InfoHub Logo

شىمكەنتتىڭ كونە سيتادەلى «شىمقالا» تاريحي-مادەني كەشەنىن جوندەۋگە جانە ارحەولوگيالىق قازبا جۇمىستارىنا جۇمسالعان 2،7 ميلليارد تەڭگەنىڭ قايدا كەتكەنى بەلگىسىز. بۇل تۋرالى قالا اكىمىنىڭ ورىنباسارى سارسەن قۇرانبەك مالىمدەدى.

بۇل تۋرالى Infohub.kz اقپارات اگەنتتىگى حابارلايدى.

قالا اكىمىنىڭ ورىنباسارىنىڭ ايتۋىنشا، تۋريستەردى وزىنە تارتا بىلگەن بۇل تاريحي نىسان التى جىل بويى ەشقانداي قۇجاتسىز جۇمىس ىستەپ كەلگەن. مەملەكەتتىك اكتى دە، قابىلداۋ-تاپسىرۋ اكتىسى دە راسىمدەلمەگەن.

«شىمقالا» كەشەنىنىڭ قارجىلىق جاعدايى

«شىمقالا» تاريحي-مادەني كەشەنى 2018 جىلى اشىلعان بولاتىن. 2019-2021 جىلدار ارالىعىندا ارحەولوگيالىق جۇمىستار مەن عيمارات قۇرىلىسىنا 2 ميلليارد 700 ميلليون تەڭگە قاراجات جۇمسالعان. الايدا، بۇل قارجىنىڭ ناقتى قايدا جۇمسالعانى اكىمدىككە بەيمالىم. قۇقىق قورعاۋ ورگاندارى بۇل ماسەلەگە قاتىستى تەكسەرىس جۇرگىزىپ، قورىتىندى شىعارادى.

ەكى جىل بۇرىن كەشەننىڭ بۇرىنعى باسشىسى جەمقورلىق ارەكەتى ءۇشىن سوتتالىپ، جازاسىن وتەگەن بولاتىن. ول «Archeo-service» ج ش س قىزمەتكەرىنەن اكتىلەردى تەز قابىلداپ، اقىسىن ۋاقىتىندا تولەۋ ءۇشىن 600 مىڭ تەڭگە پارا العان.

جوعالعان جادىگەرلەر ماسەلەسى

قازبا جۇمىستارى كەزىندە تابىلعان 2801 ەكسپوناتتىڭ جەكە تۇلعالاردىڭ قولىندا بولعانى انىقتالدى. اكىمنىڭ تالاپ ەتۋىمەن 1800-گە جۋىق جادىگەر قايتارىلعانىمەن، قالعان 1000-عا جۋىق ەكسپونات ءالى يەسىنە ورالماعان. اكىم ورىنباسارىنىڭ ايتۋىنشا، ەكسپوناتتاردىڭ كىمدە ەكەنىن انىقتاۋ جانە ولاردى راسىمدەۋ قيىنعا سوعىپ وتىر. جىل سوڭىنا دەيىن بارلىق جادىگەردى قايتارۋعا ءۇمىت بىلدىرگەنىمەن، ولاردىڭ ناقتى وسى كەشەننەن تابىلعانىنا جانە قاجەتتىلىگىنە ەشكىم كەپىلدىك بەرە المايدى.

كاسسادان تۇسكەن اقشانىڭ تاعدىرى

سيتادەلگە كىرۋ بيلەتتەرىنىڭ ساتىلىمىنان تۇسكەن قاراجات تا قازىناعا ەمەس، بەلگىسىز باعىتقا كەتكەن. زاڭدىلىقتى قالپىنا كەلتىرۋ ماقساتىندا «شىمقالا» كەشەنى ساياسي قۋعىن-سۇرگىن قۇرباندارى مۋزەيىنە قوسىلىپ، مۋزەيلەر بىرلەستىگى قۇرىلدى.

«2018 جىلدان بەرى سيتادەلدەن بيۋدجەتكە ءبىر تيىن دا تۇسپەگەن. الايدا، كاسسالار جۇمىس ىستەپ، حالىق بيلەت ساتىپ العان. اقشانىڭ قايدا كەتكەنى بەلگىسىز. 2024 جىلعى پرەزيدەنت جارلىعىنا سايكەس، جەكە مەملەكەتتىك كاسىپورىن اشۋعا رۇقسات جوق. سوندىقتان بارلىق مۋزەيدى بىرىكتىرىپ، مۋزەيلەر بىرلەستىگىن قۇردىق. سيتادەلدى ساياسي قۋعىن-سۇرگىن قۇرباندارى مۋزەيىنە قوستىق. مەملەكەتتىك اكت پەن قابىلداۋ-تاپسىرۋ اكتىسىن راسىمدەپ، كاسسا اشىپ، اقشانىڭ بيۋدجەتكە ءتۇسۋى ءۇشىن تاپسىرما بەرىلدى. تۇسكەن اقشانى بيۋدجەتكە الماي، ءوز قاجەتتىلىكتەرىنە جۇمسايدى»، – دەدى سارسەن قۇرانبەك.

اباي اتىنداعى مۋزەي دە زاڭسىز جۇمىس ىستەگەن

مۇنداي جاعداي شىمكەنتتەگى اباي اتىنداعى مۋزەيدە دە تىركەلگەن. بۇل مۋزەي اباي اتىنداعى كىتاپحانانىڭ قۇرامىنا كىرىپ، ەشقانداي قۇقىقتىق قۇجاتسىز جۇمىس ىستەگەن. عيمارات پەن جەر اكتىسى دە راسىمدەلمەگەن. بولاشاقتا جاڭا مۋزەي سالۋ جوسپارى بار ەكەنى ايتىلدى.