InfoHub Logo

تۇركىستان وبلىسىندا جاپپاي كوكتەمگى اعاش ەگۋ ءداستۇرى باستالدى. 1 ناۋرىز كۇنى بەكزات شاعىناۋدانىنداعى ساياباقتا وتكەن ەكولوگيالىق شاراعا وبلىس اكىمى نۇرالحان كوشەروۆ، قۇقىق قورعاۋ ورگاندارىنىڭ باسشىلارى، ءماسليحات دەپۋتاتتارى، قوعام قايراتكەرلەرى، ۇكىمەتتىك ەمەس ۇيىمدار، بەلسەندى جاستار مەن ەرىكتىلەر قاتىستى.

ءىس-شارا «تازا قازاقستان» ەكولوگيالىق باعدارلاماسى اياسىندا ۇيىمداستىرىلىپ، قورشاعان ورتانى قورعاۋ، ايماقتى كوگالداندىرۋ جانە ەكولوگيالىق مادەنيەتتى قالىپتاستىرۋ ماقساتىندا وتكىزىلدى. تۇركىستان قالاسىندا وسى كۇنى 1500-دەن استام ادام قاتىسىپ، 5 مىڭنان اسا كوشەت وتىرعىزىلدى. كوشەتتەردىڭ باسىم بولىگى تەرەك، قاراعاش جانە ۇيەڭكى بولدى.

ءوڭىر باسشىسى نۇرالحان كوشەروۆ ەكولوگيالىق ءىس-شارانىڭ ماڭىزدىلىعىن اتاپ ءوتتى:
"بارشاڭىزدى العىس ايتۋ كۇنىمەن جانە قاسيەتتى رامازان ايىنىڭ كەلۋىمەن قۇتتىقتايمىن. وڭىرىمىزدە «تازا قازاقستان» باعدارلاماسى قارقىندى جۇزەگە اسىرىلۋدا. ءار تۇرعىن ءوز ءۇيىن، اۋلاسىن، كوشەسىن تازا ۇستاسا، قوعام دا تازارادى. سوندىقتان قورشاعان ورتانى بىرگە قورعاۋىمىز كەرەك. «بەكزات» شاعىناۋدانىندا ساياباق سالۋ تۋرالى تۇرعىنداردىڭ ءوتىنىشى بولعان، بۇگىن سول ساياباقتى كوگالداندىرۋ جۇمىستارى باستالدى. بارلىعىمىز «تازا قازاقستان» اكسياسىنا ۇلەس قوسايىق،" – دەدى ول.

اكسيا بارىسىندا جەرگىلىكتى ونەرپازدار كونسەرتتىك باعدارلاما ۇسىنىپ، تۇرعىندارعا كوتەرىڭكى كوڭىل-كۇي سىيلادى. كوگالداندىرۋ جۇمىستارى الداعى ۋاقىتتا دا جالعاسادى.

ەكولوگيالىق باستاماعا قولداۋ

تۇركىستان وبلىسىندا ەكولوگيالىق احۋالدى جاقسارتۋ ماقساتىندا اعاش وتىرعىزۋ ءداستۇرى جىل سايىن جۇرگىزىلەدى. بيىل دا كوگالداندىرۋ جۇمىستارى كۇشەيتىلىپ، قالانى جاسىل جەلەككە اينالدىرۋ كوزدەلۋدە. بۇل باستاما اۋانىڭ ساپاسىن جاقسارتىپ، ءوڭىردىڭ ەكولوگيالىق جاعدايىنا وڭ اسەرىن تيگىزەدى.

تۇرعىندار مەن بەلسەندىلەردىڭ قولداۋىمەن جۇزەگە اسقان بۇل ءىس-شارا تۇركىستاندى كوگالداندىرۋعا جانە قورشاعان ورتانى قورعاۋعا باعىتتالعان ماڭىزدى قادامداردىڭ ءبىرى بولدى.