InfoHub Logo

تەمىرتاۋداعى "Qarmet" مەتاللۋرگيا كومبيناتىندا ءوندىرىستى جاڭعىرتۋ باعدارلاماسى اياسىندا كۋزنەچنو-پرەسستەۋ سەحىن قالپىنا كەلتىرۋ جۇمىستارى اياقتالۋعا جاقىن. بۇل سەح كاسىپورىننىڭ تەحنيكالىق تىزبەگىندەگى ماڭىزدى بۋىن بولىپ سانالادى. سەح ىسكە قوسىلعاننان كەيىن كومبيناتتىڭ ىشكى قاجەتتىلىكتەرىن، ياعني جابدىقتاردى جوندەۋ جانە قىزمەت كورسەتۋ كەزىندە قاجەتتى ارنايى ەلەمەنتتەردى، بولشەكتەردى جانە اگرەگاتتاردىڭ جەكە بولىكتەرىن دايىنداۋدى قامتاماسىز ەتەتىن بولادى. بۇل تۋرالى "Qarmet" كومپانياسىنىڭ باسپا ءسوز قىزمەتى حابارلادى.

كومپانيانىڭ مالىمەتىنشە، سەحتىڭ جۇمىسى 2019 جىلى شاتىر پليتالارى مەن قابىرعا پانەلدەرىنىڭ اپاتتى جاعدايىنا بايلانىستى توقتاتىلعان. بىرنەشە جىل بويى نىسان بوس تۇردى. 2024 جىلى سەح اۋماعىندا بۇزۋ جۇمىستارى باستالدى، ال 2025 جىلى جوبا قۇرىلىس جانە قالپىنا كەلتىرۋ جۇمىستارىنىڭ بەلسەندى كەزەڭىنە كوشتى.

جاڭارتىلعان سەحتىڭ ەرەكشەلىكتەرى

"قازىرگى ۋاقىتتا جۇمىستاردىڭ ايتارلىقتاي كولەمى ورىندالدى. شاتىر تولىعىمەن اۋىستىرىلدى، زاماناۋي جەڭىلدەتىلگەن زەنيتتىك شامدار ورناتىلدى، جاڭا قابىرعا پانەلدەرى مونتاجدالدى، جەكەلەگەن قۇرىلىمدىق ەلەمەنتتەر كۇشەيتىلدى. تەسەرۋ ناتيجەلەرى بويىنشا كەيبىر بەتون باعاندارىن ساقتاۋ تۋرالى شەشىم قابىلداندى – بۇل ءۇشىن ولار بانداجدالىپ، مەتالل كاركاسپەن كۇشەيتىلدى. تەرەزە كونسترۋكسيالارى دا اۋىستىرىلدى"، - دەپ ءتۇسىندىردى كومپانيا وكىلدەرى.

"Qarmet" مالىمەتىنشە، عيمارات ءوزىنىڭ نەگىزگى قۇرىلىمدىق ەرەكشەلىكتەرىن ساقتاپ قالعان، ءبىراق ايتارلىقتاي جەڭىلدەپ، زاماناۋي سيپاتقا يە بولدى. اۋىر بەتون شاتىر جانە قابىرعا پانەلدەرىنىڭ ورنىنا جاڭا ماتەريالدار قولدانىلدى، بۇل نىساننىڭ سەنىمدىلىگىن ارتتىرادى، ونىڭ بولاشاق پايدالانۋى مەن قىزمەت كورسەتۋىن جەڭىلدەتەدى.

وندىرىستىك ماڭىزى

قازىرگى ۋاقىتتا ىرگەلەس اۋماقتا اباتتاندىرۋ جۇمىستارى جۇرگىزىلۋدە. سونىمەن قاتار، سەحتىڭ ىشكى ينفراقۇرىلىمىن دايىنداۋ جالعاسۋدا: ينجەنەرلىك جەلىلەردى جاڭارتۋ، كوپىرلىك كرانداردى اۋىستىرۋ، ەلەكتر بولىگىن، سانتەحنيكا جانە جىلىتۋ جۇيەلەرىن جاڭعىرتۋ جوسپارلانۋۋدا. جاقىندا زاۋىتقا زاماناۋي جابدىقتار كەلە باستايدى.

كومپانيا كۋزنەچنو-پرەسستەۋ سەحىن قالپىنا كەلتىرۋ كومبينات ءۇشىن ۇلكەن ماڭىزعا يە ەكەنىن اتاپ ءوتتى.

"بۇگىنگى تاڭدا قاجەتتى جۇمىستاردىڭ ءبىر بولىگىن سىرتقى ۇيىمداردى تارتا وتىرىپ ورىنداۋعا ءماجبۇرمىز. ال سەح جۇمىسى قايتا جاندانعاننان كەيىن "Qarmet" ىشكى جوندەۋلەر مەن جابدىقتاردى جۇمىس كۇيىندە ۇستاۋ ءۇشىن قاجەتتى بولشەكتەر مەن ەلەمەنتتەردى ءوز كۇشىمەن وندىرە الاتىن بولادى"، - دەپ سەندىردى كاسىپورىن باسشىلىعى.

كۋزنەچنو-پرەسستەۋ سەحىنىڭ وسى جىلدىڭ سوڭىنا دەيىن تولىققاندى جۇمىس ىستەي باستاۋى جوسپارلانۋدا. "Qarmet" بۇل جوبانى جاڭعىرتۋعا دەگەن جاڭا كوزقاراستىڭ ءبىر مىسالى رەتىندە قاراستىرادى: ۋاقىتشا شەشىمدەرمەن شەكتەلمەي، وندىرىستىك نىسانداردى كەشەندى تۇردە قالپىنا كەلتىرۋ، ولاردىڭ سەنىمدىلىگىن، قاۋىپسىزدىگىن جانە تيىمدىلىگىن ۇزاق مەرزىمدى پەرسپەكتيۆادا ارتتىرۋ.