InfoHub Logo

شىمكەنتتە 18 جاستاعى ستۋدەنت قىز الەۋمەتتىك جەلىدەگى جالعان جۇمىس جارناماسىنا الدانىپ، زورلىق-زومبىلىققا ۇشىراعانىن ايتىپ، پوليسياعا ارىزداندى. قىزدىڭ تۋىستارى بۇل ىسكە ۇيىمداستىرۋشىلاردى دا جاۋاپقا تارتۋدى تالاپ ەتىپ وتىر.

بۇل تۋرالى Infohub.kz اقپارات اگەنتتىگى حابارلايدى.

جۇمىسقا شاقىرىپ، زورلىق جاساعان

جابىرلەنۋشىنىڭ ايتۋىنشا، ول الەۋمەتتىك جەلىدە جاريالانعان جالاقىسى جوعارى جۇمىس تۋرالى حابارلاندىرۋعا سەنىپ، كورسەتىلگەن مەكەنجايعا بارعان. الايدا، بۇل جەر «بودي-ماسساج» قىزمەتىن كورسەتەتىن ورتالىق بولىپ شىققان. ول انونيم سۇحباتىندا وقيعانىڭ بىلتىر جازدا بولعانىن ايتىپ، سول جەردەن ءوز ەركىمەن كەتە الماعانىن جەتكىزدى.

قىزدى كۇشتەپ ىشكە كىرگىزىپ، شىعارماي ۇستاعان. ەسىك الدىندا كۇزەتشىلەر تۇرعانىن، ال ىشىندەگىلەر وعان ەشكىم تيىسپەيتىنىن، تەك ماسساج جاساۋ كەرەكتىگىن ايتىپ سەندىرگەن. الايدا، جاعداي ونىڭ ويلاعانىنان مۇلدەم باسقاشا بولىپ شىققان.

«ءىستى توقتاتپاساڭدار، ولتىرەمىز»

جابىرلەنۋشىنىڭ تۋىستارى بۇل عيماراتتىڭ ءالى كۇنگە دەيىن مونشا رەتىندە جۇمىس ىستەپ تۇرعانىنا نارازى. ولار قۇزىرلى ورگانداردىڭ ءالى كۇنگە دەيىن ناقتى شارا قولدانباعانىن ايتىپ، وزدەرىنە بىرنەشە رەت قوقان-لوقى جاسالعانىن مالىمدەدى. «ءىستى توقتاتپاساڭدار، سەندەردى ولتىرەمىز» دەپ قورقىتقاندارىنا شاعىمداندى.

پوليسيا تەرگەۋ جۇرگىزىپ جاتىر

شىمكەنت قالالىق پوليسيا دەپارتامەنتى بۇل دەرەك بويىنشا قىلمىستىق كودەكستىڭ 120-بابى 1-بولىگى («زورلاۋ») بويىنشا سوتقا دەيىنگى تەرگەۋ باستالعانىن حابارلادى. قازىرگى تاڭدا سوت-پسيحولوگيالىق-كريميناليستيكالىق ساراپتاما تاعايىندالىپ، جابىرلەنۋشىنىڭ ۇيالى تەلەفونىنا دا زەرتتەۋ جۇرگىزىلۋدە. ساراپتاما قورىتىندىلارى الىنعاننان كەيىن قىلمىستىق ءىس بويىنشا تۇپكىلىكتى شەشىم قابىلدانادى.

جابىرلەنۋشىنىڭ وتباسى تەك كۇش كورسەتكەن ادامدى عانا ەمەس، قىزدى الداپ وسى ورتاعا تارتقان ۇيىمداستىرۋشىلاردى دا جاۋاپقا تارتۋدى تالاپ ەتىپ، ءىستىڭ تەزدەتىلىپ سوتقا جەتۋىن سۇراپ وتىر.