InfoHub Logo

شىمكەنت قالاسىنداعى م.اۋەزوۆ اتىنداعى وڭتۇستىك قازاقستان ۋنيۆەرسيتەتىندە اسا ءىرى كولەمدە بيۋدجەت قاراجاتىن جىمقىرۋ جانە قىلمىستىق جولمەن الىنعان مۇلىكتى زاڭداستىرۋ فاكتىسى بويىنشا تەرگەۋ اياقتالدى. بۇل تۋرالى قارجىلىق مونيتورينگ اگەنتتىگىنىڭ شىمكەنت قالاسى بويىنشا دەپارتامەنتى مالىمدەدى.

تەرگەۋ مالىمەتىنشە، كۇدىكتىلەر قاتارىندا ۋنيۆەرسيتەت رەكتورىنىڭ مىندەتىن اتقارۋشى، قارجى جانە اكىمشىلىك دەپارتامەنتتەرىنىڭ ديرەكتورلارى مەن ءبىرقاتار مەردىگەر ۇيىم باسشىلارى بار.

ۋنيۆەرسيتەت پەن مەردىگەر كومپانيالار اراسىندا جالپى سوماسى 256 ميلليون تەڭگەگە جالعان كەلىسىمشارتتار جاسالىپ، قۇرىلىس-مونتاج جۇمىستارى مەن ءتۇرلى قىزمەتتەر كورسەتۋ تۋرالى قۇجاتتار راسىمدەلگەن. الايدا جۇمىستار مۇلدە ورىندالماعان. جالعان اكتىلەر ارقىلى بيۋدجەت قاراجاتى اففيلييرلەنگەن مەردىگەرلەردىڭ شوتىنا اۋدارىلىپ، كەيىن قولما-قول اقشاعا اينالدىرىلعان.

تەرگەۋ بارىسىندا كۇدىكتىلەردىڭ قىلمىستىق تابىسقا ساتىپ العان مۇلىكتەرى دە انىقتالدى. ولاردىڭ قاتارىندا Mercedes-Benz S-كلاسس، Lexus LX570 ماركالى التى قىمبات كولىك پەن شىمكەنت قالاسىنىڭ ورتالىعىنداعى ەليتالىق كوتتەدج بار. جالپى قۇنى 254 ميلليون تەڭگەگە باعالانعان بۇل مۇلىكتەرگە سوت سانكسياسىمەن تىيىم سالىندى.

ءتورت كۇدىكتىگە قاتىستى بۇلتارتپاۋ شاراسى رەتىندە ءۇي قاماققا الۋ تۋرالى شەشىم قابىلداندى. قىلمىستىق ءىس سوتقا جولداندى.