InfoHub Logo

1 ساۋىردەن باستاپ قازاقستاندا كاسسا اپپاراتتارىنىڭ ەسكىرگەن دەرەكتەردى بەرۋ حاتتاماسى (2.0.2) قولدانىستان شىعىپ، جاڭا (2.0.3) حاتتاماسى ىسكە قوسىلدى. بۇل وزگەرىستەر بيزنەسكە جاڭا مىندەتتەر جۇكتەپ، سالىق ورگاندارىنا بيزنەستىڭ زاڭسىز ارەكەتتەرىن انىقتاۋعا مۇمكىندىك بەرەدى.

بۇل تۋرالى Infohub.kz اقپارات اگەنتتىگى حابارلايدى.

جاڭا حاتتاماداعى وزگەرىستەر

جاڭا حاتتاما بويىنشا، ءاربىر ساتىلاتىن تاۋار ۇلتتىق تاۋار كاتالوگىندە تىركەلۋى جانە ونىڭ كودى فيسكالدىق چەكتە كورسەتىلۋى كەرەك. سونىمەن قاتار، كاسسا اپپاراتىنىڭ گەولوكاسياسى انىقتالادى. بۇل اسىرەسە، ءبىر ساۋدا ورنىندا بىرنەشە جسن بويىنشا تىركەلگەن كاسسالاردى پايدالانىپ، بيزنەستى ءبولۋ (دروبلەنيە) سياقتى زاڭسىز ارەكەتتەردى انىقتاۋعا باعىتتالعان.

ەكى ءتۇرلى كاسسا، ەكى ءتۇرلى جاعداي

بيزنەس يەلەرى ەكى ءتۇرلى كاسسانى قولدانادى: فيزيكالىق اپپاراتتار (مىسالى، «مەركۋريي») جانە ونلاين-كاسسالار (Nurkassa، ReKassa سياقتى باعدارلامالىق جاساقتامالار). باعدارلامالىق كاسسالاردىڭ حاتتامالارى اۆتوماتتى تۇردە جاڭارتىلادى. ال فيزيكالىق كاسسالاردى جاڭارتۋ ءۇشىن كاسىپكەرلەردىڭ وزدەرى سەرۆيس ورتالىقتارىنا جۇگىنىپ، شىعىندالۋىنا تۋرا كەلەدى.

شترافتار بار ما؟

جاڭا حاتتامانى قولدانباعانى نەمەسە كاسسانى جاڭارتپاعانى ءۇشىن تىكەلەي ايىپپۇل جوق. الايدا، كاسسا جۇمىس ىستەمەي، فيسكالدىق چەك بەرىلمەسە نەمەسە چەك دۇرىس رەسىمدەلمەسە، اكىمشىلىك قۇقىق بۇزۋشىلىق تۋرالى كودەكسكە سايكەس ايىپپۇل سالىنادى. ياعني، ەسكىرگەن باعدارلاما سالدارىنان تۋىنداعان بۇزۋشىلىقتار ءۇشىن جاۋاپكەرشىلىككە تارتىلۋى مۇمكىن.

ماسەلەنى قالاي انىقتاۋعا بولادى؟

ەسكىرگەن حاتتاماسى بار كاسسا جۇمىسىن جالعاستىرا بەرەدى، ءبىراق دەرەكتەر سالىق ورگاندارىنا بارمايدى. بۇل جاعدايدى انىقتاۋ بىردەن بولمايدى. كاسىپكەرلەر دەكلاراسيا تاپسىرعان كەزدە نەمەسە بانك دەرەكتەرىمەن سالىستىرۋ كەزىندە ماسەلەنى بايقاۋى مۇمكىن. سونداي-اق، تۇتىنۋشىلاردىڭ شاعىمدارى ارقىلى دا انىقتالۋى ىقتيمال. مەملەكەت ازاماتتاردى چەك بەرمەگەن ساۋدا ورىندارى تۋرالى حابارلاعانى ءۇشىن ىنتالاندىرادى.

ءقازىر نە ىستەۋ كەرەك؟

ماماندار باعدارلامالىق كاسسالارعا كوشۋدى ۇسىنادى، سەبەبى ولاردىڭ جاڭارتۋلارى اۆتوماتتى تۇردە جۇرەدى. فيزيكالىق كاسسا قولداناتىن كاسىپكەرلەرگە اپپاراتتى سەرۆيس ورتالىعىنا اپارىپ، باعدارلامانىڭ وزەكتىلىگىن تەكسەرتۋ قاجەت. 1 ساۋىردەن كەيىن جاڭارتۋدى كەشىكتىرۋ – دەرەكتەردىڭ سالىق ورگاندارىنا جەتپەي، كەيىننەن تۇسىنىكتەمە بەرۋگە ءماجبۇر بولۋ ءقاۋپىن تۋدىرادى.