InfoHub Logo

قازاقستاندا سيفرلىق تەڭگەنى ەنگىزۋ جۇمىستارى قارقىندى ءجۇرىپ جاتىر. ساراپشىلاردىڭ ايتۋىنشا، 2026 جىلعا قاراي بۇل جاڭالىقتار ەلىمىزدىڭ قارجى جۇيەسىندە ەلەۋلى وزگەرىستەر اكەلۋى مۇمكىن. سيفرلىق تەڭگە دەگەنىمىز نە، ونى قالاي قولدانۋعا بولادى جانە حالىققا قاشان قولجەتىمدى بولادى دەگەن سۇراقتارعا جاۋاپ ىزدەدىك.

بۇل تۋرالى Infohub.kz اقپارات اگەنتتىگى حابارلايدى.

سيفرلىق تەڭگەنىڭ ەرەكشەلىكتەرى

سيفرلىق تەڭگە – بۇل قازاقستاننىڭ ۇلتتىق ۆاليۋتاسىنىڭ ءۇشىنشى فورماسى. ول قولما-قول جانە قولما-قولسىز اقشانىڭ قاسيەتتەرىن بىرىكتىرەدى. جاڭا ۆاليۋتانىڭ باستى ارتىقشىلىقتارىنىڭ ءبىرى – ينتەرنەتسىز دە تولەم جاساۋ مۇمكىندىگى. سونداي-اق، تولەمدەردى «باعدارلامالاۋ» ارقىلى بەلگىلى ءبىر ماقساتتارعا عانا جۇمساۋعا بولادى.

سيفرلىق تەڭگە توكەندەر تۇرىندە بولادى، ياعني قولما-قول تەڭگەنىڭ سيفرلىق بالاماسى. ءاربىر توكەننىڭ وزىندىك قۇنى بار جانە ول سيفرلىق كود رەتىندە تىركەلەدى. بۇل جاڭالىقتىڭ لوگوتيپى دە بەكىتىلدى. سيفرلىق تەڭگەنىڭ ەميتەنتى – قازاقستاننىڭ ۇلتتىق بانكى، ول ۆاليۋتانىڭ تۇراقتىلىعى مەن جۇمىسىنا كەپىلدىك بەرەدى. ءبىر قولما-قول تەڭگە ءبىر قولما-قولسىز جانە ءبىر سيفرلىق تەڭگەگە تەڭ بولادى.

حالىقارالىق دەڭگەيدەگى قولدانىس جانە مەرزىمدەر

ۇلتتىق تولەم كورپوراسياسىنىڭ ساراپشىلارى سيفرلىق تەڭگەنىڭ ەل اۋماعىنان تىس قولدانىلۋى بويىنشا زەرتتەۋلەر جۇرگىزىپ جاتىر. انار تالقامبايەۆانىڭ ايتۋىنشا، 2026 جىلدىڭ سوڭىنا دەيىن پيلوتتىق تولەمدەر جۇرگىزۋ جوسپارلانعان. ال 2027 جىلدىڭ ورتاسىنا قاراي ترانسشەكارالىق تولەمدەردى ماسشتابتاۋ كوزدەلۋدە.

قاشان قولجەتىمدى بولادى؟

جوبانى ونەركاسىپتىك پايدالانۋعا بەرۋ بيىلعى جىلى جوسپارلانعان. الايدا، رۋسلان قونىربايەۆتىڭ ايتۋىنشا، بۇل ءۇشىن كوپتەگەن زاڭنامالىق وزگەرىستەر قاجەت. قازىرگى تاڭدا سيفرلىق تەڭگەنى ءاربىر ازاماتقا مىندەتتى تۇردە تاراتۋ جوسپارى جوق. باستى ماقسات – «باعدارلامالاۋ» مۇمكىندىگى ارقىلى شەشىلەتىن ەڭ وزەكتى ماسەلەلەردى انىقتاۋ.

ازاماتتار سيفرلىق ۆاليۋتانى جوبا تولىققاندى پايدالانۋعا بەرىلگەننەن كەيىن قولدانا الادى. بۇل مەرزىم بيىلعى جىلدىڭ سوڭىنا دەيىن جوسپارلانىپ وتىر. سيفرلىق تەڭگە قولما-قول جانە قولما-قولسىز اقشاعا الماستىرۋ رەتىندە ەمەس، قوسىمشا مۇمكىندىك رەتىندە قاراستىرىلادى.

سىبايلاس جەمقورلىقپەن كۇرەس جانە پيلوتتىق جوبالار

سيفرلىق ۆاليۋتانى ەنگىزۋدىڭ نەگىزگى ماقساتتارىنىڭ ءبىرى – اقشانى «ماركيروۆكالاۋ» ارقىلى سىبايلاس جەمقورلىققا توسقاۋىل قويۋ جانە ترانزاكسيالاردىڭ اشىقتىعىن ارتتىرۋ. بۇل سالىق تولەمدەرىن جيناۋدى جاقسارتىپ، بيۋدجەت قاراجاتىن ماقساتتى پايدالانۋعا مۇمكىندىك بەرەدى. الايدا، حالىق پەن بيزنەس اراسىنداعى حاباردارلىقتىڭ تومەندىگى جانە بانكتەردىڭ جۇيەلەرىن جاڭارتۋعا كەتەتىن شىعىندار سياقتى قيىندىقتار دا بار.

جول جوندەۋ جۇمىستارىن باقىلاۋ ءۇشىن پيلوتتىق جوبالار جۇزەگە اسىرىلدى. پاۆلودار جانە اتىراۋ وبلىستارىندا بيۋدجەت قاراجاتىنىڭ سوڭعى الۋشىلارعا دەيىن قالاي جۇمسالعانى باقىلاندى. بۇل ءتاسىل قاراجاتتىڭ ماقساتسىز جۇمسالۋىن ازايتۋعا كومەكتەسەدى.

سيفرلىق تەڭگە تۋرالى العاشقى ءسوز جانە اتقارىلعان جۇمىستار

سيفرلىق تەڭگە يدەياسى 2020 جىلى ۇسىنىلىپ، 2021 جىلى ۇلتتىق بانك تۇجىرىمداماسىن جاريالادى. 2022 جىلى پلاتفورمانىڭ تەحنولوگيالىق مۇمكىندىكتەرى مەن ەكونوميكالىق زەرتتەۋلەر جۇرگىزىلدى. 2023 جىلى سيفرلىق ۆاليۋتا بولشەك ساۋدا اينالىمىنا ەنگىزىلدى. ال 2024 جىلى بانكتەرمەن بىرلەسىپ، وفلاين-تولەمدەرگە باسا نازار اۋدارىلاتىن جوبانى ماسشتابتاۋ جوسپارلانعان.

2025 جىلدىڭ شىلدەسىندە پرەمەر-مينيستر بيۋدجەتتەن قارجىلاندىرىلاتىن 100 ءىرى جوباعا سيفرلىق تەڭگەنى ەنگىزۋدى تاپسىردى. ال 2026 جىلدىڭ 1 مامىرىنان باستاپ قازاقستاندا سيفرلىق اكتيۆتەر اينالىمىن رەتتەۋ تۋرالى زاڭ كۇشىنە ەندى.

ۇلتتىق بانك سيفرلىق تەڭگەگە قاتىستى ينۆەستيسيالىق الداۋ سحەمالارىنىڭ وسكەنىن حابارلادى. سيفرلىق تەڭگە – بۇل زاڭدى تولەم قۇرالى، ينۆەستيسيالىق قۇرال ەمەس ەكەنىن ەستەرىڭىزگە سالامىز. الداۋ جاعدايىندا دەرەۋ قۇقىق قورعاۋ ورگاندارىنا حابارلاسۋ قاجەت.