InfoHub Logo

تاعدىر مەنى ايامادى
اۆتور: وراز بەردالى عابيت ۇلى،
ومبى گۋمانيتارلىق اكادەمياسى، جۋرناليستيكا فاكۋلتەتىنىڭ 3-كۋرس ستۋدەنتى

تاعدىر – ادامعا بەرىلگەن ەڭ كۇردەلى سىناق. ول بىزگە الدىن الا سۇراماي، ەسكەرتپەي-اق، توسىن مىنەز كورسەتىپ جاتادى. بىرەۋدى ەركەلەتىپ وسىرسە، ەندى بىرەۋدى ەرتە ەسەيتەدى. بىرىنە جول اشسا، ەكىنشىسىنە جۇك ارتادى. ال مەن ءۇشىن تاعدىر – اۋىر ساباقتاردىڭ، ىشكە بۇككەن جان ايقايلاردىڭ، ءۇنسىز كۇرەستىڭ اتاۋى.

بالا كۇنىمنەن تاعدىر مەنى باسقالارداي ەركەلەتىپ، ارقامنان قاققان جوق. الىپ-ۇشقان ارمان مەن شەكسىز ۇمىتپەن ەمەس، ەرتە ەسەيىپ، ءومىردىڭ سۋىعىنا قارسى تۇرۋمەن ءوستىم. قيىندىققا كونۋ – مەن ءۇشىن تاڭداۋ ەمەس، جالعىز مۇمكىندىك بولدى. قۋانۋعا سەبەپ تاپپاي، كۇرەسۋگە عانا ءماجبۇر بولعان ساتتەر كوپ. جىلاعىم كەلسە دە، جۇباتاتىن ەشكىم بولماعان كەزدەر بولدى. ءبىراق مەن بارىنە شىدادىم. سەبەبى تاعدىر مەنى اياماسا دا، مەن ءوزىمدى اياماي ۇيرەندىم.

اينالامداعىلار "نەگە بۇلاي بولدى؟" دەپ سۇراسا، جاۋاپ تابا المايمىن. سەبەبى مەن تاعدىرعا رەنجۋدەن شارشادىم. رەنجىگەن سايىن ءوزىمدى جوعالتا باستادىم. سوندىقتان مەن كۇرەسۋدى تاڭدادىم. ەڭسەمدى تىك ۇستاۋدى، ءۇنسىز قالسام دا – ىشىمدە داۋىل تۇرعانىن كورسەتپەۋدى ۇيرەندىم. تاعدىر ماعان كوز جاسى ەمەس، مىنەز بەردى. ول مەنى سىندىرىپ ەمەس، شىڭداپ ءوسىردى.

بۇگىن مەنىڭ جانىمدا – جارانىڭ ورنى، بەتىمدە – سابىردىڭ سىزاتى، كوزىمدە – كورگەنىمنىڭ كولەڭكەسى. ءبىراق سولاردىڭ ءبارى مەنى مەن ەتكەن بەلگىلەر. مەن تاعدىردان جەڭىلگەن جوقپىن. تەك سونىڭ سالماعىنا قاراي وزگەرە ءبىلدىم. شىنايى تابىس – تاعدىر سەنى اياعان كەزدە ەمەس، سەن تاعدىرعا قاراماي ءوزىڭدى ايالاعاندا باستالادى ەكەن.

تاعدىر مەنى اياماسا دا، مەن ومىرگە سەنەمىن. سەبەبى ءومىر – تەك سىناقتار جيىنتىعى ەمەس. ول – ءار قۇلاۋ سايىن قايتا تۇرىپ، وزىڭە دەگەن سەنىمدى جوعالتپاۋ. قانشا رەت سۇرىنسەم دە، جۇرەگىمدەگى ءۇمىت وتىن وشىرمەدىم. تاعدىر مەنى اياماسا دا، مەن ادام بولۋدى تاڭدادىم. سول ءۇشىن ماقتانامىن.