InfoHub Logo

شىعىس قازاقستان وبلىسى اكىمىنىڭ بۇرىنعى ءبىرىنشى ورىنباسارى جانسايا ومار التى جىلعا باس بوستاندىعىنان ايىرۋ تۋرالى سوت ۇكىمىنە شاعىمدانۋدا. ول سىبايلاس جەمقورلىق ارەكەتتەرى ءۇشىن كىنالى دەپ تانىلىپ، جازاعا كەسىلگەن بولاتىن.

بۇل تۋرالى Infohub.kz اقپارات اگەنتتىگى حابارلايدى.

سوت كابينەتىنىڭ دەرەكتەرىنە سۇيەنسەك، جانسايا ومار سوت ۇكىمىنە اپەللياسيالىق شاعىم تۇسىرگەن. سوت وتىرىسى 20 مامىر كۇنى ساعات 11:00-دە وتەدى دەپ جوسپارلانعان. ول ۋاقىتقا دەيىن وماردىڭ بۇلتارتپاۋ شاراسى قاماۋدا ۇستاۋ تۇرىندە ساقتالادى.

ءىس بويىنشا نە بەلگىلى؟

بۇعان دەيىن شىعىس قازاقستان وبلىسى اكىمدىگىندە سوتتالعان باسشىنىڭ ورنىنا ءالى كۇنگە دەيىن جاڭا ادام تاعايىندالماعانى حابارلانعان ەدى. وبلىس اكىمدىگى جاڭا تاعايىنداۋ ماسەلەسىن اپەللياسيالىق سوتتىڭ شەشىمى شىققاننان كەيىن قارايتىنىن مالىمدەدى. الايدا، وبلىس اكىمدىگىنىڭ رەسمي سايتىندا جانسايا وماردىڭ دەرەكتەرى «جەتەكشىلىك» بولىمىنەن الىنىپ تاستالعان.

جانسايا ومارعا تاعىلعان ايىپتار

3 ساۋىردە وسكەمەن قالاسىنداعى اۋدانارالىق سوت جانسايا وماردى الاياقتىق جانە پاراقورلىق ارەكەتتەرى ءۇشىن كىنالى دەپ تانىپ، ورتاشا قاۋىپسىزدىك مەكەمەسىندە 6 جىلعا باس بوستاندىعىنان ايىرۋعا ۇكىم ەتتى. ونىڭ Toyota Camry اۆتوكولىگى تاركىلەنىپ، مەملەكەتتىك قىزمەتتە جۇمىس ىستەۋ قۇقىعىنان ءومىر بويىنا ايىرىلدى. شقو پروكۋراتۋراسى وماردىڭ ارەكەتتەرى «مەملەكەتتىك قىزمەت نەگىزدەرىنە جانە قوعام سەنىمىنە نۇقسان كەلتىرەتىنىن» اتاپ ءوتتى.

سوتتا جانسايا ومار ءوز كىناسىن تولىق مويىنداپ، ءبىراق سوڭعى سوزىندە سوتتان راقىمشىلىق جاساپ، مەرزىمدى ايىپپۇلمەن اۋىستىرۋدى سۇراعان بولاتىن. ول مەملەكەتكە سالماق بولماي، ءوز ۇلەسىن قوسقىسى كەلەتىنىن ايتىپ، قارىزعا باتسا دا ايىپپۇلدى تولەيتىنىن مالىمدەگەن.

ەستەرىڭىزگە سالا كەتەيىك، شقو اكىمىنىڭ ورىنباسارىنىڭ ۇستالعانى تۋرالى اقپارات 13 اقپان 2026 جىلى پايدا بولعان ەدى. سول كەزدە رەسمي ورگاندار شەنەۋنىكتىڭ «دەنساۋلىعىنا بايلانىستى ۋاقىتشا دەمالىستا» ەكەنىن عانا حابارلاعان.