InfoHub Logo

ءبىلىم جول بارىنە اڭسارلى،
وي زەرەك بولسا وعان ۇنادىڭ.
سەندەردى كۇلىمدەپ قارسى الدى
مەكتەپتە مەيىرىمدى ءمۇعالىم.

قارسى الدى سىنىبىڭ، پارتاڭ دا،
تارتىپپەن سەن وعان ۇنادىڭ.
جۇرەدى كۇلىمدەپ ورتاڭدا
تاعى سول مەيىرىمدى ءمۇعالىم.

ۇستازىڭ، مەيىربان ءۇنى تىم،
قاقپايدى تىم قاتتى بەتىڭدى.
قوعامنىڭ كىشكەنتاي ءۇمىتىن
باپتايدى جاس شىبىق سەكىلدى.

ۇستازدىڭ سان قىرلى الەمى،
ساناسى، جۇرەگى – اسقاق ار.
قوعامعا قۇرمەت اۋەلى
ۇستازدى سىيلاۋدان باستالار.

شاكىرتتەر وسىندا كەلەدى،
وزىنە جاڭاشا دوس تابار.
ەلىڭە قۇرمەت اۋەلى
مەكتەپتى سۇيۋدەن باستالار.

كەشەگى ۇلىلار ءىزىسىڭ،
وتكىزبەس بوسقا ءار كەز ۋاقىتتى.
وتاننىڭ ۇلىسىڭ، قىزىسىڭ،
وتانى بار ادام باقىتتى.

ءارقاشان قامىن جەر بالانىڭ
اناڭدى شاتتىقتى كۇيگە ەنگىز.
قۇت بولسىن بىلىمدە قادامىڭ،
ءبىرىنشى سىنىپتىق ۇل مەن قىز.

بارىنە تىم ىستىق كورىنگەن
ەستيسىڭ قوڭىراۋ ءۇنىن كەپ.
“جاقسى وقى” دەگەندەي سەنىممەن
سەندەرگە ەلىڭ تۇر كۇلىمدەپ.


ولاردىڭ ءبىرىنشى سىنىپتىڭ تابالدىرىعىن اتتاعانى كۇنى كەشە عانا سياقتى ەدى، ەندى، مىنە، باستاۋىش سىنىپپەن قوشتاساتىن كۇندەرى دە كەلىپ جەتتى.

ولاردى وسى جىلدار ىشىندە العاشقى ۇستازدارى قابىلداپ الدى، ءتالىم ۇيرەتتى، ءومىر الىپپەسىمەن تانىستىردى، كەلەشەككە جەتەلەدى.

باستاۋىش سىنىپتا ساباق بەرگەن ۇستازدارى ولاردى ءبىلىم نەگىزىنىڭ سىرىنا باعىت الدىردى، ءوز الەمىندە ويلانۋعا ۇيرەتتى، تانىم باسپالداعىن قالىپتاستىردى، اينالا ورتا، قوعاممەن قارىم-قاتىناستارىن ىزگىلىككە باعىتتادى، جازۋ، سويلەۋ مادەنيەتىنىڭ العاشقى سىرلارىن اشتى، وزىندىك شىعارماشىلىق الەمىنە باۋلىدى، بولاشاق جەكە تۇلعانىڭ قالىپتاسۋىنا، دامۋىنا جاعداي جاسادى، بۇگىنگى شىبىقتىڭ ەرتەڭگى قوعامى مەن وتانىنا سەپتىگىن تيگىزەر ماۋەلى بايتەرەك بولارىن قازىردەن ويلادى، جان-جاقتى جول اشتى. وسى ءۇشىن بالا تاربيەسى عىلىمىنىڭ سونى تاسىلدەرىن ىزدەنىپ، تالاي كەشتەرى مەن تۇندەرىن ۇيقىسىز وتكىزدى. وسىنىڭ بارلىعى دا تاۋەلسىز وتاننىڭ جاس بوبەگى ءۇشىن جاسالعان ەدى.

ەندى ولاردىڭ دا، ولاردى وسىرگەن اتا-انالارىنىڭ دا وسى ءبىر ىزگى قىزمەت ءۇشىن باستاۋىش سىنىپقا، ونىڭ ۇستازدارىنا دا راقمەت ايتاتىن كۇندەرى كەلىپ جەتىپتى.

ەگەر ۇستاز ەڭبەگى ولشەۋسىز بولىپ سانالسا، ول ەڭبەكتىڭ العاشقى قوماقتى ۇلەسى باستاۋىش سىنىپ ۇستازىنىڭ ىزدەنىس تانىتۋىندا جاتىر.

بالدىرعان سانا ەرەسەك تارتقاندا دا ءبىلىمنىڭ العاشقى باسپالداعى بوپ سانالار وسى ءبىر باستاۋىش سىنىپتاعى كۇندەرىن ەستەرىنە الاتىن بولادى جانە العاشقى ۇستازدارىن دا. ويتكەنى ولاردىڭ ەرەسەك اعا-اپكەلەرىنىڭ بارلىعى دا وسى جولدان وتكەن.

تاعى دا قوڭىراۋ سوعىلدى. ءبىراق بۇل قوڭىراۋدىڭ ءۇنى ولار ءۇشىن سوڭعى قوڭىراۋ ەمەس. ولاردى ءالى عىلىم مەن عىلىمنىڭ اراسىن بايلانىستىرىپ جاتقان تالاي جاۋاپتى قوڭىراۋلاردىڭ ءۇنى كۇتىپ تۇر.

ولار ءسال ەسەيدى. بۇل ەسەيۋدە العاشقى ۇستازدارىنىڭ دا تىنىمسىز تەر توككەن ەڭبەگى جاتىر.

باستاۋىش سىنىپتىڭ بال بۇلاق كۇندەرى ارتتا قالىپ، ولار بولاشاققا اسىعادى. تاعى دا ءبىلىم الماق ءۇشىن.

ەندى باستاۋىش سىنىپ بالدىرعانى وزدەرىنىڭ ۇستازدارىنا راقمەت ايتپاق.

راقمەت، ۇستازىم، مىڭ العىس!

ۇيرەتىپ ومىردە تاعىلىم،
ۇستازدىق كوڭىلمەن سەندىڭىز.
ۇقتىرىپ تىرشىلىك ءتالىمىن،
جەتەلەپ بۇل شاققا كەلدىڭىز.

باستاۋىش – ءبىلىمنىڭ بۇلاعى،
سانانى جەتىلتتى، وزگەرتتى.
قويىلىپ ەندى ءومىر سۇراعى،
ونىمەن قوشتاسار كەز كەپتى.

كەلەشەك بۇل كۇندى بىلمەسە،
وندا ءار جىل بەلەسىن اتاي كەت.
“العاشقى ۇستازىڭ كىم؟” دەسە،
ايتامىز: “ول – ءبىزدىڭ اپاي!” دەپ.

العاشقى ۇستاز ول – مەيىربان،
ەلىڭدى، وتاندى ءسۇي دەپتى.
قينالساڭ، شىعۋدى قيىننان،
جالىقپاي بىزدەرگە ۇيرەتتى.

ەرتەڭدى ءبىلىم دەپ اتايدى،
سول جولمەن كەلەشەك ۇتامىز.
سوندىقتان ومىردە اپايدى
ءار كەزدە قۇرمەت تۇتامىز.

ۇلەس اپ ءبىز دە ءالى ومىردەن،
سامعارمىز، جۇلدىز بوپ تۇرارمىز.
سوندىقتان شىنايى كوڭىلمەن:
راقمەت، ۇستازىم، مىڭ العىس!

جۇگىرىپ قاستەرلى كۇن ءۇشىن،
وياتتى كوڭىلدىڭ قۇشتارىن.
ءبارى دە جاسالدى ءبىز ءۇشىن،
سول ءۇشىن راقمەت، ۇستازىم!

---