InfoHub Logo

تەلىمسىز ويىق جارالى كوليت — توق ىشەكتىڭ سوزىلمالى، قايتالامالى سىرقاتى. ول توق ىشەك شىرىشتى قاباتىنىڭ ويىق جاراسىمەن جانە قابىنۋىمەن قاتار اۋىر جايىلمالى زاقىمدانۋىمەن سيپاتتالادى.

جارالى كوليتتىڭ تۋىنداۋىنا ينفەكسيالىق، يممۋنولوگيالىق، گەنەتيكالىق فاكتورلار، سونداي-اق سىرتقى ورتانىڭ اسەرى ىقپال ەتەدى. اۋتويممۋندىق اۋرۋ دەگەن دە بولجامدار بار.

زاقىمدانۋ ادەتتە تىك ىشەكتەن باستالادى. ەگەر تەك قانا تىك ىشەك زاقىمدانسا، اۋرۋ ويىق جارالى پروكتيت دەپ اتالادى. پاتولوگيالىق ۇدەرىس ءاردايىم بۇكىل توق ىشەككە تارالادى، سوندىقتان وندا ءبىر دە ءبىر ساۋ جەر قالمايدى.

كرون سىرقاتىنان ەرەكشەلىگى — ويىق جارالى كوليت كەزىندە پاتولوگيالىق ۇدەرىسكە تەك شىرىشتى قابات پەن ونىڭ استىنداعى قابات قانا قاتىسادى. ويىق جارالاردىڭ ءپىشىنى مەن ولشەمى ءار ءتۇرلى، شەتتەرى تەگىس.

جىكتەلۋى

ورنالاسۋى بويىنشا اتالمىش سىرقات بىرنەشە تۇرگە بولىنەدى: تەلىمسىز ويىق جارالى كوليت جانە پروكتوسيگمويديت، تەلىمسىز ويىق جارالى سول جاق كوليت، تەلىمسىز ويىق جارالى جايىلمالى كوليت، تەلىمسىز ويىق جارالى ايماقتىق كوليت. اعىمى بويىنشا جىكتەلۋى: ءجىتى تەلىمسىز ويىق جارالى كوليت، سوزىلمالى تەلىمسىز ويىق جارالى كوليت، قايتالامالى تەلىمسىز ويىق جارالى كوليت. اۋىرلىعى بويىنشا جىكتەلۋى: جەڭىل، ورتاشا جانە اۋىر دارەجەلى.

كلينيكالىق كورىنىستەرى

اۋرۋ بىرتىندەپ جانە شۇعىل باستالۋى مۇمكىن. تەلىمسىز ويىق جارالى كوليتتىڭ بەلگىلەرى ىشەكتەگى قابىنۋ ۇدەرىسىنە تاۋەلدى.

بەلگىلەرى

—  ءىش ءوتۋ نەمەسە قان، ءىرىڭ جانە شىرىش ارالاس بوتقا ءتارىزدى ءناجىس، ارا-تۇرا ۇلكەن دارەتكە وتىرۋ جالعان جانە اۋىرسىنۋمەن جۇرەدى. جۇرگىزىلىپ جاتقان ەمگە قاراماستان، ۇلكەن دارەت جيىلەۋى نەمەسە سيرەۋى مۇمكىن؛

—  ءىشتىڭ اۋىرۋى (كوبىنە سول جاعى اۋىرادى)؛

— قىزبا؛

— تابەتتىڭ تومەندەۋى؛

— جۇدەۋ؛

— ءار ءتۇرلى دارەجەدەگى سۋ-ەلەكتروليتتىك بۇزىلىستار.

جارالى كوليتتىڭ ىشەكتەن تىس اسقىنۋلارى: ارتريتتەر، سپونديليتتەر، كوز اعزالارىنىڭ زاقىمدانۋى، اۋىز قۋىسىنىڭ، باۋىردىڭ جانە ءوت شىعارۋ جولدارىنىڭ سىرقاتتارى، سونداي-اق تەرى مەن تەرىاستى كلەچاتكاسى اۋرۋلارى، ترومبوفلەبيتتەر، ترومبوەمبوليالار، نەفروليتياز.

تەلىمسىز ويىق جارالى كوليتتىڭ العاشقى بەلگىسى — قان ارالاس ءىش ءوتۋ.

ناقتامالاۋ

دەرتتىڭ اۋىرلىق دارەجەسىنە قاراي ونىڭ كلينيكالىق كورىنىستەرى قالىپتى دەڭگەيدەن پەريتونيت كلينيكاسىنا دەيىن اۋىتقيدى. توق ىشەكتى ساۋساقپەن زەرتتەگەندە — پەريانالدى ابسەستەر، توق ىشەك جىلانكوزدەرى، ءانالدى جولدىڭ جارىقتارى، سفينكتەر سپازمى، شىرىشتى قاباتتىڭ كەدىر-بۇدىرلىعى مەن قالىنداۋى، قاننىڭ، شىرىشتىڭ، ءىرىڭنىڭ بولۋى. توق ىشەكتى ەندوسكوپيالىق زەرتتەۋ جۇرگىزىلەدى. اتالعان سىرقاتتى ناقتامالاۋداعى العاشقى قادام — رەكتورومونوسكوپيا. زەرتتەۋ كەزىندە توق ىشەك پەن سيگما ءتارىزدى ىشەك شىرىشتى قاباتىنىڭ ءىسىنۋى، گيپەرەمياسى بايقالادى؛ توق ىشەك شىرىشتى قاباتىنىڭ قالىپتى تامىر سۋرەتى جويىلادى؛ توق ىشەك گاۋستراسياسى جوعالادى. ءپىشىنى مەن كولەمى ءار ءتۇرلى ويىق جارالار كورىنەدى. جالعىز ويىق جارانىڭ بولۋى وبىرعا كۇدىك تۋدىرادى. فيبروكولونوسكوپيانى قولدانۋ تەلىمسىز ويىق جارالى كوليتتى ناقتامالاۋدا كوپ جەڭىلدىك اكەلەدى. سونداي-اق قاجەتتى جاعدايلاردا ناقتامالاۋدا قۇرساق قۋىسى رەنتگەنوگرافياسى، يرريگوسكوپيا قولدانىلادى. لابوراتوريالىق زەرتتەۋلەردە بۇل سىرقاتتاردا قانازدىق، لەيكوسيتوز، گيپو- ديسپروتەينەميا بايقالادى.

اجىراتا ناقتامالاۋ

تەلىمسىز ويىق جارالى كوليتتى كرون سىرقاتىنان اجىراتا ناقتامالاۋ كەرەك.

ەمى

تەلىمسىز ويىق جارالى كوليتتىڭ قاي ءتۇرىنىڭ دە (تەسىلۋمەن، ۋىتتى ديلياتاسيامەن، پروففۋزدى قان كەتۋمەن اسقىنعاندارىن قوسپاعاندا) ەمى كونسەرۆاتيۆتى ادىستەردەن باستالادى. ەم كەشەنىنە ەنتەرالدى جولمەن تاماقتانۋ، كورتيكوستەرويدتار ەنگىزۋ، انتيبيوتيكتەر قولدانۋ، پارەنتەرالدى جولمەن تاماقتانۋ كىرەدى. ەمنىڭ ءبىر بولىگى — ەمدام. ەمدام جەڭىل سىڭەتىن اقۋىزدارعا (ارىق ەت، بالىق، جاڭا سۇزبە) باي بولۋى ءتيىس. جەمىستەر مەن كوكونىستى جەمەگەن دۇرىس. از-ازداپ ءبولىپ تاماقتانۋ، ىستىق جانە سۋىق تاماقتان ساقتانۋ كەرەك.

كونسەرۆاتيۆتى ەم ناتيجە بەرمەگەندە جانە اۋىر تۇرلەرىندە سىرقات وتالانادى.

قورىتا كەلە ايتارىمىز: تەلىمسىز ويىق جارالى كوليت — توق ىشەكتىڭ شىرىشتى قاباتىن زاقىمدايتىن كۇردەلى سىرقات. ونى ەمدەۋدىڭ كونسەرۆاتيۆتى ءادىسى — ەمدام، ساليسيلاتتار، ستەرويدتى گورموندار، يممۋنودەپرەسانتتار. الايدا قابىنۋ ۇدەرىسى بارا-بارا بۇكىل توق ىشەككە تاراعان جاعدايدا، وتالاۋعا تۋرا كەلەدى. تەلىمسىز ويىق جارالى كوليتتەن ءبىرجولاتا جازىلۋ ءۇشىن توق ىشەك تولىعىمەن الىنىپ تاستالادى.

ا. د. مۇستافينا

---