InfoHub Logo

دانا تىستەرىن ءاردايىم الىپ تاستاۋدىڭ قاجەتى جوق. ستوماتولوگ-حيرۋرگ مارسەل فايزراحمانوۆ دانا ءتىسىن ساقتاپ قالۋعا بولاتىن جاعدايلاردى اتاپ ءوتتى. ونىڭ ايتۋىنشا، بۇل ءۇشىن ءتورت شارتتىڭ ورىندالۋى ماڭىزدى: ءتىس بۇزىلماعان بولۋى، قارسى جاعىنداعى ءتىسىنىڭ بولۋى، ءتىس قاتارىندا دۇرىس ورنالاسۋى جانە شىرىشتى قابىقتى جاراقاتتاماۋى كەرەك.

بۇل تۋرالى Infohub.kz اقپارات اگەنتتىگى حابارلايدى.

قانداي جاعدايدا دانا ءتىسىن الۋ كەرەك؟

ەگەر دانا تىسىندە قۋىس پايدا بولسا، ونى كوبىنەسە الىپ تاستايدى. سەبەبى، اۋىزدىڭ ارتقى جاعىندا ورنالاسقاندىقتان، ونى تولىق ەمدەۋ قيىنعا سوعادى جانە ءاردايىم ءتيىمدى بولا بەرمەيدى.

ماماننىڭ ايتۋىنشا، ەگەر دانا ءتىسى كورشىلەس تىسكە زيانىن تيگىزسە نەمەسە شىرىشتى قابىقتى ۇنەمى جاراقاتتاپ جۇرسە، وندا ونى مىندەتتى تۇردە الىپ تاستاۋ قاجەت. سونداي-اق، قارسى جاعىنداعى ءتىسى بولماسا دا، دانا ءتىسىن الۋ ۇسىنىلادى، سەبەبى ونداي ءتىستىڭ ەشقانداي ماڭىزى بولمايدى.

دانا ءتىسىن ساقتاپ قالۋعا بولاتىن جاعدايلار

كەيبىر ناۋقاستاردا دانا تىستەرى تولىق شىعىپ، ءتىس قاتارىندا دۇرىس ورنالاسسا، ولاردىڭ قارسى جاعىنداعى تىستەرى بار بولسا، تىستەرى بۇزىلماسا، شىرىشتى قابىقتى جاراقاتتاماسا جانە پاسيەنت ءتىسىنىڭ گيگيەناسىن جاقسى ساقتاسا، وندا بۇل تىستەردى اۋىزدا تولىققاندى قىزمەت ەتۋگە مۇمكىندىك بەرۋگە بولادى.

دانا ءتىسىن الۋ كەزىندەگى ەرەكشەلىكتەر

ستوماتولوگتىڭ ايتۋىنشا، دانا تىستەرىن الۋ ماسەلەسىنە ۇلكەن جاۋاپكەرشىلىكپەن قاراۋ كەرەك. ءاربىر كلينيكالىق جاعدايدى جەكە-جەكە باعالاۋ قاجەت، شابلوندى ادىستەردى قولدانۋعا بولمايدى. ەگەر ءتىستى الۋ قاجەت بولسا، وندا ءار پاسيەنت ءۇشىن بۇل پروسەسس جەكە سيپاتتا وتەدى. ول ءتىستىڭ مولشەرى، تامىرلارىنىڭ ءپىشىنى، سۇيەك ءتىنىنىڭ تىعىزدىعى، بۇزىلۋ دارەجەسى سياقتى ءبىرقاتار فاكتورلارعا بايلانىستى بولادى.