InfoHub Logo

تالعار اۋدانىندا 20 جاستاعى جىگىتتىڭ توپتاسقان ادامداردىڭ شابۋىلىنان قازا تاپقانى تۋرالى الەۋمەتتىك جەلىدە تاراعان اقپاراتقا الماتى وبلىسى پوليسيا دەپارتامەنتى تۇسىنىكتەمە بەردى.

بۇل تۋرالى Infohub.kz اقپارات اگەنتتىگى حابارلايدى.

وقيعا 12 ساۋىردە تالعار اۋدانىندا بولعان. الەۋمەتتىك جەلىدەگى جازبا اۆتورىنىڭ ايتۋىنشا، 10-نان استام ادام جىگىتكە تۇتقيىلدان شابۋىلداپ، وعان قورعانۋعا مۇمكىندىك بەرمەگەن. العان پىشاق جاراقاتىنان ول وقيعا ورنىندا كوز جۇمعان.

جازبا يەسىنىڭ سوزىنشە، وقيعا كۋاگەرلەرى مەن ۆيدەوجازبالار بار، ءبىراق تەك ءبىر ادام عانا قاماۋدا وتىر.

پوليسيا جاۋابى

الماتى وبلىسى پوليسيا دەپارتامەنتىنىڭ مالىمەتىنشە، وقيعا بويىنشا ەكى قىلمىستىق ءىس قوزعالدى: كىسى ءولتىرۋ جانە بۇزاقىلىق.

جەدەل-ىزدەستىرۋ شارالارى بارىسىندا 20 جاستاعى ءبىر كۇدىكتى ۇستالىپ، قاماۋعا الىندى. بۇزاقىلىق فاكتىسى بويىنشا تاعى ءۇش كۇدىكتى ۇستالىپ، ۋاقىتشا ۇستاۋ يزولياتورىنا قامالدى. ەكەۋىنە قاتىستى سوت ءۇي قاماعىنا الۋ تۋرالى بۇلتارتپاۋ شاراسىن تاڭدادى. ال كامەلەتكە تولماعان كۇدىكتىگە قاتىستى قوعامنان وقشاۋلامايتىن بۇلتارتپاۋ شاراسى قولدانىلدى.

پوليسيانىڭ حابارلاۋىنشا، وقيعا كۋاگەرلەرى انىقتالىپ، ولار قىلمىستىق ءىس اياسىندا جاۋاپ الىنعان. قازىرگى ۋاقىتتا ءىستىڭ بارلىق ءمان-جايىن جان-جاقتى جانە وبەكتيۆتى زەرتتەۋگە باعىتتالعان تەرگەۋ ارەكەتتەرى جۇرگىزىلىپ جاتىر. بارلىق تاراپتاردىڭ ۋاجدەرى مۇقيات تەكسەرىلۋدە.

تەرگەۋ بارىسى وبلىستىق پوليسيا دەپارتامەنتى باسشىلىعىنىڭ ەرەكشە باقىلاۋىندا.