Photo: Pixabay (https://www.pexels.com/@pixabay) / Pexels
قازاقستاننىڭ جاس فۋتبولشىلارى وزبەكستانمەن قولا جۇلدە ءۇشىن تالاسادى
17 جاسقا دەيىنگى قازاقستان جاسوسپىرىمدەر قۇراماسى مينسكىدەگى «دامۋ كۋبوگى» حالىقارالىق تۋرنيرىندە توپتىق كەزەڭدى ءساتتى اياقتاپ، قولا جۇلدە ءۇشىن تالاسقا شىعادى. كوماندا توپتاعى سوڭعى ويىنىندا تاجىكستاندى 3:1 ەسەبىمەن تىزە بۇكتىرىپ، ا توبىندا ەكىنشى ورىندى يەلەندى.
بۇل تۋرالى Infohub.kz اقپارات اگەنتتىگى حابارلايدى.
تۋرنيردەگى جول
تاجىكستانمەن وتكەن كەزدەسۋدە العاشقى مينۋتتا گول جىبەرىپ قويعانىنا قاراماستان، قازاقستاندىقتار رۋحتارىن تۇسىرمەدى. ويىننىڭ ءبىرىنشى تايمىندا قفا اكادەمياسىنىڭ ويىنشىسى انۋار تولەندى ەسەپتى تەڭەستىردى (1:1). ماچ تەڭ اياقتالادى دەپ تۇرعاندا، ويىننىڭ سوڭعى بەس مينۋتىندا «قايراتتىڭ» ويىنشىسى يسلام راقىم كومانداسىن العا شىعاردى. ال ويىننىڭ اياعىندا ونىڭ ارىپتەسى رومان چەرنومورەس تاعى ءبىر گول سوعىپ، كوماندانىڭ جەڭىسىن نىعايتتى.
توپتاعى ورنىمىز
قازاقستان قۇراماسى توپتاعى ەكى ويىندا دا 3:1 ەسەبىمەن تاجىكستاندى جانە مينسكىنى جەڭىپ، ال بەلارۋس قۇراماسىنان 0:2 ەسەبىمەن ۇتىلىپ قالدى. وسىلايشا، باۋىرجان ساعاندىقتىڭ شاكىرتتەرى ا توبىندا ەكىنشى ورىندى يەلەندى.
قولا ءۇشىن تارتىس
ءتۋرنيردىڭ سوڭعى كۇنىندە ءبىزدىڭ كوماندا ۆ توبىندا ەكىنشى ورىن العان وزبەكستان قۇراماسىمەن قولا مەدال ءۇشىن كەزدەسەدى. ال التىن جۇلدە ءۇشىن بەلارۋس پەن رەسەي قۇرامالارى تالاسادى. بەسىنشى ورىن ءۇشىن تاجىكستان مەن ءازىربايجان، جەتىنشى ورىن ءۇشىن مينسك پەن بەلارۋس (U16) كوماندالارى سىنعا تۇسەدى.
«دامۋ كۋبوگى» – جاس تالانتتارعا الاڭ
«دامۋ كۋبوگى» ءتۋرنيرى 2005 جىلدان بەرى جىل سايىن مينسكىدە ءوتىپ كەلەدى. قازاقستاندىق فۋتبولشىلار بۇل تۋرنيرگە بيىل جەتىنشى رەت قاتىسىپ وتىر. بۇعان دەيىن 2021 جانە 2023 جىلدارى كوماندا ەكىنشى ورىندى يەلەنگەن بولاتىن.
ەۋروپا چەمپيوناتىنا دايىندىق
بۇل تۋرنير – قازاقستاننىڭ 17 جاسقا دەيىنگى قۇراماسىنىڭ ەۋروپا چەمپيوناتىنىڭ ىرىكتەۋ كەزەڭىنە دايىندىعىنىڭ ءبىر بولىگى. ءساۋىر ايىنىڭ سوڭىندا جاس فۋتبولشىلارىمىز دانيا، چەحيا جانە اۆستريا قۇرامالارىمەن بىرگە ەۋروپا چەمپيوناتىنا جالعىز جولدامانى ساراپقا سالادى. وتكەن جىلى قازاقستاندىقتار العاش رەت ىرىكتەۋدىڭ ەكىنشى كەزەڭىنە شىققان بولاتىن.
ەۋروپانىڭ ۇزدىك 8 جاسوسپىرىمدەر (U17) قۇراماسى قاتىساتىن فينالدىق كەزەڭ 25 مامىر مەن 7 ماۋسىم ارالىعىندا ەستونيادا وتەدى.
-
كازاحستانسكيە سپورتسمەنى زاۆەرشيلي سوريەۆنوۆانيا نا وليمپيادە ۆ يتاليي، زاۆويەۆاۆ ودنۋ زولوتۋيۋ مەدال.
-
بريتانسكايا كومپانيا Ashmore Group سوۆمەستنو س كازاحستانسكيمي پارتنەرامي پوسترويت منوگوپروفيلنۋيۋ كلينيكۋ، كوتورايا ستانەت مەديسينسكيم حابوم سەنترالنوي ازيي.
