InfoHub Logo

قىتايدىڭ حەنان اگرارلىق ينۆەستيسيالىق توبى سولتۇستىك قازاقستان وبلىسىندا «قازاقستان-قىتاي اگرارلىق تەحنولوگيالار جانە ەكسپورتتىق دامۋ تەحنوپاركى» اتتى جوبانى ىسكە اسىرۋدا. بۇل باستاماعا شامامەن 10 ميلليون دوللار ينۆەستيسيا سالىنادى دەپ جوسپارلانۋدا.

بۇل تۋرالى Infohub.kz اقپارات اگەنتتىگى حابارلايدى.

تەحنوپارك ينفراقۇرىلىمى مەن ماقساتتارى

جوبانىڭ نەگىزگى الاڭى م. قوزىبايەۆ اتىنداعى سولتۇستىك قازاقستان ۋنيۆەرسيتەتىنىڭ 61 گەكتار جەرى بولادى. العاشقى كەزەڭدە جۇڭگو تاراپى قويمالار، عىلىمي-اكىمشىلىك عيماراتتار، جاتاقحانالار جانە زاماناۋي جىلىجاي كەشەندەرى سياقتى ينفراقۇرىلىمدى قارجىلاندىرادى. ۋنيۆەرسيتەت بولسا، جوبانى عىلىمي تۇرعىدان قولداۋدى قامتاماسىز ەتەدى.

جوبانىڭ باستى باعىتتارى ەگىن سەلەكسياسى مەن تۇقىم شارۋاشىلىعىن دامىتۋ، ونىمدىلىكتى ارتتىرۋ، سونداي-اق ەگىنشىلىكتەگى مەحانيزاسيا، اۆتوماتتاندىرۋ جانە سيفرلىق تەحنولوگيالاردى ەنگىزۋ بولىپ تابىلادى. بۇعان قوسا، اۋىل شارۋاشىلىعى ونىمدەرىن تەرەڭ وڭدەۋدى دامىتۋ دا جوبا اياسىندا قاراستىرىلعان.

قازاقستاندى تاڭداۋ سەبەبى

ۋنيۆەرسيتەت وكىلدەرىنىڭ ايتۋىنشا، قىتايلىق تاراپ قازاقستانعا دەيىن وزبەكستان، قىرعىزستان جانە مالايزيا سياقتى ءبىرقاتار ەلدەردەگى جاعدايدى ءبىر جارىم جىلداي زەرتتەگەن. ناتيجەسىندە، سولتۇستىك قازاقستان وبلىسىنىڭ الەۋەتى جوبا ءۇشىن قولايلى دەپ تانىلعان.

بۇل جوبا حەنان اگرارلىق ينۆەستيسيالىق توبىنىڭ حالىقارالىق اۋقىمىن كەڭەيتۋ ستراتەگياسىنىڭ ءبىر بولىگى بولۋى مۇمكىن. بۇعان دەيىن قىتايلىق باق-تا اتالعان كومپانيانىڭ قازاقستاننان بولەك، افريكا جانە باسقا دا ايماقتاردا اۋىل شارۋاشىلىعى ءوندىرىسى جوبالارىن دامىتىپ جاتقانى تۋرالى حابارلانعان بولاتىن.

قىتايلىق توپتىڭ اۋقىمى

حەنان اگرارلىق ينۆەستيسيالىق توبى – پروۆينسياداعى ەڭ ءىرى مەملەكەتتىك كاسىپورىنداردىڭ ءبىرى سانالادى. جىلدىق اينالىمى 20 ميلليارد دوللاردان اسادى جانە ونىڭ قۇرامىندا اگروونەركاسىپ كەشەنىنىڭ ءارتۇرلى سالالارىندا جۇمىس ىستەيتىن 170-تەن استام ەنشىلەس كومپانيا بار.