InfoHub Logo

28 ناۋرىزدا سانكت-پەتەربۋرگتە وتكەن جولداستىق كەزدەسۋدە رەسەيدىڭ 10 دۇركىن چەمپيونى «زەنيت» قازاقستاندىق «قايرات» كومانداسىن قابىلدادى. ماچ «گازپروم ارەنا» ستاديونىندا ءوتتى. ماچ الدىندا قازاقستان مەن رەسەي گيمندەرىن ماريين تەاترىنىڭ ءسوليستى، حالىقارالىق بايقاۋلاردىڭ لاۋرەاتى سەرگەي سەميشكۋر ورىندادى. الايدا، قازاقستاندىق ءانۇراننىڭ ورىندالۋى جەلىدە قىزۋ پىكىرتالاس تۋدىردى.

بۇل تۋرالى Infohub.kz اقپارات اگەنتتىگى حابارلايدى.

جەلىدەگى پىكىرلەر

كەيبىر قولدانۋشىلار ءانۇراننىڭ ورىندالۋىنداعى قازاق ءتىلىنىڭ ايتىلۋى مەن اكسەنتىنە نازار اۋدارىپ، سىنعا الدى. ولار مۇنى ۇلتتىق رامىزدەرگە دەگەن قۇرمەتسىزدىك دەپ سانادى.

«نەگە اكسەنتسىز ايتۋعا بولمايدى؟ باسقا ەلدەردىڭ اندەرىن دە وسىلاي ورىنداي ما ەكەن؟ مەن بۇل جاعدايعا قۋانا المايمىن»، - دەپ جازدى ءبىر جەلى قولدانۋشىسى.

ەندى بىرەۋلەر: «ءبىر جاعىنان جاقسى، ەكىنشى جاعىنان ۇيات سياقتى. ەگەر ءبىز «زەنيت» كەلگەندە ورىس گيمنىن ءوز اكسەنتىمىزبەن ايتساق، ولارعا قالاي بولار ەدى؟» دەپ پىكىر ءبىلدىردى.

قولداۋ مەن تۇسىنىستىك

الايدا، كوپشىلىك بۇل ارەكەتتى قازاقستانعا دەگەن قۇرمەت بەلگىسى رەتىندە قابىلدادى. ولار ءوزارا سىيلاستىق پەن تاتۋلىقتى ساقتاۋدىڭ ماڭىزدىلىعىن اتاپ ءوتتى.

«بۇل ەڭ الدىمەن بىزگە دەگەن قۇرمەتتى كورسەتەدى. ءبىز ءوزارا سىيلاستىقپەن، بەيبىتشىلىكتە ءومىر ءسۇرۋىمىز كەرەك. رەسەي ءبىزدىڭ دوستىق ەل ەكەنىن كورسەتتى»، - دەدى ءبىر پىكىر ءبىلدىرۋشى.

باسقالارى: «ەگەر قازاق ورىسشا اكسەنتپەن سويلەسە، ءبىز ودان «نەگە ورىسشا سويلەيسىڭ؟» دەپ سۇرامايمىز عوي. ايتسا ايتسىن، ءتىپتى اكسەنتپەن، ءتىپتى قاتەمەن بولسا دا، باستىسى ايتتى ەمەس پە؟ ءبىز ءوزىمىز دە ءبارىن بىردەن ءمىنسىز ايتا بەرمەيمىز، ۋاقىت وتە كەلە ءبارى رەتتەلەدى»، - دەپ ءوز ويىن جەتكىزدى.

وسىلايشا، گيمننىڭ ورىندالۋى پىكىرتالاسقا ارقاۋ بولدى. ءارتۇرلى رەاكسيالارعا قاراماستان، كوپشىلىك حالىقارالىق ماچتا قازاقستان گيمنىنىڭ شىرقالۋى قۇرمەت كورسەتۋدىڭ ماڭىزدى بەلگىسى ەكەندىگىمەن كەلىستى.