InfoHub Logo

سوڭعى كۇندەرى Facebook جەلىسىندە تاراعان ءبىر بەينەجازبا قوعام نازارىن وزىنە اۋداردى. ۆيدەودا ءبىلىم بەرۋ مەكەمەسىنىڭ باسشىسى جۇمىس ورنىندا وتىرعان ايەلمەن جاقىن قارىم-قاتىناس جاساپ تۇرعانى كورىنەدى. بۇل جاعداي جەلى قولدانۋشىلارى اراسىندا قىزۋ تالقىعا ءتۇستى.

بۇل تۋرالى Infohub.kz اقپارات اگەنتتىگى حابارلايدى.

جەلىدەگى اقپاراتتارعا سۇيەنسەك، وقيعا قىزىلوردا وبلىسى، جاڭاقورعان اۋدانىنداعى كوللەدجدەردىڭ بىرىندە بولعان دەگەن بولجام بار. الايدا بۇل مالىمەت ءالى رەسمي تۇردە راستالمادى.

قۇزىرلى ورگانداردان جاۋاپ كۇتۋدە

قوعامدا ۇلكەن رەزونانس تۋدىرعانىنا قاراماستان، قۇزىرلى ورگاندار تاراپىنان ازىرگە ناقتى جاۋاپ جوق. اسىرەسە، قىزىلوردا وبلىستىق ءبىلىم باسقارماسىنىڭ ۇنسىزدىگى جۇرتشىلىقتىڭ نارازىلىعىن كۇشەيتۋدە. مەملەكەتتىك ورگان ءۇشىن مۇنداي جاعدايدا جەدەل ءارى ناقتى تۇسىنىكتەمە بەرۋ – مىندەت.

باسقارما باسشىسىنىڭ جاۋاپكەرشىلىگى

باسقارمانىڭ ۇنسىزدىگىن ءتۇرلى سەبەپتەرمەن بايلانىستىرىپ جاتقاندار دا بار. كەيبىر جەلى قولدانۋشىلارى باسقارمانىڭ باسپا ءسوز قىزمەتى السىرەگەنىن، ءتىپتى جاۋاپتى ماماننىڭ بولماۋى مۇمكىن ەكەنىن العا تارتادى.

ماسەلەنىڭ ءمان-جايىن سۇراماق بولىپ، جاڭاقورعان اۋداندىق اكىمدىگىنە حابارلاسقانىمىزدا، ولار وقيعا ورىن العان مەكەمەنىڭ اۋداندىق ءبىلىم بولىمىنە ەمەس، تىكەلەي قىزىلوردا وبلىستىق ءبىلىم باسقارماسىنا قارايتىنىن جەتكىزدى. الايدا وبلىستىق ءبىلىم باسقارماسىمەن بايلانىسۋ مۇمكىن بولمادى.

ەڭ باستى سۇراق – باسقارما باسشىسى اسقاربەك ەسجانوۆ نەگە ءۇنسىز؟ قوعام تالقىلاپ جاتقان ماسەلەنىڭ انىق-قانىعىن ايتىپ، راس-وتىرىگىن اجىراتىپ بەرەتىن نەگىزگى تۇلعا ءدال ءوزى ەمەس پە؟ مۇنداي جاعدايدا ءۇنسىز قالۋ – ماسەلەنى ۋشىقتىرا تۇسپەسە، شەشپەيتىنى انىق.