InfoHub Logo

الەۋمەتتىك جەلىدە، اسىرەسە Threads پلاتفورماسىندا الماتى قالاسى بويىنشا "ازاماتتاردىڭ الەۋمەتتىك-ەكونوميكالىق مارتەبەسىنىڭ شكالاسى" دەپ اتالاتىن كەستە قىزۋ تالقىعا ءتۇستى. بۇل كەستەدە تابىس دەڭگەيىنە قاراي ادامداردى ءارتۇرلى ساناتتارعا – از قامتىلعانداردان باستاپ مۋلتيميلليونەرلەرگە دەيىن بولەدى.

بۇل تۋرالى Infohub.kz اقپارات اگەنتتىگى حابارلايدى.

كەستەگە سايكەس، ايىنا 250 مىڭ تەڭگەگە دەيىن تابىس تاباتىندار "از قامتىلعاندار" ساناتىنا جاتقىزىلسا، 250 مىڭنان 450 مىڭ تەڭگەگە دەيىن الاتىندار "كەدەيلەر" دەپ اتالعان. ال 650 مىڭنان 1 ميلليون تەڭگە ارالىعىنداعى تابىس "ورتا تاپ" دەپ بەلگىلەنگەن.

ودان جوعارى، 5-تەن 15 ميلليون تەڭگەگە دەيىنگى تابىس يەلەرى "ميلليونەرلەر"، ال 15-تەن 100 ميلليون تەڭگەگە دەيىن الاتىندار "مۋلتيميلليونەرلەر" دەپ سيپاتتالعان.

رەسمي كلاسسيفيكاسيا بار ما؟

بۇل جازبا جەلىدە تەز تاراپ، قولدانۋشىلار اراسىندا رەسمي تۇردە مۇنداي جىكتەۋ بار-جوعى تۋرالى پىكىرتالاس تۋدىردى. وسىعان بايلانىستى، ق ر ەڭبەك جانە حالىقتى الەۋمەتتىك قورعاۋ مينيسترلىگىنە رەسمي ساۋال جولداندى.

ۆەدومستۆونىڭ مالىمەتىنشە، مينيسترلىك دەڭگەيىندە ازاماتتاردىڭ الەۋمەتتىك-ەكونوميكالىق مارتەبەسىن (مىسالى، "از قامتىلعان"، "كەدەي"، "وتپەلى كلاسس" جانە ت.ب.) ناقتى تابىس شەكتەرىمەن رەسمي بەكىتىلگەن شكالا جوق. بۇل الماتى قالاسىنا دا قاتىستى.

الەۋمەتتىك قولداۋ قالاي انىقتالادى؟

مينيسترلىك وكىلدەرىنىڭ ايتۋىنشا، ازاماتتاردىڭ مۇقتاجدىعىن باعالاۋ جانە بەلگىلى ءبىر الەۋمەتتىك قولداۋ تۇرلەرىن تاعايىنداۋ ءۇشىن وتباسىنىڭ (ادامنىڭ) الەۋمەتتىك ءال-اۋقاتىن انىقتاۋ ادىستەمەسى قولدانىلادى. بۇل ادىستەمە وتباسىنىڭ جاعدايىن كەشەندى باعالاۋدى قامتيدى. ەسەپتەۋ كەزىندە تەك تابىس قانا ەمەس، سونىمەن قاتار قارىزدار، مۇلىكتىڭ بولۋى، بالالار سانى، دەنساۋلىق جاعدايى جانە باسقا دا الەۋمەتتىك-ەكونوميكالىق فاكتورلار ەسكەرىلەدى.

دەمەك، قازاقستاندا ازاماتتاردى تەك تابىس دەڭگەيى بويىنشا قارجىلىق مارتەبەگە ءبولۋدىڭ ءبىرىڭعاي رەسمي كەستەسى جوق. الايدا، ۇلتتىق ستاتيستيكا بيۋروسى توقسان سايىن حالىقتى تابىسىنا قاراي 10 تەڭ توپقا بولەدى. ءبىرىنشى توپ – ەڭ تومەنگى تابىسى بار حالىقتىڭ ون پايىزى، سوڭعى توپ – ەڭ جوعارى تابىسى بار حالىقتىڭ ون پايىزى.