InfoHub Logo

قازاقستاننىڭ بولاشاعى – قازاق تىلىندە

ساباقتىڭ ماقساتى:
1. مەملەكەتتىك ءتىل - قازاق ءتىلىن قۇرمەتتەۋ، ءوز بەتىمەن ىزدەنۋ جۇمىستارىن جۇرگىزە بىلۋگە، ءوز ويىن اشىق ايتۋعا ۇيرەتۋ.
2. قىزىعۋشىلىقتارىن ارتتىرا وتىرىپ، تىڭداۋ قابىلەتتەرىن دامىتۋ؛
3. قازاقستاندىق ءپاتريوتيزمدى قالىپتاستىرۋ، ءوز انا – ءتىلىن سۇيە بىلۋگە، ماقتان تۇتۋعا تاربيەلەۋ.
ءتۇرى: پىكىرسايىس

بارىسى:
سايىسىمىزدىڭ ەرەجەلەرىمەن بولىمدەرىمەن تانىستىرىپ وتەيىن.
سايىسىمىزدىڭ بولىمدەرى:
ءى. كىرىسپە
1. ەكى فراكسيادا ءۇش سپيكەردەن بولادى.
2. ەكى فراكسيانىڭ سپيكەرلەرى وزدەرىن تانىستىرادى.
ءىى. نەگىزگى ءبولىم
1. نەگىزگى كەزەڭ بۇندا سپيكەرلەر ارگۋمەنتپەن (دالەلدەمەلەرمەن) مىسالدار، ستاتيستيكالىق مالىمەتتەرمەن تانىستىرادى.
2. ەكى فراكسيانىڭ ۇسىنىستارىمەن قوسىمشالارى.
3. ەكى فراكسيا ءبىر - بىرىنە سۇراق قويادى.
ءىىى. قورىتىندى
1. ساراپشىلار وزدەرىنىڭ ساراپتامالارىن ايتادى. تورەشىلەر ەكى فراكسيانىڭ سايىستا جيناعان ساراپتامالىق داۋىستارىن جاريالايدى.
2. قورىتىندى.

سايىسىمىزدىڭ ەرەجەسى:
1. بوس ايتىس، تارتىستان اۋلاق بولۋ
2. سىپايى سويلەۋ.
3. مىسقىل سۇراقتار قويۋعا بولمايدى.
4. قارما - قارسى سۇراقتارعا بەرىلگەن ۋاقىتتى ءتيىمدى پايدالانۋ.
5. قوسىمشا قويىلاتىن سۇراقتارعا دايىن بولۋ شارت.
6. جەڭىلسەڭ باسقالاردان كورمە، كەمشىلىكتى وزىڭنەن ىزدە.

ءمۇعالىم: ءتىل ادامداردىڭ قارىم – قاتىناس جاساۋىنىڭ مادەني دامۋىنىڭ قۇرالى. ءتىل مادەنيەتى – سويلەۋدەگى سىپايىلىق قانا ەمەس، سونىمەن قاتار اقىن ويلىلىق، سويلەۋ ونەرىنە شىنىققاندىق، ساۋاتتىلىق.
جۇرگىزۋشى: ەندەشە ءبىرىنشى بولىمگە كەزەك بەرەيىك. تانىستىرۋ ۋاقىتتارىڭىز - 1 - مينۋت
جاقتاۋشى جاقتىڭ سپيكەرى:(پاراسات توبى) – وتەپوۆا ەلنارا، كەنجەعالييەۆ تاڭات، سارييەۆا گۇلناز.
قارسى جاقتىڭ سپيكەرى: (اقيقات توبى)- حايرۋشيەۆا اسەمگۇل، اكيشيەۆ اباي، اباتوۆا ارشات.
جۇرگىزۋشى: قارسىلاستار وزدەرىن تانىستىرىپ بولعان سىڭايلى، ەندى نەگىزگى كەزەڭگە كەزەك بەرسەك دەيمىز. وقۋشىلار بۇل كەزەڭدە ءوز پىكىرلەرىن ايتادى، ولاردى دالەلدەيدى، كەرەكتى فاكتىلەر، مىسالدار، ستاتيستيكالىق مالىمەتتەر كەلتىرەدى. جاقتاۋشى مەن قارسى داتتاۋشى توپتاردىڭ سپيكەرلەرى ءار دالەل بويىنشا كەزەكپەن - كەزەك سويلەيدى. ۋاقىتتارىڭىز شەكتەۋلى - 2 مينۋت.

1 – سپيكەر (پاراسات):
ءبىزدىڭ قارارىمىز: انا ءتىلىن قۇرمەتتەمەۋ – انا ءسۇتىن اقتاماۋ.
انىقتاۋىمىز بويىنشا: ءوزىنىڭ انا ءتىلى، ۇلتتىق مادەنيەتى جوق ەل ەشقاشان دا ەگەمەندى بولا المايدى.
دالەلدەۋ: ءتىل – ءتىلىمنىڭ تىرەگى. مۇنداي تەڭەۋ تەك ادامدىق پارىزدان عانا تۋىنداپ قويماي، ول مەملەكەت الدىنداعى قارىزدان دا تۋىندايدى.
ياعني، مەملەكەتتىڭ كەز كەلگەن ازاماتى سول ەلدىڭ كوركەيۋىنە، ءوسىپ – وركەندەۋىنە، وركەنيەتتى ەلدەر قاتارىنا قوسىلۋىنا ايانباي قىزمەت ەتۋ كەرەك. ءوز ءتىلىن وشىرمەۋگە، وشىرگەندى كوشىرمەۋگە شاقىرعان ۇندەۋ، انانىڭ اق سۇتىمەن دارىعان تۋعان تىلىمىزگە مەنسىنبەۋشىلىك تانىتقانداردى كەشىرۋ وسكەلەڭ ۇرپاق الدىندا اعاتتىق ەكەنىن اڭعارتسا كەرەك. انا ءتىلىن قۇرمەتتەمەۋ – انا ءسۇتىن اقتاماۋمەن پارا - پار. ءسوزىمدى قۇرمەن مالدىبايەۆتىڭ ولەڭ جولدارىمەن قورىتقىم كەپ تۇر:

جەتە المادىم ۇشىعىنا قيالدىڭ،
ۇلت تاعدىرىن مەن ەسىمە ءجيى الدىم.
قازاق ءتىلىن قازاق ۇقپاي تۇرعاندا،
بوگدە جۇرتتان بەتىم كۇيىپ ۇيالدىم.

1 - سپيكەر: (اقيقات):
ارگۋمەنت: انا ءسۇتىن اقتاۋ – انا ءۇمىتىن اقتاۋ.
انىقتاۋىمىز بويىنشا: زامانىنا قاراي - ادامى
انا ءتىلىن قۇرمەتتەمەۋ – انا ءسۇتىن اقتاماۋ دەگەن ويىڭىزبەن كەلىسپەيمىن. انا ءتىلىن مەڭگەرمەگەن، زامان تالابىنا ساي – اعىلشىن ءتىلى باسىم ءتۇسىپ، جۇمىس ورىندارىنان سۇراپ جاتسا، ۇيالۋ دەگەندى ۇمىتىپ، اعىسقا قاراي بەيىمدەلەسىڭ. انا ءسۇتىن اقتاۋ دەگەن – انا ءۇمىتىن اقتاۋ. تابىسى مول – جاقسى جۇمىس بولسا بولدى دەپ ويلايتىندار قانشاما. قازاق ءتىلىن بىلمەيتىن ادامدار ءۇشىن بولاشاق جوق دەپ ايتۋعا بولمايدى. نەگە دەسەڭىز، مەملەكەتتىك ءتىلدى بىلمەي، جەتىك مەڭگەرمەي لاۋازىمدى ورىنداردا تالاي ادامدار وتىر.