InfoHub Logo

قازاقستاندا شەتەلدەن، اسىرەسە رەسەي، قىرعىزستان جانە وزبەكستاننان اكەلىنگەن تەلەفونداردى تىركەۋ قيىنداپ، جاپپاي بۇعاتتاۋلار ورىن الۋدا. بۇل جاعداي تۇتىنۋشىلار مەن ساتۋشىلاردىڭ نارازىلىعىن تۋدىرىپ وتىر.

بۇل تۋرالى Infohub.kz اقپارات اگەنتتىگى حابارلايدى.

تەلەفونداردى تىركەۋدەگى قيىندىقتار

ساتۋشىلاردىڭ ايتۋىنشا، تەلەفونداردى تىركەۋ كەزىندە IMEI كودتارىن جۇيە قابىلداماي قويعان. بۇل تەك جاڭا قۇرىلعىلارعا عانا ەمەس، 4-5 جىل بۇرىن ساتىلعان تەلەفوندارعا دا قاتىستى بولىپ وتىر.

«كليەنتتەر دە، ءبىز ءوزىمىز دە اقشامىزعا العان قۇرىلعىلاردى پايدالانا المايمىز. تەكسەرۋ فورمالدى تۇردە تەگىن بولعانىمەن، پروسەسس كۇردەلى. سوندىقتان ادامدار تىركەۋدەن ءوتۋ ءۇشىن باسقالارعا 30-50 مىڭ تەڭگە تولەۋگە ءماجبۇر. ءقازىر ءتىپتى زاڭ قابىلدانعانعا دەيىن ساتىپ الىنعان سمارتفوندار دا جۇمىسىن توقتاتتى»، - دەيدى ساتۋشى انەل ەرعازينوۆا.

جاڭا تالاپتار مەن ونىڭ سالدارى

كاسىپكەرلەردىڭ سوزىنشە، جاڭا نورما ەنگىزىلگەننەن كەيىن ەكىنشى ءنومىردى ورناتقان كەزدە جۇيە تەكسەرۋدى تالاپ ەتەدى. ولسىز قۇرىلعى «سۇر تىزىمگە» ەنىپ، ءبىر ايدان سوڭ بۇعاتتالادى. مۇنداي ماسەلەگە تاپ بولعان ساتىپ الۋشىلار كىمگە جۇگىنەرىن بىلمەي دال بولۋدا.

كومپانيا جاۋابى

قازاقستاندا تەلەفونداردى تىركەۋمەن جەكە «ATS Mediafon KZ» ج ش س اينالىسادى. الايدا، كاسىپكەرلەر تىركەۋگە ءوتىنىم قابىلدايتىن سايتتىڭ دۇرىس جۇمىس ىستەمەيتىنىن ايتادى. كومپانيا وكىلى بۇل پىكىرمەن كەلىسپەيدى.

«تەلەفوننىڭ شىققان ەلىنە بايلانىستى بۇعاتتاۋ بولمايدى. قۇرىلعىنىڭ زاڭدى تۇردە اكەلىنگەنىن راستايتىن قۇجاتتار بىزگە جەتكىلىكتى. ەگەر تەلەفوندار تالاپتارعا سايكەس اكەلىنىپ، رەسىمدەلسە، ولار ەش قيىندىقسىز تەكسەرۋدەن وتەدى. كەدەندىك تىركەۋسىز جانە قاجەتتى تولەمدەرسىز اكەلىنگەندەر تىركەلمەيدى. جەكە تۇلعالار ءۇشىن تىركەۋ تەگىن، ال كاسىپكەرلەر ءبىر قۇرىلعى ءۇشىن 4325 تەڭگە تولەيدى»، - دەيدى ج ش س كوممەرسيالىق ديرەكتورى ءمادي شەرىم.

كومپانيا كاسىپكەرلەرمەن ديالوگقا دايىن ەكەنىن مالىمدەدى. ال ساتۋشىلار تىركەۋمەن مەملەكەت اينالىسۋىن تالاپ ەتۋدە.