InfoHub Logo

قازاقستاننىڭ 11 قالاسىندا 2025 جىلى اۋا ساپاسىنىڭ ناشارلاۋى تىركەلدى. ەكولوگيا مينيسترلىگىنىڭ حابارلاۋىنشا، بۇل جاعدايعا زاۋىتتار ەمەس، اۆتوكولىكتەر، جەكە سەكتور جانە شاعىن بيزنەس سەبەپ بولىپ وتىر.

بۇل تۋرالى Infohub.kz اقپارات اگەنتتىگى حابارلايدى.

الماتىداعى جاعداي

«قازگيدرومەتتىڭ» مالىمەتىنشە، ەڭ كۇردەلى احۋال الماتى، وسكەمەن، قاراعاندى، تەمىرتاۋ جانە اقتوبە قالالارىندا بايقالعان. مىسالى، الماتىداعى لاستانۋدىڭ 60%-ى كولىكتەردەن، ال 12%-ى جەكە ۇيلەر مەن شاعىن قازاندىقتاردان شىعادى.

«لاستانۋدىڭ ايتارلىقتاي ۇلەسى شاعىن كوزدەرگە – اۆتوكولىكتەرگە، جەكە سەكتورعا جانە شاعىن بيزنەس نىساندارىنا تيەسىلى»، – دەپ حابارلادى ۆەدومستۆو.

جاڭا ەكولوگيالىق شارالار

مينيسترلىك اكىمدىكتەرگە بەيجىڭنىڭ تاجىريبەسىن ەسكەرە وتىرىپ، 2026–2028 جىلدارعا ارنالعان جاڭا ەكولوگيالىق شارالاردى پىسىقتاۋدى تاپسىردى. جوسپاردا جەكە سەكتوردى گازداندىرۋ، قازاندىقتار مەن كافەلەردە قاتتى وتىن قولدانۋعا تىيىم سالۋ، كولىكتى ەلەكتر ەنەرگياسى مەن گازعا كوشىرۋ، ونەركاسىپ ايماقتارىنىڭ اينالاسىنا جاسىل بەلدەۋلەر قۇرۋ جانە قالالاردى ەكولوگيالىق ايماقتارعا ءبولۋ قاراستىرىلعان.

بۇعان دەيىنگى جاعدايلار

بۇعان دەيىن وسكەمەن قالاسىن ۋلى تۇمان باسىپ، حالىقتىڭ دەنساۋلىعىنا زيان كەلتىرگەنى تۋرالى حابارلانعان بولاتىن. اقپان ايىنىڭ باسىندا كۇكىرتسۋتەك، كۇكىرت ديوكسيدى جانە كومىرتەگى توتىعى بويىنشا نورمادان اسۋلار تىركەلدى. ادامدار كوشەگە مەديسينالىق ماسكالارمەن، ءتىپتى گازتۇتقىشتارمەن شىقتى.

الماتىداعى جاعداي دا ءماز ەمەس. «Almaty Air Initiative» ەكولوگيالىق قورىنىڭ حابارلاۋىنشا، الماتىدا ءبىر جىل ءومىر ءسۇرۋ دەنساۋلىققا زياندىلىعى بويىنشا ءبىر جىلدا 518 تەمەكى شەككەنمەن تەڭ (كەيبىر اۋدانداردا ءتىپتى 700–800 تەمەكىگە دەيىن).