InfoHub Logo

قوستاناي وبلىسىنىڭ باسشىسى قۇمار اقساقالوۆتىڭ باسقارۋىنداعى وڭىردە مەملەكەتتىك رەسۋرستاردى ءتيىمدى پايدالانۋدا ەلەۋلى كەمشىلىكتەر انىقتالدى. جوعارى اۋديتورلىق پالاتا جۇرگىزگەن تەكسەرىس ناتيجەسىندە الەۋمەتتىك-ەكونوميكالىق دامۋدىڭ تۇراقسىزدىعى، جوسپارلاۋداعى جۇيەلى قاتەلىكتەر مەن ينۆەستيسيالاردىڭ ازايۋى سياقتى ماسەلەلەر ورتاعا شىقتى.

بۇل تۋرالى Infohub.kz اقپارات اگەنتتىگى حابارلايدى.

ينۆەستيسيالار ازايىپ، جول مەن اۋىل شارۋاشىلىعى زارداپ شەگۋدە

اۋديتورلار ءوڭىردىڭ جالپى وڭىرلىك ءونىمى ارتقانىمەن، الەۋمەتتىك-ەكونوميكالىق دامۋدىڭ تۇراقسىز سيپات العانىن اتاپ ءوتتى. جەرگىلىكتى بيۋدجەت كىرىسى ارتقانىمەن، مەنشىكتى كىرىستەردىڭ ۇلەسى باياۋ وسكەن. سونىمەن قاتار، 19 ميلليارد تەڭگە يگەرىلمەگەن قاراجات بولا تۇرا، 30 ميلليارد تەڭگە قارىز الىنعانى انىقتالدى. بۇل شىعىنداردى جوسپارلاۋ مەن قارىز جۇكتەمەسى اراسىنداعى ۇيلەسىمسىزدىكتى كورسەتەدى.

تىكەلەي شەتەلدىك ينۆەستيسيالار اعىنى ءالى دە تومەن دەڭگەيدە قالىپ وتىر. جوسپارلانعان 188 ميلليارد تەڭگەلىك 8 ينۆەستيسيالىق جوبانىڭ 6-ۋى ءالى پايدالانۋعا بەرىلمەگەن. ءوڭىردى دامىتۋ باعدارلاماسى اياسىندا جىل سايىن ونداعان ينۆەستيسيالىق جوبا تىزىمنەن الىنىپ وتىر. ءبىرقاتار نىسانداردىڭ قۇرىلىسىندا جوبالىق-سمەتالىق قۇجاتتامادا جۇيەلى بۇزۋشىلىقتار تىركەلگەن، بۇل نىسانداردى ۋاقىتىندا پايدالانۋعا بەرۋگە كەدەرگى كەلتىرەدى.

كاسىپكەرلەرگە كورسەتىلگەن قولداۋ ءتيىمسىز

11 ميلليارد تەڭگە كولەمىندە 352 كاسىپكەرلىك سۋبەكتىسىنە كورسەتىلگەن مەملەكەتتىك قولداۋ ناتيجەسىز بولدى. ولاردىڭ جارتىسىنا جۋىعى قىزمەتىن توقتاتسا، قالعاندارى جۇمىس ورىندارىن اشۋ جونىندەگى مىندەتتەمەلەرىن ورىنداماعان. قارجىلىق تۇراقتى بيزنەستى جاسىرىن سۋبسيديالاۋ فاكتىلەرى دە انىقتالدى، بۇل باسەكەلەستىك قاعيداتتارىن بۇزادى.

وڭىردە جول قۇرىلىسىنىڭ ساپاسىنا ءتيىستى باقىلاۋ جوق. 12 نىساندى تەكسەرۋ بارىسىندا اسفالتبەتون جابىنىنىڭ شوگۋى مەن بۇزىلۋى سياقتى اقاۋلار انىقتالدى. بۇل كەمشىلىكتەر بۇرىن پايدالانۋعا بەرىلگەن جول ۋچاسكەلەرىندە دە كەزدەسەدى.

اگروونەركاسىپتىك كەشەن ءوڭىر ەكونوميكاسىنىڭ نەگىزگى سالالارىنىڭ ءبىرى بولعانىمەن، ونىڭ دامۋى تۇراقسىز. 2022 جىلدان بەرى اۋىل شارۋاشىلىعى ونىمدەرىنىڭ جالپى كولەمى تومەندەپ، مال باسى ازايعان.

مەملەكەتتىك ساتىپ الۋداعى زاڭبۇزۋشىلىقتار

مەملەكەتتىك ساتىپ الۋ سالاسىندا 12 ميلليارد تەڭگەگە جۋىق زاڭبۇزۋشىلىقتار تىركەلدى. تالاپتارعا سايكەس كەلمەيتىن كومپانيالاردىڭ جەڭىمپاز دەپ تانىلۋى، «ەرەكشە ءتارتىپتى» نەگىزسىز قولدانۋ جانە توتەنشە جاعدايدى سىلتاۋ ەتىپ ءبىر كوزدەن ساتىپ الۋ فاكتىلەرى انىقتالدى.

دارىگەرلىك امبۋلاتوريالار سالۋ كەزىندە مەديسينالىق جابدىقتاردىڭ قۇنى شامامەن 200 ميلليون تەڭگەگە نەگىزسىز وسىرىلگەنى بەلگىلى بولدى. كەيبىر قۇرال-جابدىقتار جوبالىق-سمەتالىق قۇجاتتاردا كورسەتىلگەن باعادان 18-46 ەسە ارزان بولعانىنا قاراماستان، جوعارى باعامەن ساتىپ الىنعان. باعا قالىپتاستىرۋدا بانكروت دەپ تانىلعان كومپانيانىڭ پرايس-پاراقتارى نەگىزگە الىنعان.