InfoHub Logo

شىعىس قازاقستان وبلىسىنداعى سوت عالىمدى كۇنباعىس گيبريدىنە بەرىلگەن پاتەنتتىڭ اۆتورلارى قاتارىنان شىعارۋ تۋرالى تالاپتى قاناعاتتاندىرمادى. سوت، عالىمنىڭ سەلەكسيالىق جۇمىستاعى ۇلەسىن شىعارماشىلىق جانە عىلىمي-زەرتتەۋ قىزمەت رەتىندە تانىپ، ونىڭ پاتەنتتەگى اۆتورلىق قۇقىعىن قورعاپ قالدى.

بۇل تۋرالى Infohub.kz اقپارات اگەنتتىگى حابارلايدى.

پاتەنتتىڭ ءوزى ءبىر سەرىكتەستىككە بەرىلگەنىمەن، قۇجاتتا گيبريدتى عىلىمي قىزمەتكەرلەر ۇجىمى جاساعانى كورسەتىلگەن. كەيىننەن، پاتەنت يەسى سوتقا جۇگىنىپ، ءبىر اۆتوردى تىزىمنەن شىعارۋدى تالاپ ەتكەن. سەبەبى رەتىندە، اتالعان قىزمەتكەردىڭ تەك لاۋازىمدىق مىندەتتەرى اياسىندا تەحنيكالىق جۇمىستار اتقارعانىن، گيبريدتى جاساۋعا اۆتور رەتىندە قاتىسپاعانىن العا تارتقان.

سوتتىڭ شەشىمى

ءىستى قاراۋ بارىسىندا گلۋبوكوۆ اۋداندىق سوتى ءتيىستى لاۋازىمدىق نۇسقاۋلىقتاردى، عىلىمي حاتتامالاردى، زەرتتەۋ ەسەپتەرىن زەردەلەپ، كۋاگەرلەردى تىڭدادى. سونداي-اق، وسىمدىك شارۋاشىلىعى سالاسىنداعى مامانداردىڭ قورىتىندىلارى دا ەسكەرىلدى.

سوت ماتەريالدارىندا كورسەتىلگەندەي، سەلەكسيالىق پروسەسس – بۇل باستاپقى جانە اتا-انالىق جەلىلەرمەن جۇمىس ىستەۋدى، بۋدانداستىرۋ كومبيناسيالارىن ازىرلەۋدى، سىناقتار جۇرگىزۋدى جانە ناتيجەلەردى تالداۋدى قامتيتىن ۇزدىكسىز عىلىمي-زەرتتەۋ قىزمەت بولىپ تابىلادى.

سوت عالىمنىڭ ارنايى ءبىلىمى بار ەكەنىن، سەلەكسيا سالاسىندا ۇزاق جىلدىق تاجىريبەسى بار ەكەنىن جانە اعا عىلىمي قىزمەتكەر لاۋازىمىن قوسا اتقارعانىن انىقتادى. ونىڭ پاتەنت اۆتورلارىنىڭ قاتارىنا ەنگىزىلۋى بۇعان دەيىن عىلىمي ورگاننىڭ شەشىمىمەن، قاتىسۋ ۇلەسى بەلگىلەنىپ رەسىمدەلگەن.

«جاۋاپكەردىڭ سەلەكسيالىق پروسەسكە قاتىسۋى عىلىمي-زەرتتەۋ جانە شىعارماشىلىق سيپاتتا بولدى، سوندىقتان ونى پاتەنت اۆتورلارىنىڭ قاتارىنان شىعارۋعا نەگىز جوق»، - دەلىنگەن سوت شەشىمىندە.

سوت شەشىمى زاڭدى كۇشىنە ەندى. تالاپ ارىز قاناعاتتاندىرۋسىز قالدىرىلدى. اپەللياسيالىق ساتى – شىعىس قازاقستان وبلىستىق سوتى – بۇل شەشىمدى وزگەرىسسىز قالدىردى.