InfoHub Logo

رەسەي فەدەراسياسىنىڭ پرەزيدەنتى ۆلاديمير پۋتين استاناعا كەلدى. مەملەكەت باسشىسىن اۋەجايدا قازاقستان پرەزيدەنتى قاسىم-جومارت توقايەۆ قارسى الدى.

بۇل تۋرالى Infohub.kz اقپارات اگەنتتىگى حابارلايدى.

رەسەي پرەزيدەنتىنىڭ ۇشاعىن كىمدەر كۇتىپ الدى؟

رەسەي پرەزيدەنتىنىڭ ۇشاعى قازاقستاننىڭ مەملەكەتتىك شەكاراسىن كەسىپ وتكەن ساتتەن باستاپ استانا اۋەجايىنا قونعانعا دەيىن قازاقستاننىڭ اۋە قورعانىس كۇشتەرىنىڭ جويعىش ۇشاقتارىنىڭ سۇيەمەلدەۋىمەن ۇشىپ كەلدى.

اۋەجايدا رەسەيلىك كوشباسشىنى رەسمي دەلەگاسيامەن بىرگە، قازاقستان مەن رەسەي تۋلارىن ۇستاعان بالالار جانە م. وتەمىسوۆ اتىنداعى وقۋشىلار سارايىنىڭ بارابانشىلارى قۇرمەتتى قاراۋىلمەن قارسى الدى. سالتاناتتى راسىمنەن كەيىن اۋەجاي ۇستىندە ەكى ەلدىڭ مەملەكەتتىك تۋلارى ىلىنگەن تىكۇشاقتار پايدا بولدى.

تەرمينالدا ول-فارابي اتىنداعى وقۋشىلار سارايىنىڭ دومبىراشىلار ءانسامبلى مەن حالىقارالىق بايقاۋلاردىڭ لاۋرەاتى، بايانيست رادمير حايبۋللين قۇرمانعازىنىڭ كۇيلەرى مەن ورىس مۋزىكالىق شىعارمالارىنىڭ ءپوپۋرريىن ورىندادى.

ءۆيزيتتىڭ ءمانى نەدە؟

رەسەي پرەزيدەنتى ۆلاديمير پۋتين 27-29 مامىر ارالىعىندا قازاقستانعا مەملەكەتتىك ساپارمەن كەلدى. وسى كۇندەرى استانادا ەۋرازيالىق ەكونوميكالىق وداعىنىڭ وتىرىسى وتەدى.

رەسەي پرەزيدەنتىنىڭ كومەكشىسى يۋريي ۋشاكوۆ بۇعان دەيىن حابارلاعانداي، اۋەجايداعى رەسمي كەزدەسۋدەن كەيىن ەكى ەل باسشىلارى «كەدروۆىي دوم» رەزيدەنسياسىنا بارىپ، جەكە اڭگىمە جۇرگىزىپ، بەيرەسمي تۇسكى اس ىشەدى.

كەلىسسوزدەردىڭ نەگىزگى بولىگى 28 مامىرعا جوسپارلانعان. ەكىجاقتى ىنتىماقتاستىق الدىمەن جابىق فورماتتا، سودان كەيىن دەلەگاسيالار قاتىسىمەن تالقىلانادى. كەزدەسۋ قورىتىندىسى بويىنشا ءبىرقاتار قۇجاتقا قول قويىلىپ، ب ا ق وكىلدەرىنە بىرلەسكەن مالىمدەمە جاسالادى دەپ كۇتىلۋدە.

ساياسي كۇن تارتىبىنەن بولەك، تاراپتار بىرنەشە بىرلەسكەن باستامانى ۇسىنادى. ولاردىڭ قاتارىندا ءبىرىنشى حالىقارالىق ۇشقىشسىز جۇك تاسىمالداۋ جەلىسىن ىسكە قوسۋ، «قازاقستان-سيريۋس» ورتالىعىن قۇرۋ، سونداي-اق «ىلە-بالقاش» تابيعي قورىعىندا امۋر جولبارىسىنىڭ پوپۋلياسياسىن قالپىنا كەلتىرۋ جوباسى بار.

پرەزيدەنتتەر ەاەو شارالارىنا دا قاتىسادى. باعدارلامانىڭ جەكە تارماعى رەتىندە قازاقستان مەن رەسەي اراسىنداعى ماڭگىلىك دوستىق اللەياسىنا اعاش وتىرعىزۋ قاراستىرىلعان.