InfoHub Logo

ءانشى BayanSulu الەۋمەتتىك جەلىدە ءوزىنىڭ شىعارماشىلىق جولىنداعى قيىندىقتار تۋرالى ايتىپ، اندەرىنىڭ اۆتورى قۋات ابىلوۆپەن اراداعى داۋدىڭ سەبەبىن ءتۇسىندىردى. ول اۆتوردى جالعان اقپارات تاراتتى دەپ ايىپتاپ، زاڭ جۇزىندە شارا قولداناتىنىن مالىمدەدى.

بۇل تۋرالى Infohub.kz اقپارات اگەنتتىگى حابارلايدى.

اۆتوردىڭ ايىپتاۋىنا جاۋاپ

BayanSulu قۋات ءابىلوۆتىڭ وزىنە جولداعان بەينەجازباسىندا جالعان اقپارات تاراتىلعانىن ايتتى. ءانشىنىڭ سوزىنشە، اۆتور كورسەتكەن قۇجاتتار انگە ەش قاتىسى جوق، ولار ونىڭ جەكە قۇقىعىن قورعاۋعا ارنالعان.

«ول كىسىگە جالعان اقپارات تاراتقانى ءۇشىن زاڭ جۇزىندە شارا قولدانامىز»، - دەدى ءانشى.

اندەر ءۇشىن تولەم جانە كەلىسىمشارت ماسەلەسى

ءانشى اندەردىڭ تولەمىن جاساۋدان ەشقاشان باس تارتپاعانىن، ءبىراق كەلىسىلگەن باعادان ءۇش ەسە ۇلعايىپ كەتكەندىكتەن تولەي الماعانىن ايتتى. الايدا، اۆتورمەن ناقتى ءبىر سوماعا كەلىسىپ، ەكى ساعات ىشىندە كەلىسىمشارتتى ۇسىنعانىن، ءبىراق اۆتور ويىنان اينىپ قالعانىن جەتكىزدى.

«اندەردى بۇكىل جەردەن وشىرتەتىنىن ايتتى»، - دەدى BayanSulu.

«ۇمىتسام دا» ءانىنىڭ تاريحى

BayanSulu ەكى جىل بۇرىن «ۇمىتسام دا» ءانىن ءوز اقشاسىنا ساتىپ العانىن ايتتى. الايدا، ءان ءبىر جىل بويى ەشقايدا شىقپاي، وزىندە تۇرعان. كەيىن بۇرىنعى پروديۋسەرى الىشەر بۋرحانوۆ ءاندى ۇناتىپ، ۆيدەو فورماتتا ءتۇسىرىپ، حالىققا ۇسىنعان. بۇل ءان ۇلكەن حيت بولىپ، اۆتور حابارلاسىپ، بىرگە جۇمىس ىستەۋگە دايىن ەكەنىن بىلدىرگەن.

«مەن ءارتىس رەتىندە ول ماسەلەگە ارالاسا المادىم. ويتكەنى ونىڭ ءبارى پروديۋسەردىڭ جۇمىسى ەدى. ال "ۇمىتسام دا" ءانى تولىقتاي مەنىڭ ءانىم»، - دەدى ءانشى.

ءانشى بۇل ماسەلەلەردىڭ كوپ قۇپياسى مەن ۇلكەن ماسەلەسى بار ەكەنىن ايتىپ، جاقىندا دالەلدەرمەن، سوتتىڭ ۇكىمىمەن كورسەتەتىنىن مالىمدەدى.