InfoHub Logo

اقىن تاناگوز تولقىن قىزى قازاق قوعامىنداعى رۋحاني قۇندىلىقتاردىڭ جوعالۋىنا الاڭداۋشىلىق ءبىلدىرىپ، الەۋمەتتىك جەلىدەگى پاراقشاسىندا ءوزىنىڭ وتكىر ويىن ورتاعا سالدى. ونىڭ پىكىرىنشە، قازىرگى قازاقتار تاۋەلسىزدىگىن ساقتاپ قالۋدان قاۋىپتەنۋى ءتيىس.

بۇل تۋرالى Infohub.kz اقپارات اگەنتتىگى حابارلايدى.

ۇلتتىق سانانىڭ تومەندەۋىنە الاڭداۋشىلىق

اقىننىڭ ايتۋىنشا، قازىرگى قازاق قوعامىنداعى كەيبىر جاعىمسىز كورىنىستەر ۇلتتىڭ بولاشاعىنا ءقاۋىپ توندىرەدى. ول مۇنى بىلايشا سيپاتتايدى:

«قازاقتار تاۋەلسىزدىگىن ساقتاپ قالا المايدى. سەبەبى، ءبىز ساپاسىز ۇلتقا اينالىپ بارامىز. ءپرينسيپى جوق، نادان ۇلت قالىپتاستى. جاعىمپاز، وتىرىكشى، ەكىجۇزدى، ساتقىن، نامىسسىز، فەيك، پسيەۆدو ۇلت بولىپ بارامىز. ءوز تىلىندە سويلەمەيدى. قۇلدىق سانا ەتىمىزدەن ءوتىپ، سۇيەگىمىزگە جەتكەن. ەشكىمگە ەشتەڭە كەرەك ەمەس. قورقاق، ماقتانشاق، داراقى، كريتيكالىق ويلاۋدان جۇردايمىز. بەيعام، جايباراقات ءومىر ءسۇرىپ جاتىرمىز. باسىمىزعا كىم كورىنگەن اياعىن ءسۇرتىپ كەتە بەرەدى. ءالسىز، قاۋقارسىز، دارمەنسىز حالىققا اينالدىق. بىر-بىرىمىزگە قايىرىمسىز، تاسباۋىرمىز. ءبىر-بىرىمىزدى ءيتتىڭ ەتىنەن جەك كورەمىز.

ءوزىمىزدى-وزىمىز توناپ، ءوز تامىرىمىزدان اجىراعان توبىرعا اينالدىق. ۇرى ۇلت بولىپ بارامىز. بۇل – قازىرگى ءبىزدىڭ باستى قاسيەتىمىز. جەۋ ءۇشىن جاراتىلعاندايمىز. قاي جەردەن نەنى جىمقىرىپ جەپ قالۋدى ويلايمىز. قۇندىلىق جوق. قارنىمىز تويسا، ءبارىن ساتامىز. ادام ەمەس، تەك قۇلقىندى كورەمىن. سەندەر ەرتەڭ ءوز تىلدەرىڭدى ۇمىتىپ، جوق بولاسىڭدار. استانانى باسىپ العان قارا قۇمىرسقالار بۇل ەلدى تاستاپ، ءوز وتانىنا قايتپايدى. ولار كەلگەن جەرىن ءوز وتانى سانايدى. سەبەبى، ءپرينسيپى جوق ۇلتتىڭ جەرىن دە، ءتىلىن دە، تۋىن دا، تاۋەلسىزدىگىن دە اقشاعا ساتىپ جىبەرەتىنىن بىلەدى. سەندەر ەندى وزگەرمەيسىڭدەر!» – دەپ جازدى اقىن.

قوعامنىڭ پىكىرى

اقىننىڭ بۇل جازباسى الەۋمەتتىك جەلى قولدانۋشىلارى اراسىندا قىزۋ تالقىعا ءتۇستى. كوپشىلىك ونىڭ ايتقان سوزدەرىنىڭ بۇگىنگى قوعامداعى اششى شىندىقتى كورسەتەتىنىن ايتىپ، قولداۋ ءبىلدىردى. كەيبىر وقىرماندار قازىرگى قوعامداعى ماسەلەلەرگە نازار اۋدارىپ، جاستاردىڭ تاعدىرىنا الاڭدايتىندارىن جەتكىزدى.