InfoHub Logo

تالعاردا پوليسيانىڭ ۇستاۋىندا بولعان 27 جاستاعى ازاماتتىڭ قايتىس بولعانى تۋرالى ونىڭ تۋىستارى ءبىر ايدان كەيىن بىلگەن. ولاردىڭ ايتۋىنشا، ەر ادامدى پوليسيا قىسىم كورسەتىپ، وز-وزىنە قول سالۋعا يتەرمەلەگەن. ءمايىتى ءاتى-جونى بەلگىسىز زيراتقا جەرلەنگەن.

بۇل تۋرالى Infohub.kz اقپارات اگەنتتىگى حابارلايدى.

جاقىنىنان ايىرىلعان انانىڭ شاعىمى

مارقۇمنىڭ اناسى گۇلنار مومىنوۆانىڭ ايتۋىنشا، 27 جاستاعى ۇلى عالىمجان جەلتوقساننىڭ اياعىندا جوعالىپ كەتكەن. تۋىستارى بىردەن ىزدەۋ جاريالاعانىمەن، ناتيجە بولماعان. ءبىر ايدان سوڭ اناسىنا ۇلىنىڭ قايتىس بولعانى حابارلانعان.

«جۇبايىم ۇلىمىز ۇيگە ورالماعانىن حابارلادى. مەن تۇركىستاننان كەلدىم. بارلىق دوستارىن حابارلاسىپ، پوليسياعا جۇگىندىم. بەلگىلى بولعانداي، ۇلىم ينتەرنەتتە ءبىر قىزبەن تانىسقان. ءبىراق ول قىز ەمەس، 14 جاستاعى ءجاسوسپىرىم بولىپ شىقتى. ولار تەك حات الماسىپتى»، - دەيدى اناسى.

مارقۇمنىڭ سوڭعى حاتى

تۋىستارىنىڭ ايتۋىنشا، عالىمجانعا كامەلەتكە تولماعانعا جىنىستىق قاتىناسقا زورلىق جاسادى دەگەن ايىپ تاعىلعان. الايدا، وزىنە قول سالار الدىندا جازعان حاتىندا ول بۇل تۋرالى ەشتەڭە ايتپاعان.

«ۇلىم سوڭعى حاتىندا تالعار قالاسىنىڭ پوليسەيلەرى ونى ۇستاعانىن جازعان. ال ۋچاسكەدە ونىڭ باسىنا قاپ كيگىزىپ، سوققىعا جىققان دەيدى. ول حاتىندا وزىنە قانداي قىسىم كورسەتىلگەنىن جازعان»، - دەيدى اناسى.

پوليسيانىڭ جاۋابى

الماتى وبلىستىق پوليسيا دەپارتامەنتىنىڭ مالىمەتىنشە، تالعار تۇرعىنى 27 جاستاعى ەر ادامدى كامەلەتكە تولماعانعا جىنىستىق سيپاتتاعى ارەكەتتەر جاسادى دەپ ايىپتاعان. قۇقىق قورعاۋ ورگاندارى قىلمىستىق ءىس قوزعاپ، كۇدىكتىگە سەگىز جىلعا دەيىن باس بوستاندىعىنان ايىرۋ جازاسى قاراستىرىلعان.

«بۇل دەرەك بويىنشا ق ر قىلمىستىق كودەكسىنىڭ 121-بابى بويىنشا سوتقا دەيىنگى تەرگەۋ باستالدى. تەرگەۋ بارىسىندا مەسسەندجەرلەردەگى حات الماسۋلار مەن ءىستىڭ ءمان-جايىن انىقتاۋعا قاتىستى باسقا دا مالىمەتتەر زەرتتەلدى. كۇدىكتىنىڭ تۋىستارى پوليسيا قىزمەتكەرلەرىنىڭ ىقتيمال زاڭسىز ارەكەتتەرى تۋرالى ايتقان دالەلدەرى دە تەكسەرىلىپ، زاڭدا بەلگىلەنگەن تارتىپپەن قارالاتىن بولادى»، - دەپ حابارلادى الماتى وبلىستىق پد.

الماتى قالالىق پوليسيا باسقارماسىندا دا قىزمەتتىك تەكسەرىس باستالدى. ولار قىزمەتكەرلەر جەرلەۋ كەزىندە قاتەلىك جىبەرگەن بولۋى مۇمكىن دەگەندى جوققا شىعارمايدى.

«ەگەر جەتىسۋ اۋداندىق پوليسيا باسقارماسى قىزمەتكەرلەرىنىڭ زاڭبۇزۋشىلىق بەلگىلەرى انىقتالسا، ق ر زاڭناماسىنا سايكەس شارالار قابىلدانادى. ارينە، جازا دا بولادى. مارقۇمنىڭ تۋىستارىنىڭ ءۇنىن تۇسىنەمىز. مۇنداي جاعدايلار مۇلدەم ورىن الماۋى ءتيىس»، - دەدى الماتى قالالىق پد رەسمي وكىلى سالتانات ازىربەك.