InfoHub Logo

رەسەي ۋكرايناعا تۇندە اۋقىمدى شابۋىل جاساپ، جۇزدەگەن درون مەن ونداعان زىمىران ۇشىردى. ساراپشىلار ماسكەۋدىڭ ۋكرايناداعى كوكتەمگى شابۋىلىن باستاعانىن بولجاپ وتىر.

بۇل تۋرالى Infohub.kz اقپارات اگەنتتىگى حابارلايدى.

ۋكراينا بيلىگىنىڭ حابارلاۋىنشا، رەسەي تۇندە 400-گە جۋىق درون مەن ونداعان زىمىران ۇشىرعان. بۇل سوڭعى اپتالارداعى ەڭ ءىرى شابۋىلداردىڭ ءبىرى بولدى. شابۋىلدار دۇيسەنبىدەن سەيسەنبىگە قاراعان ءتۇنى باستالىپ، كۇندىز دە جالعاسقان.

ۋكراينا پرەزيدەنتىنىڭ مالىمدەمەسى

ۋكراينا پرەزيدەنتى ۆلاديمير زەلەنسكييدىڭ ايتۋىنشا، شابۋىلداردىڭ گەوگرافياسى كەڭ اۋقىمدى. ونىڭ ايتۋىنشا، كوپتەگەن درون اتىپ تۇسىرىلگەنىمەن (500-دەن استام)، لۆوۆ، يۆانو-فرانكوۆسك، تەرنوپول، ۆيننيسا، جيتومير، حمەلنيسكيي، روۆنو، حاركوۆ جانە دنەپر وبلىستارىندا سوققىلار بولعان. «ادامدار قازا تاپتى. تۋىستارى مەن جاقىندارىنا كوڭىل ايتامىن. قازىرگى ۋاقىتتا 40-تان استام ادام، سونىڭ ىشىندە بەس بالا جاراقات الدى. بارلىعىنا قاجەتتى كومەك كورسەتىلۋدە»، - دەپ جازدى زەلەنسكيي Telegram جەلىسىندە.

ۋكراينا باسشىسى رەسەيلىك سوققىلاردىڭ «ەنەرگەتيكالىق ينفراقۇرىلىمعا» باعىتتالعانىن اتاپ ءوتتى.

كوكتەمگى شابۋىلدىڭ باستالۋى

رەسەي تاراپىنان شابۋىلداردىڭ بەلسەندىلەنۋى، سونىڭ ىشىندە قۇرلىقتاعى وپەراسيالاردىڭ كۇشەيۋى كوكتەم-جاز ايلارىنداعى شابۋىل ناۋقانىنىڭ باستالۋى بولۋى مۇمكىن ەكەنىن ساراپشىلار مەن ب ا ق اتاپ وتۋدە.

رەسەي باق-تارى ۋكرايناداعى شابۋىل تۋرالى ەشقانداي اقپارات تاراتپادى. ربك باسىلىمىنىڭ مالىمەتىنشە، ۋكراينانىڭ دروندارى لەنينگراد، بريانسك، كۋرسك، بەلگورود، سمولەنسك، كالۋگا، ۆورونەج وبلىستارىندا اتىپ تۇسىرىلگەن.

باسىلىمنىڭ حابارلاۋىنشا، كۋرسك وبلىسىنىڭ حومۋتوۆسكيي اۋدانىنداعى «ۆەلەس-اگرو» اوك كاسىپورنىنا ەكى رەت جاسالعان سوققى سالدارىنان 13 ادام زارداپ شەككەن.

ۋكراينا پرەزيدەنتى ۆلاديمير زەلەنسكيي ۋكراينانىڭ كەلىسسوز توبىنىڭ بايانداماسىنان كەيىن كەلىسسوزدەردە ناقتى ىلگەرىلەۋشىلىك جوق ەكەنىن مالىمدەدى.

بۇعان دەيىن ۋكراينا پرەزيدەنتى ۆلاديمير زەلەنسكيي ەل تۇرعىندارىن رەسەي تاراپىنان بولاتىن اۋقىمدى سوققىعا دايىندالۋ تۋرالى ەسكەرتكەن بولاتىن.