ساۋىق ايماقتارى اشىلادى. الايدا، بۇل جاڭالىقتىڭ ەرەكشەلىگى – وندا تەك شەتەلدىك ازاماتتار عانا ويناي الادى.

بۇل تۋرالى Infohub.kz اقپارات اگەنتتىگى حابارلايدى.

جاڭا ويىن ايماقتارىنىڭ اشىلۋى

سەناتور امانگەلدى ەسبايدىڭ ايتۋىنشا، زاڭ جوباسى بويىنشا ويىن بيزنەسىن ورنالاستىرۋعا رۇقسات ەتىلگەن اۋماقتاردىڭ ءتىزىمى كەڭەيتىلەدى. بۇعان دەيىن تەك بۋراباي مەن قاپشاعايدا عانا رۇقسات ەتىلگەن بولسا، ەندى ماڭعىستاۋ، جەتىسۋ، الماتى جانە شىعىس قازاقستان وبلىستارىندا دا جاڭا ويىن ايماقتارى پايدا بولۋى مۇمكىن.

«بۇل جاڭا اۋماقتارداعى ويىن مەكەمەلەرىنە تەك شەتەلدىك ازاماتتاردىڭ كىرۋىنە عانا رۇقسات ەتىلەدى. بۇل – ماڭىزدى شەكتەۋ بولىپ تابىلادى»، - دەدى دەپۋتات.

تۋريزم سالاسىن دامىتۋ

زاڭناماعا ەنگىزىلەتىن وزگەرىستەر تۋريزم سالاسىن دامىتۋعا دا باعىتتالعان. ۆيزيت-سەنترلەر تۋريستىك نىساندار رەتىندە زاڭدى مارتەبەگە يە بولادى. ولاردى تۋريستىك باعىتتارعا ورنالاستىرۋ، سونداي-اق قۇرىلىس، رەكونسترۋكسيا جانە جابدىقتاۋ ءتارتىبى ايقىندالادى. بۇدان بولەك، حالىقارالىق تۇراقتى ەمەس جولاۋشىلار تاسىمالىن ۇيىمداستىراتىن تۋروپەراتورلارعا ارنالعان قۇجاتتاردى رەسىمدەۋ جانە مەملەكەتتىك شەكارادان وتۋگە رۇقسات بەرۋ راسىمدەرى جەڭىلدەتىلەدى.

سپورت جانە ءبىلىم سالاسىنداعى جاڭالىقتار

سونىمەن قاتار، قۇجاتتا «گيد»، «ەكسكۋرسوۆود»، «تۋريزم نۇسقاۋشىسى»، «تۋريستىك رەسۋرستار» جانە «تۋريستىك نىساندار» سياقتى نەگىزگى ۇعىمدار بىرىزدەندىرىلەدى. بۇل گيدتەر مەن نۇسقاۋشىلاردىڭ قىزمەتىن كاسىپكەرلىك فورماسىمەن شەكتەمەي، بىلىكتى ماماندار سانىن كوبەيتۋگە مۇمكىندىك بەرەدى.

بالالار مەن جاسوسپىرىمدەر سپورتىن قارجىلاندىرۋ جۇيەسىن رەفورمالاۋ دا كوزدەلگەن. اتاپ ايتقاندا، سپورتتى دامىتۋعا ارنالعان بيۋدجەتتەن تىس قاراجاتتى بولەتىن ءبىرىڭعاي وپەراتوردىڭ قارجىلىق ەسەپتىلىگىنە جىل سايىن اۋديت جۇرگىزۋ مىندەتتەلەدى. سونداي-اق، مەملەكەتتىك بالالار-جاسوسپىرىمدەر سپورت مەكتەپتەرىندە جان باسىنا شاققانداعى قارجىلاندىرۋ ءنورماتيۆى بەكىتىلەدى.

ايتا كەتەيىك، سەنات «تۋريستىك سالا مەن بالالار سپورتىن قولداۋ ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭدى ماقۇلدادى.