InfoHub Logo

ءانشى ناركەنجە سەرىكبايەۆا الەۋمەتتىك جەلىدەگى پاراقشاسىندا ءومىر جولى مەن ونەردەگى تالاي قيىندىقتى باستان كەشكەنىن جاسىرماي ايتىپ، تىڭدارماندارىمەن جۇرەكجاردى وي ءبولىستى. ونەر يەسىنىڭ بۇل جازباسى كوپشىلىكتىڭ قىزۋ تالقىلاۋىنا اينالدى.

بۇل تۋرالى Infohub.kz اقپارات اگەنتتىگى حابارلايدى.

اشىق مىنەزدىڭ ارتىنداعى جاندار

كوپبالالى وتباسىندا وسكەن ءانشى، ءوزىنىڭ مىنەزى مەن باۋىرمالدىعىن اتا-اناسىنىڭ تاربيەسىمەن بايلانىستىردى. ول ادامدارعا دەگەن سەنىمىن ومىرلىك ۇستانىم ەتىپ العانىن ايتادى.

«اكەم مەن انامنىڭ كەنجەسى، 11 پەرزەنتتى كوپ بالالى وتباسىنىڭ ەركەسى بولدىم. كوپشىلمىن. كوپشىلىكتىڭ اراسىندا دا ەركەلەپ كەتەتىن ءبارىن ۇيدەگىدەي كورەتىنىم بار. ادامداردى جاتىرقاماي-اق كوڭىل قالپىممەن قابىلدايمىن. وزگەنى وزىمدەي كورىپ، قولىمداعى بارىممەن ءبولىسىپ جۇرگەنىم – انامنىڭ تاربيەسى»، - دەيدى ناركەنجە سەرىكبايەۆا.

ونەر – ومىرلىك جول

ءانشى ونەرگە دەگەن ماحابباتى ەشقاشان سونبەيتىنىن اتاپ ءوتتى. ول ءوزىنىڭ اق كوڭىلدىلىگىن كەيبىر ادامدار اڭقاۋلىققا بالاپ، الداپ كەتكەن كەزدەرى دە بولعانىن مويىندادى.

«سىرت كوزگە كوكىرەكتەۋ كورىنگەنىممەن، ىشتەي وتە اق كوڭىل، جۇمساق اداممىن نەگىزى. كەيدە ەركەلىگىمدى كوتەرە المايتىن ادامدارى دا كەزدەستىرەم. اق كوڭىلدىگىمدى اڭقاۋلىق دەپ ساناپ، سان سوقتىرىپ جۇرگەندەر از ەمەس. ءومىر بولعان سوڭ ءبارىن كورەدى ەكەنسىڭ. مەندە دوس ساناۋلى عانا. ساتقىندىقتى دا كوردىم. بەتكە ايتاتىن مىنەزىممەن ادامدارعا كەيدە جاقپاي قالامىن. سىرتتان سويلەگەننەن گورى بەتكە ايتىپ تا جۇرە بەرگەن جاقسى…»، - دەپ تولعانادى ءانشى.

ناركەنجە سەرىكبايەۆا ونەردى ومىرلىك سەرىگى ساناپ، تىڭدارماندارىنا دەگەن ريزاشىلىعىن ءبىلدىردى. «ومىرگە ونەرمەن كەلدىم، سول ونەر دەپ وتەم. ءان – مەنىڭ ءومىرىم. ءان – عۇمىر، ءان – ساپار، ەلدىڭ ىقىلاسى ماڭگىلىك بولعاي! جاقسى ادامدارىم، تىڭدارماندارىم، تىلەۋلەستەرىم سىزدەر امان بولىڭىزدار!» - دەپ ءسوزىن قورىتىندىلادى.

جەلى قولدانۋشىلارى ءانشىنىڭ اشىقتىعى مەن شىنايىلىعىن جوعارى باعالاپ، وعان قولداۋ ءبىلدىردى. كوپشىلىك ونى جۇرەگى تازا، قايسار ءارى ۇلگى بولارلىق تۇلعا رەتىندە سيپاتتاۋدا.