InfoHub Logo

تاۋدا اجال قۇشقان ايەلدىڭ دەنەسى كەلەسى كوكتەمگە دەيىن بيىكتە قالاتىن بولدى

رەسەيلىك الپينيست ناتاليا ناگوۆيسىنانىڭ دەنەسى كەم دەگەندە كوكتەمگە دەيىن قىرعىزستانداعى جەڭىس شىڭىندا قالادى. ونى قۇتقارۋ ءۇشىن جاسالعان ءۇش ارەكەت تە ءساتسىز اياقتالدى، ال ءقازىر ورمەلەۋ ماۋسىمى جابىلدى، دەپ حابارلايدى Infohub.kz.

47 جاستاعى الپينيست ايەل 12 تامىزدا جەڭىس شىڭىنان (7439 م) ءتۇسۋ كەزىندە اياعىن سىندىرىپ العان. جولداسى كومەككە كەتكەن، ال ناتاليا ون كۇننەن اسا ۋاقىت جەتى مىڭ مەتر بيىكتە شاتىردا جالعىز قالعان.

الدىمەن وعان نەمىس ءالپينيسى گيۋنتەر زيگمۋند پەن يتاليالىق لۋكا سينيگاليا جەتپەك بولدى. ولار تەك ايەلدى ۇيىقتايتىن قاپقا وراپ، ازىق-تۇلىكتىڭ ازىن عانا قالدىرا العان. كەيىن سينيگاليا ءۇسىپ، مي ىسىنۋىنەن قايتىس بولدى.
رەسەيلىك الپينيستەر مەن قۇتقارۋشىلار وتىرعان تىكۇشاق قاتتى تۋربۋلەنتتەن ناتاليا جاتقان شاتىرعا كوتەرىلە المادى، اۋە كولىگىن شۇعىل قوندىرۋعا تۋرا كەلگەن. ەكيپاج بەن الپينيستەر زارداپ شەكتى، سونىڭ ىشىندە ۆيتاليي اكيموۆ، وعان كەيىن جاڭا توپتى باسقارۋ تاپسىرىلدى. ءبىراق 6500 مەتردە ونىڭ بەل اۋرۋى اسقىنىپ، توپ كەرى قايتۋعا ءماجبۇر بولدى.
19 تامىزدا درون كەيىنگى رەت ناتاليانى ءتىرى كۇيىندە تۇسىرگەن. 23 تامىزعا قاراي قۇتقارۋ جۇمىستارى تولىق توقتاتىلدى: قولايسىز اۋا رايى، قارلى بوران مەن قار كوشكىنىنىڭ ءقاۋپى ورلەۋدى مۇمكىن ەتپەدى.
Mash حابارلاۋىنشا، ىزدەستىرۋ جۇمىستارى كەلەسى ماۋسىمعا، 2026 جىلدىڭ كوكتەمىنە قالدىرىلدى.