InfoHub Logo

قازاقستان ۇكىمەتى وتكەن جىلدىڭ قازان ايىندا كوممۋنالدىق قىزمەتتەرگە تاريفتەردى كوتەرۋگە موراتوريي جاريالاعان بولاتىن. بۇل شەكتەۋ بيىلعى جىلدىڭ ەكىنشى توقسانىندا، ياعني 1 ساۋىردە اياقتالادى. وسىعان بايلانىستى، حالىق اراسىندا ەلەكتر ەنەرگياسى، جىلۋ جانە سۋ باعاسىنىڭ كوتەرىلۋى مۇمكىن دەگەن الاڭداۋشىلىق تۋىندادى.

بۇل تۋرالى Infohub.kz اقپارات اگەنتتىگى حابارلايدى.

تاريفتەردى رەتتەۋ ماسەلەسى

تاريفتەردىڭ وزگەرۋىنە قاتىستى ماسەلەلەردى قازاقستان رەسپۋبليكاسى ۇلتتىق ەكونوميكا مينيسترلىگىنىڭ تابيعي مونوپوليالاردى رەتتەۋ كوميتەتى (كرەم) قارايدى. كوميتەتتەن حابارلاعانداي، تاريفتەردى وزگەرتۋ قاجەتتىلىك تۋىنداعان جاعدايدا قاراستىرىلادى. ءاربىر تابيعي مونوپوليا سۋبەكتىسى بويىنشا وزگەرىستەر جەكە-جەكە تالدانىپ، ولاردىڭ شىعىندارىن راستايتىن، ەكونوميكالىق نەگىزدەلگەن وتىنىمدەرى مەن سەبەپتەرى ەسكەرىلەدى.

تاريفتەردىڭ وزگەرۋ ديناميكاسى، وتىنىمدەردىڭ مازمۇنىنا، ينفراقۇرىلىمنىڭ جاي-كۇيىنە، سونداي-اق وڭىرلەردەگى الەۋمەتتىك-ەكونوميكالىق جاعدايعا بايلانىستى بولادى. سونىمەن قاتار، ۇكىمەت بەكىتكەن ينفلياسيالىق ءدالىز شەگىندە تاريفتەردىڭ وسۋىنە جول بەرىلەدى. بيىلعى جىلى بۇل كورسەتكىش 9-12 پايىز ارالىعىندا بولادى دەپ كۇتىلۋدە.

تاريفتەردىڭ قالىپتاسۋىنا اسەر ەتەتىن فاكتورلار

كوممۋنالدىق قىزمەتتەرگە ارنالعان تاريفتەر بىرنەشە فاكتورعا بايلانىستى قالىپتاسادى. ولارعا جانار-جاعارماي، گاز جانە ەلەكتر ەنەرگياسى باعاسىنىڭ ءوسۋى، ماتەريالدار مەن قىزمەتتەردىڭ قىمباتتاۋى، سالىقتار، تۇتىنۋشىلار سانى جانە كورسەتىلەتىن قىزمەت كولەمى جاتادى. سونداي-اق، جەلىلەردىڭ توزۋى، ولاردى جوندەۋ مەن جاڭعىرتۋعا كەتەتىن شىعىندار، جالاقىنىڭ ءوسۋى جانە ەلەكتر ەنەرگياسى مەن گاز باعاسىنىڭ جوعارىلاۋى دا ەسكەرىلەدى.

تاريفتەردى كوتەرۋ تۋرالى شەشىمدى كوممۋنالدىق كاسىپورىنداردىڭ ءوتىنىمى نەگىزىندە ۋاكىلەتتى ورگان قابىلدايدى. بۇل رەتتە ينفراقۇرىلىمنىڭ جاي-كۇيى، وڭىردەگى الەۋمەتتىك-ەكونوميكالىق احۋال جانە ينفلياسيالىق ءدالىز ەسەپكە الىنادى. تاريفكە تەك نەگىزدەلگەن جانە راستالعان شىعىندار عانا كىرەدى.

بۇعان دەيىن ەنەرگەتيكا ۆيسە-مينيسترى سۇڭعات ەسىمحانوۆ 1 ساۋىردەن باستاپ كوممۋنالدىق قىزمەتتەرگە تاريفتەردىڭ قالاي وسەتىنى تۋرالى سۇراققا جاۋاپ بەرگەندە، بۇل ماسەلەنىڭ ءالى تالقىلانىپ جاتقانىن جانە «ازىرگە ناقتى شەشىم جوق» ەكەنىن ايتقان بولاتىن.