InfoHub Logo

قازاقستاندا ادەتتە ءبىر مىقتى باسشىسى بار، جوعارىدان تومەن قاراي جۇيەسى قالىپتاسقان اۋىلداردى ۇلگى تۇتادى. الايدا، قىزىلوردا وبلىسىنداعى بەسارىق اۋىلى مۇلدەم باسقاشا دامۋ ۇلگىسىن كورسەتەدى. مۇندا 450 وتباسى 20 جىل بويى ەشبىر جەكە يەسىنسىز، ۇجىمدىق نەگىزدە ميلليارد تەڭگەگە جۋىق تابىس اكەلەتىن شارۋاشىلىق قۇرعان. بۇل تۋرالى بلوگەر جانە اگروفەرمەر جۇلدىز عافاروۆا مالىمدەدى.

بۇل تۋرالى Infohub.kz اقپارات اگەنتتىگى حابارلايدى.

ۇجىمدىق شارۋاشىلىقتىڭ ناتيجەسى

بەسارىق اۋىلىنىڭ تۇرعىندارى بىرلەسىپ 10 مىڭ باس ءىرى قارا مال باعىپ، مىڭ گەكتار جەرگە كۇرىش ەگەدى. بۇل شامامەن 580 ميلليون تەڭگەگە جۋىق شيكى كۇرىش ساتىلىمىنان تۇسەتىن تابىس بولسا، تازارتىلعان كۇرىشتىڭ كولەمىندە بۇل كورسەتكىش 960 ميلليون تەڭگەگە جەتەدى. ياعني، 450 وتباسى جىلىنا شامامەن ءبىر ميلليارد تەڭگە تابىس تابادى.

بۇل ۇلگىنىڭ «رودينا» اۋىلىنان باستى ايىرماشىلىعى – مۇندا ءبارىن ءبىر ادامنىڭ باستاپ، سالىپ شىعۋى بولماعان. تۇرعىندار بۇل جۇيەنى 20 جىل بويى بىرلەسىپ، ۇجىمدىق نەگىزدە قۇرعان.

بيزنەس-ينكۋباتور جانە كووپەراتيۆ

2024 جىلى «اۋىل اماناتى» مەملەكەتتىك باعدارلاماسى اياسىندا اۋىلدا جەرگىلىكتى كاسىپكەرلەر ءۇشىن تەگىن بيزنەس-ينكۋباتور ىسكە قوسىلدى. جوباعا 642 ميلليون تەڭگە جۇمسالىپ، ونىڭ 465 ميلليون تەڭگەسىن «اباي-داۋلەت» ج ش س ءبولدى. قازىرگى تاڭدا مۇندا جارتىلاي فابريكاتتار، كارتوپ-فري، كونديتەرلىك جانە نان-توقاش ونىمدەرىن، پلاستيك ىدىس، سابىن، اعاش جانە توقىما بۇيىمدارىن شىعاراتىن سەحتەر جۇمىس ىستەيدى. بۇل 25 جاڭا جۇمىس ورنىن اشتى.

ينكۋباتور رەزيدەنتتەرىنىڭ ءبىرى، گۇلزيرا رىسىم 6 ميلليون تەڭگە جەڭىلدىكتى نەسيە الىپ، جۇمىس قولعاپتارىن شىعاراتىن ءوندىرىس اشقان. ونىڭ ايتۋىنشا، ونىمگە سۇرانىس جوعارى، باعاسى نارىقتىقتان تومەن.

سونداي-اق، 2024 جىلى اۋىلدا «سىر قۇسى» اتتى اۋىلشارۋاشىلىق وندىرىستىك كووپەراتيۆى قۇرىلىپ، جىلىنا 100 توننا قۇس ەتىن ءوندىرۋ قۋاتتىلىعىنا يە بولدى. ونىمدەر ءقازىردىڭ وزىندە وبلىس ساۋدا ورىندارىنا جەتكىزىلۋدە.

الەۋمەتتىك جاۋاپكەرشىلىك

بەسارىق اۋىلىندا 2400 ادام تۇرادى. مۇندا 360 ورىندىق مەكتەپ، 120 ورىندىق بالاباقشا، 10 ۇيىرمەسى بار مادەنيەت ءۇيى، كۇندىزگى ستاسيونارى بار امبۋلاتوريا، 14 دارىگەر جانە جەدەل جاردەم كولىگى بار. 2024 جىلعى مەكتەپ بىتىرۋشىلەردىڭ ورتاشا بالى – 80%، ۇشەۋى «التىن بەلگى» يەلەندى.

2024 جىلدىڭ قورىتىندىسى بويىنشا بەسارىق اۋىلى «ۇلگىلى ەلدى مەكەن» بايقاۋىنىڭ جەڭىمپازى اتاندى.