InfoHub Logo

شالقار قالاسىندا 17 جاستاعى ءجاسوسپىرىمنىڭ قازا بولۋىنا قاتىستى ءىس بويىنشا تاعى ەكى كۇدىكتى ۇستالدى. بۇل وقيعا قوعامدا ۇلكەن رەزونانس تۋدىردى.

بۇل تۋرالى Infohub.kz اقپارات اگەنتتىگى حابارلايدى.

17 جاستاعى ءاليحان جانىبەك 20 ناۋرىزعا قاراعان ءتۇنى كامەلەتكە تولماعاندار اراسىنداعى توپتىق جانجال كەزىندە قازا تاپتى. تۋىستارىنىڭ ايتۋىنشا، بۇل «اۋدان-اۋدان» اراسىنداعى توبەلەس بولعان. ءجاسوسپىرىم كەۋدەسىنەن پىشاق جاراقاتىن الىپ، وقيعا ورنىندا كوز جۇمدى.

ءىس قوزعالىپ، كۇدىكتىلەر انىقتالدى

پوليسيا دەپارتامەنتى اتالعان فاكتى بويىنشا قىلمىستىق ءىس قوزعاعانىن حابارلادى. جانجالعا قاتىسقان بارلىق تۇلعالار انىقتالىپ، پوليسيا بولىمىنە جەتكىزىلدى. ولاردىڭ ارەكەتتەرىنە زاڭ اياسىندا قۇقىقتىق باعا بەرىلەتىن بولادى.

كەيىنىرەك كىسى ءولتىرۋ كۇدىگىمەن شالقار قالاسىنىڭ 18 جاستاعى تۇرعىنى ۇستالدى. الايدا، 21 ناۋرىزدا مارقۇمنىڭ اكەسى جانىبەك ءاليمانوۆ وبلىس اكىمىنە، پروكۋرورعا جانە پوليسيا دەپارتامەنتىنىڭ باسشىسىنا جۇگىنىپ، جانجالعا ەكى تاراپتان 14–15 ءجاسوسپىرىم قاتىسقانىن، ءبىراق تەك ءبىر ادام عانا ۇستالعانىن ايتتى. ول قالعان قاتىسۋشىلاردىڭ ارەكەتتەرىنە دە قۇقىقتىق باعا بەرۋدى جانە ءىستى جان-جاقتى تەرگەۋدى تالاپ ەتتى.

تەرگەۋ جالعاسۋدا

26 ناۋرىزدا پوليسيا دەپارتامەنتى ءىستىڭ ق ر قىلمىستىق كودەكسىنىڭ «كىسى ءولتىرۋ» جانە «توپپەن جاسالعان بۇزاقىلىق» باپتارى بويىنشا تەرگەلىپ جاتقانىن مالىمدەدى. قازىرگى ۋاقىتتا ءۇش كۇدىكتى ۋاقىتشا ۇستاۋ يزولياتورىنا قامالدى. سونىمەن قاتار، وقيعانىڭ كۋاگەرلەرى مەن باسقا دا قاتىسۋشىلار انىقتالعان.

قىلمىستى تەرگەۋ ءۇشىن تاجىريبەلى تەرگەۋشىلەر مەن جەدەل قىزمەتكەرلەردەن ارنايى جەدەل-تەرگەۋ توبى قۇرىلدى. ءىس وبلىستىق پوليسيا دەپارتامەنتىنىڭ قاراۋىنا بەرىلىپ، تەرگەۋ بارىسى باسشىلىقتىڭ ەرەكشە باقىلاۋىنا الىندى.

شالقارداعى ءجاسوسپىرىمنىڭ ءولىمى قوعامدا الاڭداۋشىلىق تۋعىزدى. قۇقىق قورعاۋ ورگاندارى بارلىق كىنالىلەر زاڭ الدىندا جاۋاپ بەرەتىنىن مالىمدەدى.