InfoHub Logo

رەفەرەندۋم قارساڭىندا الەۋمەتتىك جەلىلەردە سايلاۋ جاشىكتەرىنە بيۋللەتەندەردى جاپپاي تاستاۋ تۋرالى جالعان بەينەروليكتەر تارالۋدا. جالعان اقپاراتقا قارسى ءىس-قيمىل ورتالىعى بۇل ۆيدەولارعا قاتىستى تۇسىنىكتەمە بەردى.

بۇل تۋرالى Infohub.kz اقپارات اگەنتتىگى حابارلايدى.

جۇرگىزىلگەن تالداۋ ناتيجەسىندە مۇنداي بەينەجازبالاردىڭ باسىم بولىگى باسقا ەلدەردە جانە ءارتۇرلى ۋاقىتتا تۇسىرىلگەنى انىقتالدى. كەيبىر ۆيدەولار ناقتى شىعۋ تەگى مەن ءمان-جايى كورسەتىلمەي، قويىلىمدىق نەمەسە وڭدەلگەن بولىپ شىقتى.

«جوعالىپ كەتەتىن سيا» بەينەلەنگەن روليك

مىسالى، «جوعالىپ كەتەتىن سيا» تۋرالى بەينە العاش رەت 2019 جىلى ينتەرنەتتە پايدا بولعان. بۇل ماتەريال بۇعان دەيىن رەسەي، ۋكراينا جانە قىرعىزستان ەلدەرىندە بىرنەشە رەت جاريالانىپ، كەڭىنەن تارالعان بولاتىن.

«ال وزگە ماتەريالداردىڭ ءبىر بولىگى – وسىدان 10-15 جىل بۇرىن جانە ودان دا ەرتە ۋاقىتتا جاريالانعان بەينەجازبالار. ورتالىق بارلىق ونلاين-پلاتفورمالاردا ولاردىڭ نۇسقالارىن ەسەپكە العاندا، 32 بىرەگەي بەينەجازبانى انىقتادى»، - دەلىنگەن حابارلامادا.

اقپاراتتىق ارانداتۋشىلىقتىڭ ماقساتى

ورتالىقتىڭ مالىمەتىنشە، مۇنداي ماتەريالداردى پايدالانۋ – اقپاراتتىق ارانداتۋشىلىق تەحنولوگيالارىنىڭ ءبىرى. ماقسات – داۋىس بەرۋ پروسەدۋرالارى تۋرالى بۇرمالانعان تۇسىنىك قالىپتاستىرۋ ارقىلى رەفەرەندۋم قارساڭىندا قوعامداعى سەنىم دەڭگەيىنە نۇقسان كەلتىرۋ.

رەفەرەندۋم كۇنى جاقىنداعان سايىن مانيپۋلياسيالىق كونتەنتتىڭ اناعۇرلىم كۇردەلى تۇرلەرى، سونىڭ ىشىندە شىنايى وقيعالاردى نەمەسە لاۋازىمدى تۇلعالاردىڭ مالىمدەمەلەرىن يميتاسيالايتىن ديپفەيك-بەينەلەر پايدا بولۋى مۇمكىن دەپ بولجانۋدا.

ورتالىق ازاماتتاردى مۇنداي جاريالانىمدارعا سىني تۇرعىدان قاراۋعا، اقپارات كوزدەرىن مۇقيات تەكسەرۋگە جانە راستالماعان ماتەريالداردى تاراتپاۋعا شاقىرادى.