InfoHub Logo

اقش قازاقستانعا رەسەيلىك مۇنايدى قىتايعا ترانزيتتەۋگە رۇقسات بەرگەن ليسەنزيانى 2027 جىلدىڭ ناۋرىزىنا دەيىن ۇزارتتى. بۇل تۋرالى Bloomberg اگەنتتىگى حابارلادى.

بۇل تۋرالى Infohub.kz اقپارات اگەنتتىگى حابارلايدى.

ترانزيت جالعاسادى

اقش قارجى مينيسترلىگىمەن كەلىسسوزدەر جۇرگىزگەننەن كەيىن بۇل رۇقسات 2027 جىلدىڭ 19 ناۋرىزىنا دەيىن ۇزارتىلدى. بۇل ليسەنزيا قازاقستانعا جاھاندىق مۇناي نارىعىنداعى تۇراقسىزدىققا قاراماستان، رەسەيلىك مۇناي كولەمىن قىتايعا تاسىمالداۋدى جالعاستىرۋعا مۇمكىندىك بەرەدى.

بۇعان دەيىنگى رۇقسات بيىل ساۋىرگە دەيىن جارامدى بولعان ەدى. قازىرگى تاڭدا قازاقستان جىلىنا شامامەن 10 ميلليون توننا رەسەيلىك مۇنايدى قىتايعا ترانزيتتەيدى. بۇل تاۋلىگىنە شامامەن 200 مىڭ باررەلدى قۇرايدى. تاراپتار بۇل كولەمدى جىلىنا 12،5 ميلليون تونناعا دەيىن ارتتىرۋ مۇمكىندىگىن تالقىلاپ جاتىر.

قازاقستان ءۇشىن ماڭىزى

مۇناي-گاز سالاسىنىڭ ساراپشىسى اسقار يسمايلوۆتىڭ ايتۋىنشا، اقش-تىڭ ارنايى ليسەنزياسىنسىز رەسەيلىك مۇناي ترانزيتىنە تىيىم سالىنار ەدى. 2025 جىلى «روسنەفت» سانكسياعا ىلىككەننەن كەيىن، ونىمەن كەز كەلگەن وپەراسيالار، سونىڭ ىشىندە قازاقستان مەن «قازترانسويل» ءۇشىن دە تاۋەكەلدى بولدى.

وتكەن جىلدىڭ قاراشا ايىندا قازاقستان ەنەرگەتيكا مينيسترلىگى اقش-قا مۇناي ءترانزيتىن ساقتاپ قالۋ ءۇشىن ارنايى رۇقسات سۇراپ جۇگىنگەن بولاتىن. الدىمەن ونى 2026 جىلدىڭ ساۋىرىنە دەيىن بەرگەن، ەندى ۇزارتىلدى.

«بۇل قازاقستانعا نە بەرەدى؟ ترانزيتتەلەتىن مۇناي كولەمى جىلىنا شامامەن 10 ميلليون توننانى قۇرايدى. ءقازىر 12،5 ميلليون تونناعا دەيىن ءوسۋى تالقىلانۋدا. «قازترانسويل» بۇدان جىلىنا 150-190 ميلليون دوللار تابىس تابادى. ال اقش ءۇشىن بۇل مۇناي باعاسىنىڭ ءوسۋىن تەجەۋدىڭ تاعى ءبىر قۇرالى بولىپ تابىلادى، ويتكەنى نارىق قوسىمشا مۇناي كولەمىمەن قامتاماسىز ەتىلەدى»، - دەپ ءتۇسىندىردى يسمايلوۆ.