InfoHub Logo

الماتىدا 7 اقپاندا وتكەن ۇزاتۋ تويىندا بولعان وقيعا جۇرتشىلىقتىڭ نازارىن اۋداردى. ەكى بەيتانىس ادام تويعا كىرىپ، وزدەرىن ەركىن سەزىنىپ، تاماقتانىپ، بي بيلەپ، ءتىپتى سۋرەتكە دە تۇسكەن. بۇل جاعداي Threads پلاتفورماسىندا قىزۋ تالقىلانىپ، ەكى ميلليوننان استام قارالىم جينادى.

بۇل تۋرالى Infohub.kz اقپارات اگەنتتىگى حابارلايدى.

توي يەسىنىڭ شاعىمى

الماتىداعى مەيرامحانالاردىڭ بىرىندە وتكەن تويدا ءبىر ادامعا ارنالعان ورىننىڭ قۇنى 55 مىڭ تەڭگە بولعان. توي يەسىنىڭ ايتۋىنشا، قوناقتاردىڭ ورنى الدىن الا بەلگىلەنىپ قويىلعانىنا قاراماستان، مەرەكە كەزىندە كەيبىر ورىنداردىڭ جەتىسپەي جاتقانى بايقالعان. كەيىن بەلگىلى بولعانداي، بۇل ورىنداردى ەكى بەيتانىس ادام يەلەنىپ العان.

"07.02 كۇنى ۇزاتۋ تويىمىز بولدى. ەكى ادام كەلىپ، شاقىرىلماسا دا بوس ورىندارعا وتىرىپ الدى، تاماق ءىشتى، بي بيلەدى. ال ءبىز ورىن نەگە جەتپەي جاتىر دەپ اڭ-تاڭ بولدىق. مەيرامحانا ارزان ەمەس – ءبىر ادامعا 55 مىڭ تەڭگە"، – دەپ جازدى توي يەسى.

بەيتانىس قوناقتاردىڭ تۇسىنىكتەمەسى

كەيىنىرەك، تويعا كىرىپ كەتكەن قوناقتاردىڭ ءبىرى جازبا اۆتورىمەن بايلانىسقا شىعىپ، مۇنىڭ سەبەبىن تۇسىندىرۋگە تىرىسقان. ول شەتەلدىك تانىسىنا قازاقتىڭ توي ءداستۇرىن كورسەتكىسى كەلگەنىن، بۇل ارەكەتىن قازاقتاردىڭ قوناقجايلىلىعىمەن بايلانىستىرعانىن ايتقان.

جەلىدەگى پىكىرتالاس

بۇل وقيعا الەۋمەتتىك جەلى قولدانۋشىلارى اراسىندا قىزۋ پىكىرتالاس تۋدىردى. كەيبىرى جاعدايدى ازىلگە اينالدىرسا، ەندى ءبىرى مۇنداي ارەكەتتى ادەپسىزدىك دەپ باعالادى. جەلىدە "ادامدارعا بوتەن تويعا بارۋعا ەرىنبەيدى ەكەن. ءوز تويىما بارۋعا ەرىنەمىن"، – دەگەن سياقتى پىكىرلەر كوپتەپ ايتىلدى. سونداي-اق، "نەگە ولار سۋرەتكە ءتۇستى؟" دەگەن سۇراقتار دا قويىلدى.

بۇل جازبا Threads جەلىسىندە قىسقا ۋاقىت ىشىندە كەڭىنەن تارالىپ، ەكى ميلليوننان استام قارالىم جينادى.