سالتىڭدى ساقتا – ءدىنىڭدى ساقتا
تاۋەلسىزدىكتىڭ ارقاسىندا جاڭارعان زامان، وزگەرگەن ولكە، تۇلەگەن ەل يسلام ءدىنىنىڭ كەڭىنەن قانات جايۋۋىنا جاڭاشا سيپات بەرىپ، ونىڭ قىرى مەن سىرىن بۇرىنعىدان دا جارقىراتىپ اشا ءتۇستى. جاھاندانۋ پروسەسى ارقىلى شىعىس پەن باتىس مادەنيەتى بىتە قايناسىپ بارا جاتقان تۇستا، كەشە مەن بۇگىندى، ەرتەڭ مەن بولاشاقتى جارقىن ەتىپ، ءار ەلدى دارالاپ تۇرار: احاڭشا ايتار بولساق - «ءتىلى، ءدىنى ءھام ءسالت-داستۇرى مەن ادەت-عۇرىپى» بولماق. ءاسىلى ادام ءومىرى، اتار تاڭ مەن باتار كۇندىك بەلدىككە باعىنعان ۋاقىت تەكشەسى كەشە، بۇگىن، ەرتەڭ دەپ ەرەكشەلەنىپ تۇتاس تاريحتى قۇرايدى. ياكي، ءار ادام ءوز تاريحىن ءوزى تاڭبالاۋدا...
جاقىندا، جامبىل ولكەسىندەگى «بايدىبەك بابا» مەشىتىنىڭ باس يمامى سەرىك جولداسبەك ۇلى مەن «جامبىل ورتا مەكتەبى» كمم-نىڭ ديرەكتورى جاننا نۇربەك قىزى قولداۋىمەن «سالتىڭدى ساقتا – ءدىنىڭدى ساقتا» تاقىرىبىندا مەكتەپ وقۋشىلارى اراسىندا سۇبەلى كەزدەسۋ بولىپ ءوتتى. اتالمىش جيىنعا قمدب ءنىڭ جامبىل اۋدانى ورتالىق «شىناسىل» مەشىتىنىڭ باس يمامى قالجان ءارىبجان ۇلى مەن باس يمام كومەكشىسى ازات توحتاقۇل ۇلى ارنايى قاتىستى. جيىننىڭ نەگىزگى ماقساتى: زايىرلى ەلدىڭ ەرتەڭگى بولاشاعى وسكەلەڭ ۇرپاقتىڭ ساناسىنا ءتىلىن ءدىلىن سالت ءداستۇرى مەن ادەت عۇرىپىن قادىرلەۋگە تاربيەلەۋ.
كەشتى بىلىكتى وقۋ ورنىنىڭ تاريح ءپانىنىڭ ءمۇعالىمى ساۋلە ساعىندىق قىزى جۇرگىزىپ، «يسلام» ءدىنىڭ شىعۋ تاريحىنا كەڭىنەن توقتالىپ ءوتتى. تالىمگەر مەن ءتالىم الۋشىلاردىڭ اراسىنداعى ادەپتىلىك ىزگىلىك حاقىندا وي تولعانىپ، ەلدى ەلەڭ ەتكىزگەن وزگە ءدىن وكىلدەرىنىڭ شىرماۋىنا شىرمالىپ قالماۋ ءۇشىن ءدىني ساۋاتتىلىق قاجەتتىلىگى جايىندا باسا ايتىلدى. كەش سوڭىندا وقۋشىلار ءوز كوكەيىندە جۇرگەن ساۋالدارىن قويىپ تۇشىمدى جاۋاپ الدى.
مولداعالييەۆ ەرحان بولات ۇلى
الماتى، وبلىسى، جامبىل اۋدانى
«شىناسىل» مەشىتىنىڭ اقپارات باسشىسى
You Might Also Like
