InfoHub Logo

جۇڭگو 7 ماۋسىمدا، سەنبى كۇنى، تايۆان ارالىنىڭ شىعىسىنداعى سۋ ايدىندارىندا تەڭىز زاڭناماسىن ساقتاۋ بويىنشا ارنايى وپەراسيا باستاعانىن حابارلادى. بۇل تۋرالى Global Times باسىلىمى سينحۋا اگەنتتىگىنە سىلتەمە جاساپ جازدى.

بۇل وپەراسيانى كولىك مينيسترلىگى فۋسزيان جانە گۋاندۋن پروۆينسيالارىنىڭ تەڭىز قاۋىپسىزدىك باسقارمالارىمەن، شىعىس جۇڭگو تەڭىزىندەگى ناۆيگاسيانى قامتاماسىز ەتۋ ورتالىعىمەن جانە شىعىس جۇڭگو تەڭىزىندەگى قۇتقارۋ بيۋروسىمەن بىرلەسىپ جۇرگىزەدى.

وپەراسيانىڭ نەگىزگى ماقساتى – جۇڭگو حالىق رەسپۋبليكاسىنىڭ تەڭىز سالاسىنداعى اكىمشىلىك يۋريسديكسياسىن تولىق ىسكە اسىرۋ، ماڭىزدى سۋ ايدىندارىندا پاترۋلدەۋ جانە كەمە قاتىناسىن باقىلاۋ مۇمكىندىكتەرىن ارتتىرۋ، تەڭىز قوزعالىسىنىڭ قاۋىپسىزدىگىن قامتاماسىز ەتۋ جانە ۇلتتىق قۇقىقتار مەن مۇددەلەردى قورعاۋ.

بۇل قادام جاپونيا مەن ءفيليپپيننىڭ تايۆاننىڭ شىعىسىندا تەڭىز شەكاراسىن انىقتاۋ بويىنشا كەلىسسوزدەردى باستاۋ تۋرالى ءبىر جاقتى مالىمدەمەسىنە قاجەتتى جاۋاپ بولىپ سانالادى. پەكين مۇنى قىتايدىڭ اۋماقتىق ەگەمەندىگىن، سونداي-اق ونىڭ تەڭىز قۇقىقتارى مەن مۇددەلەرىن ەلەۋلى بۇزۋشىلىق دەپ سانايدى.

جاقىندا فيليپپين پرەزيدەنتى فەرديناند ماركوس-كىشىنىڭ جاپونياعا ساپارى بارىسىندا ەكى ەل جاپونيا مەن فيليپپين اراسىنداعى ايرىقشا ەكونوميكالىق ايماق پەن كونتينەنتالدى قايراڭدى انىقتاۋ بويىنشا كەلىسسوزدەردى باستاۋ تۋرالى بىرلەسكەن مالىمدەمە جاسادى. جوسپارلانعان شەكارا تايۆاننىڭ شىعىس جاعالاۋى ماڭىنداعى سۋلاردى قامتيدى.

بۇل تۋرالى Infohub.kz اقپارات اگەنتتىگى حابارلايدى.

جۇڭگو سىرتقى ىستەر مينيسترلىگىنىڭ رەسمي وكىلى ماو نين بريفينگتە جاپونيا مەن ءفيليپپيننىڭ قىتايدى اينالىپ ءوتىپ، تەڭىز شەكاراسىن انىقتاۋ بويىنشا كەلىسسوزدەر جۇرگىزۋ ارەكەتى بۇۇ-نىڭ تەڭىز قۇقىعى كونۆەنسياسىن، باسقا دا حالىقارالىق قۇقىق نورمالارىن جانە حالىقارالىق قاتىناستاردىڭ نەگىزگى قاعيداتتارىن ەلەۋلى بۇزۋشىلىق ەكەنىن اتاپ ءوتتى.

ونىڭ ايتۋىنشا، بۇل قىتايدىڭ تەڭىز قۇقىقتارى مەن مۇددەلەرىن دە ەلەۋلى تۇردە قىسقارتادى جانە بەيجىڭ مۇنى قابىلدامايتىنىن مالىمدەدى.

«ىشكى زاڭناماعا جانە حالىقارالىق قۇقىققا سايكەس... جۇڭگو بۇل ايماقتا ايرىقشا ەكونوميكالىق ايماققا جانە كونتينەنتالدى قايراڭعا يە. كونۆەنسياعا سايكەس، قاراما-قارسى نەمەسە شەكتەس جاعالاۋلارى بار مەملەكەتتەر اراسىنداعى ايرىقشا ەكونوميكالىق ايماق پەن كونتينەنتالدى قايراڭدى انىقتاۋ تاراپتاردىڭ كەلىسىمى مەن ادىلدىك قاعيداتتارى نەگىزىندە جۇرگىزىلۋى ءتيىس»، - دەدى ماو.

ول تايۆاننىڭ شىعىسىنداعى سۋ ايدىندارىن انىقتاۋ قىتايدىڭ قاتىسۋىمەن جۇرگىزىلۋى كەرەك دەپ قوستى.

بەيجىڭ تايۆاندى قحر-نىڭ اجىراماس بولىگى رەتىندە سانايدى جانە «ءبىر جۇڭگو» قاعيداتىن ساقتاۋدى قىتايمەن ديپلوماتيالىق قارىم-قاتىناس ورناتقىسى نەمەسە ساقتقىسى كەلەتىن باسقا مەملەكەتتەر ءۇشىن مىندەتتى شارت دەپ ەسەپتەيدى.