InfoHub Logo

سماگۋلوۆا ا.س. ءال-فارابي اتىنداعى قازاق ۇلتتىق ۋنيۆەرسيتەتىنىڭ حالىقارالىق قاتىناستار فاكۋلتەتى، ديپلوماتيالىق اۋدارما كافەدراسىنىڭ دوسەنتى

جانۋزاكوۆا گ.ا. ءال-فارابي اتىنداعى قازاق ۇلتتىق ۋنيۆەرسيتەتىنىڭ حالىقارالىق قاتىناستار فاكۋلتەتى، ديپلوماتيالىق اۋدارما كافەدراسىنىڭ اعا وقىتۋشىسى

ءال-فارابي اتىنداعى قازاق ۇلتتىق ۋنيۆەرسيتەتىندە «احمەت وقۋلارى» اياسىندا «احمەت بايتۇرسىن ۇلى جانە عىلىم ءتىلى» اتتى حالىقارالىق عىلىمي-تەوريالىق كونفەرەنسيا ءوتتى. وعان بەلگىلى مەملەكەت جانە قوعام قايراتكەرلەرى، وتاندىق جانە شەتەلدىك ءتىلشى، ادەبيەتشى عالىمدار مەن ءبىلىم الۋشى جاستار قاتىستى.

كونفەرەنسياعا ق ر پارلامەنتى سەناتىنىڭ ءتوراعاسى ماۋلەن اشىمبايەۆ قۇتتىقتاۋ جولدادى. وندا: «احمەت بايتۇرسىن ۇلى – وتە تەرەڭ، جان-جاقتى تۇلعا. ول ءتىل، ادەبيەت، لينگۆيستيكا، پەداگوگيكا، ساياسات سياقتى سالماقتى سالالاردا ۇلتىنىڭ ءبىلىمىن مولايتىپ، ەركىندىككە قول جەتكىزۋىنە بار كۇشىن جۇمسادى. ۇلتىنا «قىرىق مىسال» ارقىلى ءۇن قاتىپ، قازاعىن ماسا بولىپ وياتۋعا تالپىندى. قايراتكەر تۇلعانىڭ جەتەكشىلىگىمەن تۇڭعىش جالپىۇلتتىق «قازاق» گازەتى جارىق كوردى. احاڭ ۇلت كوسەمى ءاليحان بوكەيحان ۇلى جانە ءمىرجاقىپ دۋلاتۇلىمەن بىرگە الاش قوزعالىسىنىڭ باسىندا تۇردى. وسىلايشا ۇلتىمىزدى قالامگەرلىگىمەن دە قايراتكەرلىگىمەن دە ەگەمەندىگىنە جەتەلەدى»، – دەلىنگەن.

سونىمەن قاتار جيىنعا «ءتىل-قازىنا» ۇلتتىق عىلىمي-پراكتيكالىق ورتالىعىنىڭ باس ديرەكتورى ەربول تىلەشوۆ قاتىسىپ، ق ر جوعارى ءبىلىم جانە عىلىم ءمينيسترى ساياسات نۇربەكتىڭ قۇتتىقتاۋ ءسوزىن وقىدى. مينيستر: «بۇگىنگى الىس-جاقىن شەتەلدەر مەن ەلىمىزدىڭ عالىمدارى قاتىسىپ وتىرعان كونفەرەنسيانىڭ ناتيجەلەرى قازاق ءتىلتانۋى ءۇشىن عانا ەمەس، مەملەكەتتىك ءتىلدىڭ عىلىم ءتىلى دەڭگەيىندە قولدانىلۋىنا قوسىلاتىن اسا ماڭىزدى جۇمىس بولادى دەپ سانايمىن. عالىم ەڭبەكتەرىن تەرەڭىرەك زەرتتەۋ جالعاسا بەرەرىنە سەنىمىم مول»، – دەي كەلە، احمەتتانۋشى عالىمدارعا العىس ءبىلدىردى.

القالى جيىندا ءال-فارابي اتىنداعى قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ قاتىسۋشىلارعا ءوز قۇتتىقتاۋىن جەتكىزدى.

«ءال-فارابي اتىنداعى قازاق ۇلتتىق ۋنيۆەرسيتەتى احمەت بايتۇرسىنوۆتىڭ بيىلعى 150 جىلدىق مەرەيتويىنا جان-جاقتى دايىندىقپەن كەلدى. عالىم مۇرالارىن قامتىعان عىلىمي-تاجىريبەلىك كونفەرەنسيالار وتكىزىلدى. ۇلت ۇستازىنىڭ تاڭدامالى ەڭبەكتەرى كوپتومدىق رەتىندە شىعارىلدى. بۇل شىعارىلىمنىڭ باستى ەرەكشەلىگى – ستۋدەنتتەر ا.بايتۇرسىن ۇلى ەڭبەگىنىڭ ءتۇپنۇسقاسىن وقۋعا تولىق مۇمكىندىك الدى. بيىل ۋنيۆەرسيتەتىمىزدەگى قازاق ءتىل ءبىلىمى كافەدراسىنا ۇلت ۇستازى – احمەت بايتۇرسىن ۇلىنىڭ ەسىمى بەرىلدى»، – دەپ اتاپ ءوتتى جانسەيىت تۇيمەبايەۆ.

كونفەرەنسيانى جۇرگىزگەن احمەت بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى انار فازىلجان ءوز سوزىندە ينستيتۋتتىڭ بيىلعى اتقارعان جۇمىستارىن تىلگە تيەك ەتتى. عالىمدار مەن جاس ىزدەنۋشىلەر ۇلت ۇستازىنىڭ مول مۇراسىن جاڭا قىرىنان زەرتتەۋگە بەت بۇرعانىن ايتا كەلە، شارانىڭ ءمانى مەن ماڭىزىنا توقتالدى.

سونداي-اق شارادا تۇركيانىڭ وسمانعازى ۋنيۆەرسيتەتىنىڭ پروفەسسورى فەررۋح اعجا، ق ر ۇعا اكادەميگى شەرۋباي قۇرمانباي ۇلى، ءال-فارابي اتىنداعى قازۇۋ-دىڭ ا.بايتۇرسىن ۇلى اتىنداعى كافەدرا مەڭگەرۋشىسى انار سالقىنباي جانە وزگە دە بايانداماشىلار ءسوز الىپ، احمەت بايتۇرسىن ۇلىنىڭ ۇلتتىق عىلىم ءتىلىنىڭ قالىپتاسۋىنا سىڭىرگەن ەڭبەگى، تەرىم سوزدەرىنىڭ نەگىزدىلىگى، عالىم جاساعان لينگۆيستيكالىق تەرميندەردىڭ مەتافورالىق سيپاتى مەن مازمۇنى، اقىننىڭ دراماتۋرگياعا قاتىستى وي-پىكىرلەرى جايلى وي قوزعادى.

قاتىسۋشىلار بايتۇرسىنوۆ تانىمى ارقىلى جاستاردىڭ ءوي-ورىسىن كەڭەيتۋدىڭ ماڭىزىنا ءمان بەرىپ، ونىڭ مەملەكەتتىك ءتىلدى عىلىم تىلىنە اينالدىرۋعا نەگىز سالعانىن جانە عىلىمي جاڭالىقتاردىڭ قازاق تىلىندە جازىلۋىنا باسىمدىق بەرۋ قاجەتتىگىن تۇجىرىمدادى.

---