InfoHub Logo

ەلىمىزدەگى ميلليونداعان ازاماتتارعا ءومىر بويىنا قوسىمشا زەينەتاقى تولەمدەرىن الۋعا مۇمكىندىك تۋدى. بۇل تۋرالى قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگى مالىمدەدى.

بۇل تۋرالى Infohub.kz اقپارات اگەنتتىگى حابارلايدى.

جۇمىس بەرۋشىنىڭ مىندەتتى زەينەتاقى جارناماسى (جمزج)

ۆەدومستۆونىڭ حابارلاۋىنشا، قىزمەتكەردىڭ مۇددەسىن قورعاۋداعى نەگىزگى قۇرال – جۇمىس بەرۋشىنىڭ مىندەتتى زەينەتاقى جارناماسى (جمزج) بولىپ تابىلادى. بۇل جارنامانىڭ باستى ەرەكشەلىگى – ازاماتتاردىڭ بولاشاق زەينەتكەرلىك جاسىنا ارنالعان قاراجات كومپانيالاردىڭ ءوز ەسەبىنەن اۋدارىلادى، ياعني قىزمەتكەردىڭ اعىمداعى تابىسى ازايتىلمايدى.

«بۇل نورما ءاربىر جۇمىس ىستەيتىن قازاقستاندىقتىڭ، اسىرەسە جاس ۇرپاقتىڭ سەنىمدى قارجىلىق قورجىنى بولۋى ءۇشىن ەنگىزىلدى. ەندى بولاشاق زەينەتاقى ءۇش كوزدەن قۇرالادى: مەملەكەتتىك بازالىق تولەم، ءبىرىڭعاي جيناقتاۋشى زەينەتاقى قورىنداعى (بجزق) جەكە جيناقتار جانە جۇمىس بەرۋشىدەن قوسىمشا «شارتتى-جيناقتاۋشى» كومپونەنت»، - دەپ ءتۇسىندىردى مينيسترلىك.

كىمدەرگە ارنالعان؟

بۇل ءتاسىل قىزمەتكەرگە ءومىر بويىنا قوسىمشا تولەمدەر الۋعا كەپىلدىك بەرەدى. بۇل اسىرەسە 1975 جىلعى 1 قاڭتاردان كەيىن تۋعان ازاماتتار ءۇشىن ماڭىزدى، سەبەبى ولاردىڭ زەينەتاقى كاپيتالى تىكەلەي اۋدارىمداردىڭ تۇراقتىلىعىنا جانە جۇيەگە قاتىسۋىنا بايلانىستى بولادى.

«2026 جىلى مۇنداي جارناما مولشەرلەمەسى قىزمەتكەر تابىسىنىڭ 3،5 پايىزىن قۇرايدى. جۇيە كەزەڭ-كەزەڭىمەن ەنگىزىلىپ، 2028 جىلعا قاراي 5 پايىزدىق نىسانالى كورسەتكىشكە جەتەدى»، - دەلىنگەن مينيسترلىكتىڭ حابارلاماسىندا.

قارجىلاندىرۋ جانە تيىمدىلىك

ۆەدومستۆونىڭ مالىمەتىنشە، بۇل تەتىكتىڭ تيىمدىلىگى بيىلعى جىلدىڭ ناتيجەلەرىمەن راستالىپ وتىر. 1 ساۋىردەگى جاعداي بويىنشا جۇمىس بەرۋشىلەر 5،8 ميلليون قازاقستاندىقتى قوسىمشا زەينەتاقى قۇقىقتارىمەن قامتاماسىز ەتتى. جىل باسىنان بەرى ولاردىڭ پايداسىنا 951 ميلليارد تەڭگە اۋدارىلدى.

سونىمەن قاتار، مەملەكەت تاراپىنان مۇددەلەر تەڭگەرىمى ساقتالعان. بيزنەس ءۇشىن سالماق قولايلى دەڭگەيدە قالادى. سالىق كودەكسىنە سايكەس، جمزج تولەمى بويىنشا كومپانيالاردىڭ بارلىق شىعىندارى سالىق سالىناتىن تابىستان شەگەرىمگە جاتقىزىلادى. بۇل جۇمىس بەرۋشىلەردى اشىق الەۋمەتتىك ساياسات جۇرگىزۋگە جانە ءوز ۇجىمىنا قامقورلىق جاساۋعا ىنتالاندىرادى.