InfoHub Logo

قازاقستاننىڭ ەكىنشى اتوم ەلەكتر ستانسياسى (اەس) بالقاش ماڭىندا سالىناتىنى بەلگىلى بولدى. بۇل تۋرالى اتوم ەنەرگياسى اگەنتتىگىنىڭ ءتوراعاسى الماسادام ساتقالييەۆ مالىمدەدى. ونىڭ ايتۋىنشا، جوبانىڭ جۇمىس اتاۋى – اەس «مويىنقۇم».

بۇل تۋرالى Infohub.kz اقپارات اگەنتتىگى حابارلايدى.

جوبانىڭ ەگجەي-تەگجەيى

الماسادام ساتقالييەۆتىڭ سوزىنشە، قازىرگى تاڭدا بالقاش وڭىرىندە ءۇش پەرسپەكتيۆالى الاڭ قاراستىرىلۋدا. «ەكىنشى ستانسيا بويىنشا شەشىم قابىلداندى. ول دا بالقاش ماڭىندا ورنالاسادى. ءقازىر ءۇش الاڭ زەرتتەلىپ جاتىر. قاراستىرۋ ناتيجەسىندە ناقتى ورنالاساتىن جەرى تۋرالى حابارلايمىز»، - دەدى اگەنتتىك باسشىسى.

جوبانىڭ جۇمىس اتاۋى – اەس «مويىنقۇم». جاڭا اەس ءارقايسىسىنىڭ قۋاتتىلىعى 1200 مەگاۆاتت بولاتىن ەكى ەنەرگوبلوكتان تۇرادى دەپ كۇتىلۋدە.

تەحنولوگيا جەتكىزۋشىسى انىقتالۋدا

اگەنتتىك باسشىسىنىڭ ايتۋىنشا، تەحنولوگيا جەتكىزۋشىنى تاڭداۋ بويىنشا الەۋەتتى سەرىكتەستەرمەن كەلىسسوزدەر جۇرگىزىلۋدە. ول قىتايدىڭ China National Nuclear Corporation كومپانياسى باسىم سەرىكتەس رەتىندە قاراستىرىلاتىنىن ەسكە سالدى.

ەستەرىڭىزگە سالا كەتەيىك، وتكەن جىلدىڭ كۇزىندە قازاقستاندا ءبىرىنشى اەس-تىڭ اتاۋى انىقتالعان بولاتىن. ازاماتتاردان تۇسكەن ۇسىنىستاردىڭ باسىم كوپشىلىگىن العان «بالقاش» اتوم ەلەكتر ستانسياسى» اتاۋى بايقاۋ كوميسسياسىنىڭ قورىتىندى وتىرىسىنان كەيىن جەڭىمپاز دەپ تانىلدى.

بۇعان دەيىن 2050 جىلعا دەيىن قازاقستاندا كەمىندە ءۇش اەس پايدالانۋعا بەرۋ جوسپارلانعانى حابارلانعان بولاتىن. سونىمەن قاتار، ءتورتىنشى ستانسيانىڭ قۇرىلىسى بويىنشا جوبانى ىسكە اسىرۋ كوزدەلگەن.

مەملەكەت باسشىسىنىڭ باستاماسى

2025 جىلدىڭ ناۋرىز ايىندا مەملەكەت باسشىسى قاسىم-جومارت توقايەۆ ۇلتتىق قۇرىلتاي وتىرىسىندا قازاقستانعا ءبىر ەمەس، ءۇش اەس سالۋ ستراتەگيالىق ماڭىزدى ەكەنىن مالىمدەگەن ەدى. پرەزيدەنت الداعى ونداعان جىلدار بويى ەكونوميكالىق دامۋدىڭ بەرىك نەگىزىن قامتاماسىز ەتەتىن جاڭا ەنەرگەتيكا سالاسىن قۇرۋ قازاقستان ءۇشىن ستراتەگيالىق ماڭىزدى ەكەنىن اتاپ ءوتتى.

2025 جىلدىڭ شىلدەسىندە ءبىرىنشى ۆيسە-پرەمەر رومان سكليار قازاقستانداعى ەكىنشى جانە ءۇشىنشى اەس-تى قىتايلىق تاراپ سالاتىنىن حابارلاعان بولاتىن.