InfoHub Logo

شىمكەنت تەمىرجول ۆوكزالىندا ءۇش ءجاسوسپىرىمنىڭ ومىرگە ءقاۋىپتى ارەكەتى تىركەلدى. ولار ماس كۇيىندە «اتىراۋ – الماتى» باعىتىنداعى №42 جولاۋشىلار پويىزى جۇرە باستاعاندا، سوڭعى ۆاگونعا جارماسىپ مىنۋگە تىرىسقان.

ۆوكزال كەزەكشىسى مەيىربەك كەرىمبەكوۆ بۇل جاعدايدى دەر كەزىندە بايقاپ، ستانسيا قىزمەتكەرلەرى مەن جەلىلىك پوليسياعا حابار بەردى. تەمىرجولشىلار مەن قۇقىق قورعاۋ ورگاندارىنىڭ جەدەل ارەكەتىنىڭ ارقاسىندا جاسوسپىرىمدەر ۇستالىپ، پوليسيا بولىمشەسىنە جەتكىزىلدى. ءقازىر ولاردىڭ جەكە تۇلعالارى انىقتالىپ، وقيعانىڭ ءمان-جايى زەرتتەلۋدە.

وقيعا سالدارىنان پويىز بەس مينۋتقا كەشىگىپ، قوزعالىسىن ساعات 01:28-دە قايتا جالعاستىردى.

تەمىرجول كولىگىنە سىرتىنان جارماسۋ، اسىرەسە ماس كۇيدە، ادام ومىرىنە اسا ءقاۋىپتى ەكەنىن ەستە ساقتاۋ ماڭىزدى. «جولاۋشىلار تاسىمالى» اق ازاماتتاردى قاۋىپسىزدىك ەرەجەلەرىن قاتاڭ ساقتاۋعا شاقىرادى. جولاۋشىلار تەك ارنايى جابدىقتالعان پلاتفورمالاردان عانا پويىزعا ءمىنۋى ءتيىس، ال تەحنيكالىق ايالدامالار كەزىندە ۆاگوننان شىعۋعا تىيىم سالىنعان.

تەمىرجول قىزمەتكەرلەرى اتا-انالاردان بالالارىمەن قاۋىپسىزدىك شارالارىن تالقىلاۋدى سۇرايدى. ەگەر قانداي دا ءبىر قۇقىقبۇزۋشىلىق بايقالسا، دەرەۋ تەمىرجول قىزمەتكەرلەرىنە نەمەسە پوليسياعا حابارلاۋ قاجەت.