InfoHub Logo

جۇرگىزۋشىلەردىڭ كولىك تىزگىندەپ بارا جاتىپ تەلەفونمەن سويلەسۋىنە نەمەسە ونى پايدالانۋىنا تىيىم سالاتىن ەرەجەلەر ەسكىردى دەپ سانايتىن ساراپشىلار بار. ولار زاڭناماعا وزگەرىستەر ەنگىزىپ، نورمالاردى ناقتىلاۋدى تالاپ ەتۋدە.

بۇل تۋرالى Infohub.kz اقپارات اگەنتتىگى حابارلايدى.

قازاقستاندا 12 ناۋرىزدان باستاپ جۇرگىزۋشىلەردىڭ كولىك تىزگىندەپ بارا جاتىپ تەلەفونمەن سويلەسكەنى جانە قاۋىپسىزدىك بەلدىگىن تاقپاعانى ءۇشىن اۆتوماتتى تۇردە ايىپپۇل سالىنا باستادى. ىشكى ىستەر مينيسترلىگى مۇنداي ايىپپۇلدار بويىنشا العاشقى ستاتيستيكانى قورىتىندىلاۋعا ءالى ەرتە ەكەنىن اتاپ وتكەنىمەن، اۆتوكولىك يەلەرى الاڭداۋلى. ولار الەۋمەتتىك جەلىلەردە ايىپپۇلدان قۇتىلۋدىڭ ءتۇرلى امالدارىن ىزدەپ، ءتىپتى تەلەفوندى باس كيىمگە جاسىرۋعا نەمەسە جول كامەرالارىنان جاسىرۋ ءۇشىن كىشكەنتاي قولشاتىرلار ساتىپ الۋعا دەيىن باردى. الايدا، اۆتوساراپشىلاردىڭ ايتۋىنشا، مۇنداي كەڭەستەرگە ەرگەن جاعدايدا ايىپپۇلدان قۇتىلۋ بىلاي تۇرسىن، بۇل جۇرگىزۋشىگە قوسىمشا كەدەرگى كەلتىرۋى مۇمكىن.

ەسكى نورمالار مەن جاڭا تەحنولوگيالار

زاڭگەر سايكەن ايسين تەلەفوندى پايدالانۋعا قاتىستى ايىپپۇل نورماسىنىڭ ەسكىرگەنىن ايتادى. بۇل نورمالار كنوپوكا تەلەفوندار داۋىرىندە جاسالعان، ءبىراق بۇگىنگى تاڭدا سمارتفونداردىڭ كەڭ تارالۋىنا بايلانىستى قولدانىسقا جارامسىز بولىپ قالعان.

«18 جىل بۇرىن تەلەفوندار كنوپوكالى بولاتىن، ولار تەك سويلەسۋگە جانە SMS جازۋعا ارنالعان ەدى. ال بۇگىنگى سمارتفوندار ناۆيگاسيا، تاكسي قىزمەتتەرى مەن كۋرەرلەردىڭ تاپسىرىس قابىلداۋى سياقتى كوپتەگەن ماڭىزدى فۋنكسيالاردى اتقارادى. كەيدە ءتىپتى اۋا رايى ناشارلاعان كەزدە جولدا كورۋدى جاقسارتۋ ءۇشىن دە قولدانىلادى»، – دەيدى سايكەن ايسين.

ساراپشىنىڭ ايتۋىنشا، ءتىپتى پوليسيا قىزمەتكەرلەرىنىڭ ءوزى راسيانى پايدالانىپ، قوزعالىس كەزىندە ەرەجە بۇزادى. نورمانىڭ انىق ەمەستىگى تاڭدامالى قۇقىق قولدانۋعا جاعداي تۋدىرىپ، سىبايلاس جەمقورلىق تاۋەكەلدەرىن تۋدىرۋى مۇمكىن.

زاڭدى ناقتىلاۋ قاجەت

اۆتوەكسپەرت الەكسەي الەكسەيەۆتىڭ پىكىرىنشە، زاڭنامانى ناقتىلاۋ قاجەت.

«شىندىعىندا، بۇل نورمانى ناقتى ءتۇسىندىرۋ كەرەك. ءقازىر ىشكى ىستەر مينيسترلىگى تەلەفوندى قانداي جاعدايدا قولدانۋعا بولاتىنىن، ال قانداي جاعدايدا ايىپپۇل سالىناتىنىن ءتۇسىندىرىپ جاتىر. دەگەنمەن، بۇل نورمانى زاڭدا ناقتى كورسەتۋ قاجەت. سوندا ەشكىم ءوز ەركىمەن شەشىم قابىلداپ، ادام ايىپپۇلعا شاعىمدانعاندا سۋديانىڭ ءوز قالاۋىمەن شەشىم شىعارۋىنا جول بەرىلمەيدى»، – دەيدى الەكسەي الەكسەيەۆ.

بۇعان دەيىن پوليسيا كولىك تىزگىندەپ بارا جاتىپ تەلەفوندى قالاي پايدالانۋ كەرەكتىگىن، ايىپپۇل الماۋ ءۇشىن نە ىستەۋ كەرەكتىگىن تۇسىندىرگەن بولاتىن. باستى شارت – تەلەفوندى قۇلاققا جاقىن ۇستاماۋ نەمەسە قولىندا ۇستاماۋ. ونى ارنايى تۇعىرعا قويىپ پايدالانۋعا بولادى، ءبىراق ونىمەن جۇمىس ىستەۋگە بولمايدى. الايدا، بۇل جاۋاپتاردا دا ايقىندىق از.