InfoHub Logo

شىمكەنت قالاسىنداعى «قيال الەمى» ساياباعىن بۇزۋ ارەكەتى كاسىپكەرلەر مەن اكىمدىك اراسىندا داۋ تۋعىزىپ وتىر، دەپ حابارلايدى Infohub.k،.

كاسىپكەرلەر بىرنەشە جىلدان بەرى وسى اۋماقتا شاعىن بيزنەس جۇرگىزىپ، كۇنكورىس قامىمەن اينالىسىپ كەلگەن. قالا اكىمدىگى ءسۇرۋ جۇمىستارى ءۇشىن اۋىر تەحنيكانى جىبەرگەندە، كاسىپ يەلەرى وعان توسقاۋىل قويىپ، قارسىلىق ءبىلدىردى. جاعداي ۋشىعىپ، وقيعا ورنىنا پوليسيا قىزمەتكەرلەرى تارتىلدى.

كاسىپكەرلەر نە دەيدى؟
كاسىپكەرلەردىڭ ايتۋىنشا، ولاردىڭ قولىندا 4 گەكتار جەردى 49 جىلعا جالعا الۋ تۋرالى زاڭدى كەلىسىمشارت بار. بۇل مەرزىمنىڭ اياقتالۋىنا ءالى 19 جىل قالعان. سوعان قاراماستان، شىمكەنت قالاسىنىڭ اكىمى عابيت سىزدىقبەكوۆ باستاعان اكىمدىك «جەر زاڭسىز پايدالانىلدى» دەگەن ۋاجبەن سوتقا جۇگىنىپ، ناتيجەسىندە سوت شەشىمى كاسىپكەرلەردىڭ ەمەس، اكىمدىكتىڭ پايداسىنا شىققان.

ساياباقتاعى ساۋدا ورىندارى مەن اتتراكسيونداردا 300-گە جۋىق ادام جۇمىس ىستەيدى. كوپشىلىگىنىڭ بانكتە نەسيەسى بار، ال تابىستارى وسى كاسىپكە تاۋەلدى. جۇمىستارى توقتاسا، الەۋمەتتىك جاعدايلارى كۇرت ناشارلاۋى مۇمكىن.

كاسىپكەرلەردىڭ ءۋاجى
– اكىمدىك ءبىزدى كوشىرگىسى كەلسە، الدىمەن باسقا جەر تاۋىپ بەرسىن. بىزگە قۇرىلىس جۇرگىزىپ، كوشۋ ءۇشىن ۋاقىت كەرەك. ءبىر كۇندە كاسىپتەن ايىرۋ – ادىلەتسىزدىك، – دەيدى كاسىپكەر ايمان اشىربايەۆا.

اكىمدىك نە دەيدى؟
قالا اكىمدىگى ساياباق ورنىندا جاسىل جەلەك ايماعىن اشۋدى جوسپارلاپ وتىر. شەنەۋنىكتەردىڭ مالىمدەۋىنشە، بۇل جەردە ورنالاسقان 30 نىسان زاڭسىز سالىنعان. الايدا جەر بەرۋ ءتارتىبىنىڭ ناقتى قاي بولىگى بۇزىلعانى تۋرالى تۇسىنىكتى جاۋاپ بەرىلمەدى.

قالالىق ورتا ساپاسى جانە باقىلاۋ باسقارماسىنىڭ باسشىسى مەرلان كەرىمجانوۆ جەردىڭ باستاپقىدا دۇرىس راسىمدەلمەگەنىن العا تارتقان.

كاسىپكەرلەر ءۇمىتى – ءادىل شەشىم
ازىرگە كاسىپكەرلەر قالا باسشىسى عابيت سىزدىقبەكوۆتەن ءادىل ءارى ىمىرالى شەشىم كۇتۋدە. ولار بيلىك وكىلدەرى بيزنەس يەلەرىنىڭ دە پىكىرىن ەسكەرىپ، ماسەلەنى كەلىسسوز ارقىلى شەشسە دەيدى. ويتكەنى بۇل داۋ جۇزدەگەن وتباسىنىڭ تاعدىرىنا تىكەلەي اسەر ەتپەك.